Sigaba 30
Sembulo lesaniketwa ngaJoseph Smith umPhrofethi kuDavid Whitmer, nakuPeter Whitmer lomNcane, kanye nakuJohn Whitmer, eFayette, eNew York, ngeNyoni 1830, emvakwemhlangano wemalanga lamatsatfu eFayette, kodvwa ngaphambi kwekube babonisi beliBandla behlukane. Ekucaleni lombhalo washicilelwa njengetembulo letintsatfu; wahlanganiswa waba sigaba sinye ngumPhrofethi eluhlelweni lweMfundziso neTivumelwano lwanga 1835.
1–4, David Whitmer uyayalwa ngekuhluleka kusebenta ngekukhutsala; 5–8, Peter Whitmer lomNcane kufanele aphekeletele Oliver Cowdery emsebentini wekufundzisa livangeli kumaLamani; 9–11, John Whitmer ubitelwa kushumayela livangeli.
1 Buka, ngitsi kuwe, David, wesabe bantfu wangetsembeli kimi kute utfole emandla njengoba bekufanele.
2 Kodvwa umcondvo wakho bewusetintfweni temhlaba kwengca kuba setintfweni tami, uMenti wakho, nasebufundisini lobitelwe kubo; futsi awukamnaki Moya wami, nalabo labebabekwe ngetulu kwakho, kodvwa ukholiswe ngulabo lengingatange ngibayalete.
3 Ngaloko-ke, uyekelwe kute utibutele wena kimi, uphindze uzindle ngetintfo lotitfolile.
4 Uyawuhlala emtini weyise, ngite ngikunike leminye imiyaleto. Futsi uyawutinikela ebufundisini ebandleni, nangaphambi kwemhlaba, nasetifundzeni letisedvute. Amen.
5 Buka, ngitsi kuwe, Peter, uyawutsatsa luhambo lwakho nemnakenu Oliver; ngoba sikhatsi sesifikile kutsi kungilungele kutsi uvule umlomo wakho ushumayele livangeli lami; ngako-ke, ungesabi, kodvwa naka emavi neteluleko temnakenu, latawukunika tona.
6 Futsi hlupheka naye kuto tonkhe tinhlupheko takhe, ngato tonkhe tikhatsi uphakamisele inhlitiyo yakho kimi ngemthandazo nangekukholwa, kute ufeze kukhuleka kwakho nekwakhe; ngoba ngimnikete emandla ekwakha libandla lami emkhatsini wemaLamani;
7 Futsi angikhetsanga muntfu kutsi abe ngumeluleki wakhe ebandleni, ngalokuphatselene netindzaba telibandla, ngaphandle kwemnakabo, Joseph Smith, lomNcane.
8 Ngaloko-ke, naka leti tintfo ukhutsale ekugcineni imiyaleto yami, futsi uyawubusiswa ngalokwanele kute uzuze kuphila lokuphakadze. Amen.
9 Buka, ngitsi kuwe, nceku yami John, utawucala kusukela kulesi sikhatsi kuya phambili kushumayela livangeli lami, njengekukhala kwelicilongo.
10 Umsebenti wakho uyawuba semtini wemnakenu Philip Burroughs’, nakuleso sifundza lesisedvute, yebo, noma ngukuphi lapho ungevakala khona, ngite ngikuyale kutsi usuke lapho.
11 Futsi wonkhe umsebenti wakho uyawuba seSiyoni, ngawo wonkhe umphefumulo wakho, kusuka manje; yebo, uyawuhlala njalo uvula umlomo kusekela umsebenti wami, ungesabi lokungentiwa bantfu, ngoba nginawe. Amen.