Sigaba 11
Sembulo lesaniketwa ngaJoseph Smith umPhrofethi kumnakabo Hyrum Smith, eHarmony, ePennsylvania, ngeNkhwekhweti 1829. Lesembulo satfolakala nge-Urimu neThumimu kuphendvulwa umthandazo nembuto waJoseph. Umlandvo waJoseph Smith ukhombisa kutsi lesembulo satfolakala ngemuva kwekubuyiselwa kwebuPhristi baka-Aroni.
1–6, Tisebenti esivinini titawutfola insindziso; 7–14, Funa kuhlakanipha, shumayela kuphendvuka, tsembela kuMoya; 15–22, Gcina imiyaleto, futsi uwafundze emavi eNkhosi; 23–27, Ungawuphiki umoya wesembulo newekuphrofetha; 28–30, Labo labemukela Khristu baba ngemadvodzana aNkulunkulu.
1 Umsebenti lomkhulu nalomangalisako sewutawucala emkhatsini webantfwana bebantfu.
2 Buka, nginguNkulunkulu; naka livi lami, leliphilile nalelinemandla, lelikhalipha kwengca inkemba lesika ngetinhlangotsini totimbili, lisika lidzimate lehlukanise emalunga nemnkantja; ngako-ke naka livi lami.
3 Buka, insimi seyimhlophe seyilungele kuvunwa; ngako-ke, noma ngubani lonesifiso sekuvuna akajikijele lisikela lakhe ngemandla, avune kusesemini, kute abekele umoya wakhe insindziso yaphakadze embusweni waNkulunkulu.
4 Yebo, noma ngubani lotawujikijela lisikela lakhe avune, nguye loyo lobitwe nguNkulunkulu.
5 Ngako-ke, uma utawucela kimi utawutfola; uma utawunconcotsa utawuvulelwa.
6 Manje, njengoba ucelile, buka, ngitsi kuwe, gcina imiyaleto yami, uphindze ufune kuveta futsi ucinisekise inhloso yeSiyoni.
7 Ungafuni ingcebo kepha funa inhlakanipho; futsi, buka, timfihlakalo taNkulunkulu tiyawukwembulelwa wena, futsi emvakwaloko uyawunotsa. Buka, loyo lonekuphila lokuphakadze unotsile.
8 Ngicinisile, ngicinisile, ngitsi kuwe, njengoba ufisa lokuvela kimi kuyawuba njalo kuwe; futsi, uma ufisa, uyawuba yindlela yekwenta lokuhle kulesi situkulwane.
9 Ungashumayeli lutfo kulesi situkulwane ngaphandle kwekuphendvuka. Gcina imiyaleto yami, ulekelele ekuveteni umsebenti wami, ngekwemiyaleto yami, uyawubusiswa.
10 Buka, unesipho, noma uyawuba nesipho uma usicela kimi ngelukholo, ngeliciniso, ukholwa emandleni aJesu Khristu, noma emandleni ami lakhuluma nawe;
11 Ngoba, buka, ngimi lona lokhulumako; buka, ngikukhanya lokukhanya ebumnyameni, futsi nangemandla ami ngikunika lamavi.
12 Manje, ngicinisile, ngicinisile ngitsi kuwe, beka litsemba lakho kuloyo Moya loholela ekwenteni lokuhle—yebo, ekwenteni kulunga, ekutiphatseni ngekutitfoba, nekwehlulela ngekulunga; futsi nguMoya wami lona.
13 Ngicinisile, ngicinisile, ngitsi kuwe, ngitawukwembula kuwe incenye yaMoya wami, loyo lokhanyisela ingcondvo yakho, loyawugcwalisa umoya wakho ngenjabulo.
14 Emvakwaloko uyawukwati, noma ngenca yaloku uyawukwati, tonkhe tintfo tanoma ngayini loyifisako kimi, letiphatselene netintfo tekulunga, ngelukholo ukholwa kimi kutsi uyawutitfola.
15 Buka, ngiyakuyaleta kutsi akukafaneli ucabange kutsi ubitelwe kushumayela ute ubitwe.
16 Lindza sikhashana, ute ube nelivi lami, lidvwala lami, libandla lami, nelivangeli lami, kute wati ngekweliciniso ngemfundziso yami.
17 Emvakwaloko, buka, ngekwetifiso takho, yebo, ngisho nangelukholo lwakho kuyawukwenteka kuwe.
18 Gcina imiyaleto yami; thula; ncusa kuMoya wami;
19 Yebo, bambelela kimi ngenhlitiyo yakho yonkhe, kute usite ekukhanyiseleni bantfu leto tintfo lesekukhulunywe ngato—yebo, kuhunyushwa kwemsebenti wami; beketela ute ukufeze loko.
20 Buka, ngumsebenti wakho lona, kugcina imiyaleto yami, yebo, ngawo onkhe emandla, ingcondvo kanye nangemfutfo wakho.
21 Ungafuni kushumayela livi lami, kodvwa funa kucala kulitfola livi lami, futsi emvakwaloko lulwimi lwakho luyawuchacheka; emvakwaloko, uma ufisa, uyawukuba naMoya wami nelivi lami, yebo, emandla aNkulunkulu lenta bantfu bakholwe.
22 Kodvwa manje thula; fundza livi lami leselimenyetelwe emkhatsini webantfwana bebantfu, ufundze nelivi lami leliyawukwembulwa emkhatsini webantfwana bebantfu, noma lelo lelihunyushwako manje, yebo, ute ukutfole konkhe lengiyawukupha labantfwana bebantfu kulesi situkulwane, futsi emvakwaloko tonkhe tintfo tiyawukwengetwa kuloko.
23 Buka unguHyrum, ndvodzana yami; funa umbuso waNkulunkulu, futsi tonkhe tintfo tiyawukwengetwa ngekuvumelana nekulunga.
24 Yakhela etikwelidvwala lami, lokulivangeli lami;
25 Ungawuphiki umoya wesembulo, naloyo moya wekuphrofetha, ngoba maye kuloyo loyawuphika leti tintfo;
26 Ngako-ke, londvolota enhlitiyweni yakho livi lami kute kube sikhatsi lengiyawubona ngaso kutsi kufanele uhambe.
27 Buka, ngikhuluma kubo bonkhe labanetifiso letinhle, nalabajikijele lisikela labo kute bavune.
28 Buka, nginguJesu Khristu, iNdvodzana yaNkulunkulu. Ngikuphila nekukhanya kwemhlaba.
29 Nginguye loweta kubami futsi bami bangangemukeli;
30 Kodvwa ngicinisile, ngicinisile, ngitsi kuwe, bonkhe labangemukelako, ngitawubanika emandla ekuba ngemadvodzana aNkulunkulu, ngisho nakulabo labakholelwa egameni lami. Amen.