Sigaba 17
Sembulo lesaniketwa ngaJoseph Smith umPhrofethi ku-Oliver Cowdery, kuDavid Whitmer, kanye nakuMartin Harris, eFayette, eNew York, ngeNhlaba 1829, ngaphambi kwekutsi babone bongcwengcwe labacoshiwe labacuketse umbhalo ngeNcwadzi yaMormon. Joseph nembhali wakhe, Oliver Cowdery, bebatfole lwati ekuhumusheni bongcwengcwe beNcwadzi yaMormon lwekutsi bofakazi labatsatfu labakhetsekile bebatawukhetfwa (buka Etheri 5:2–4; 2 Nefi 11:3; 27:12). Oliver Cowdery, David Whitmer, naMartin Harris bachutjwa sifiso lesiphefumulelwe kutsi babe ngulabo bofakazi labatsatfu labakhetsekile. UmPhrofethi wabuta iNkhosi, lesembulo sabese siniketwa kuphendvula umbuto nge-Urimu neThumimu.
1–4, Ngelukholo boFakazi labatsatfu batawubabona bongcwengcwe naletinye tintfo letingcwele; 5–9, Khristu ufakaza ngeNcwadzi yaMormon kutsi ingulevela kuNkulunkulu.
1 Bukani, ngitsi kini, kumele netsembele evini lami, leniyawutsi uma nikwenta ngekutinikela lokuphelele, niyawukwati kubona bongcwengcwe, kanye nesivikelo sesifuba, nenkemba yaLabani, ne-Urimu neThumimu, lokwaniketwa umnakaboJarede etikwentsaba, ngesikhatsi akhuluma neNkhosi buso nebuso, kanye nenkhombandlela lesimangaliso leyaniketwa Lehi ngesikhatsi basehlane, emnceleni weLwandle loluBovu.
2 Futsi kungenca yelukholo lwenu kutsi niyawukwati kutibona, ngisho ngalolo kholo lwebaphrofethi basemandvulo.
3 Emvakwekube senitfole lukholo, senitibonile nangemehlo enu, niyawufakaza ngato, ngemandla aNkulunkulu.
4 Futsi loku niyawukwenta kute inceku yami Joseph Smith, lomNcane, lungashabalaliswa ludvumo lwakhe, kute ngifeze tinhloso tami letilungile kubantfwana bebantfu kulomsebenti.
5 Niyawufakaza kutsi nitibonile, njengoba nenceku yami Joseph Smith, lomNcane, atibonile; ngoba kungemandla ami kutsi ukwatile kutibona, futsi kungoba bekanelukholo.
6 Futsi uyihumushile lencwadzi, ngisho naleyo ncenye lengimyalete ngayo, futsi njengoba iNkhosi yenu naNkulunkulu wenu iphila kuliciniso.
7 Ngaloko-ke, niphiwe emandla lafanako, lukholo lolufanako, nesipho lesifanako njengaye;
8 Futsi uma niyigcina lemiyaleto yami yekugcina, lengininike yona, emasango esihogo angeke abuse ngekumelana nani; ngoba umusa wami unenele, futsi niyawuphakanyiswa ngelilanga lekugcina.
9 Futsi mine, Jesu Khristu, iNkhosi yenu naNkulunkulu wenu, ngikukhulumile loku kini, kute ngifeze tinhloso tami letilungile kubantfwana bebantfu. Amen.