Sigaba 21
Sembulo lesaniketwa Joseph Smith umPhrofethi, eFayette, eNew York, mhlaka 6 kuMabasa 1830. Lesembulo saniketwa ekusungulweni kweliBandla, ngelusuku lolushitiwo, ekhaya laPeter Whitmer lomDzala. Emadvodza lasitfupha, labekabhajatisiwe ngaphambilini, abamba lichaza. Ngelivoti lelivumelanako laba bantfu bavakalisa sifiso sabo nekutimisela kuhlela liBandla, ngekwemiyaleto yaNkulunkulu (buka sigaba 20). Baphindze bavotela kwemukela nekusekela Joseph Smith lomNcane naOliver Cowdery njengalabengamele liBandla. Ngekubeka tandla enhloko, Joseph Smith wabese ubeka Oliver njengembonisi weliBandla, naOliver ngalokunjalo naye wabeka Joseph. Emvakwekubusisa sidlo seNkhosi, Joseph naOliver babeka tandla etikwebahlanganyeli ngamunye kubanika Moya loNgcwele nekucinisekisa ngamunye njengelilunga leliBandla.
1–3, Joseph Smith ubitwa kutsi abe ngumboni, umhumushi, umphrofethi, kanye nembonisi; 4–8, Livi lakhe litawuhola timiso teSiyoni; 9–12, LabaNgcwele batawuwakholwa emavi akhe uma akhuluma ngekuphefumulelwa nguMdvudvuti,
1 Buka, kuyawuba nembhalo loyawugcinwa emkhatsini wenu; kuwo uyawubitwa ngemboni, umhumushi, umphrofethi, umphostoli waJesu Khristu, umbonisi welibandla ngentsandvo yaNkulunkulu Babe, nangemusa weNkhosi yenu Jesu Khristu.
2 Uphefumulelwe nguMoya loNgcwele kubeka sisekelo salo, nekulakhela elukholweni lolungcwele kakhulu.
3 Lelo bandla lelahlelwa laphindze lasungulwa ngemnyaka weNkhosi yenu wemakhulu lasiphohlongo nemashumi lamatsatfu, enyangeni yesine, ngelilanga lesitfupha enyangeni lebitwa ngekutsi nguMabasa.
4 Ngaloko-ke, ngisho libandla, niyawuwanaka onkhe emavi akhe nemiyaleto layawuniniketa yona njengoba ayemukela, nihambe ngebungcwele bonkhe phambi kwami;
5 Ngalamanye emagama livi lakhe niyawulemukela, kube shengatsi liphuma kuwami umlomo, ngekubeketela konkhe nangelukholo lonkhe.
6 Ngoba ngekwenta tonkhe leti tintfo emasango esihogo angeke abuse etikwenu; yebo, futsi iNkhosi Nkulunkulu utawuwakhulula emandla ebumnyama phambi kwenu, yente emazulu atfutfumele kute nizuze, nekudvumisa libito lakhe.
7 Ngoba naku lokushiwo yiNkhosi Nkulunkulu: Yena ngimphefumulele kutsi achubekise simiso seSiyoni ngemandla lamakhulu kute nizuze, futsi nekukhutsala kwakhe ngiyakwati, nemithandazo yakhe ngiyivile.
8 Yebo, kukhalela kwakhe iSiyoni ngikubonile, futsi ngitawukwenta kutsi angasachubeki nekuyikhalela; ngoba tinsuku takhe tekujabula setifikile ngenca yekutsetselelwa kwetono takhe, nekubonakaliswa kwetibusiso tami etikwemisebenti yakhe.
9 Ngoba, bukani, ngitawubabusisa bonkhe labo labasebenta esivinini sami ngesibusiso lesikhulu, futsi bayawukholelwa emavini akhe, laniketwe yena ngami nguMdvudvuti, lafakaza kutsi Jesu wabetselwa bantfu lababi kute kukhokhelwe tono temhlaba, yebo, kute kutsetselelwe tono kulabanenhlitiyo ledzabukile.
10 Ngaloko-ke kuyintsandvo yami kutsi abekwe nguwe, Oliver Cowdery mphostoli wami;
11 Loku kusimiso kuwe, kutsi ungumbonisi ngaphansi kwesandla sakhe, kute abe wekucala kuwe, kute ube ngumbonisi kulelibandla laKhristu, lelatiwa ngelibito lami—
12 Nemshumayeli wekucala walelibandla ebandleni, nangaphambi kwemhlaba, yebo, ngaphambi kwebeTive; yebo, futsi naku lokushiwo yiNkhosi Nkulunkulu, buka, buka! nakumaJuda futsi. Amen.