Sigaba 13
Incenye letsetfwe emlandvweni waJoseph Smith lechaza ngekugcotjwa kwemPhrofethi na-Oliver Cowdery kutsi babe nebuPhristi baka-Aroni edvute neHarmony, ePennsylvania, mhlaka 15 Inkhwekhweti 1829. Loku kugcotjwa kwentiwa ngetandla tengilosi leyatibita ngaJohane uMbhabhatisi eThestamenteni leliSha. Ingilosi yachaza kutsi beyenta njengekuyalwa nguPhetro, Jakobe, Johane baPhostoli basemandvulo, labebaphetse tikhiya tebuphristi lobukhulu, lobebubitwa ngekutsi buPhristi bakaMelkhisedeki. Joseph na-Oliver batsenjiswa kutsi bebayawuniketwa lobu buPhristi lobukhulu ngesikhatsi lesifanele. (Buka sigaba 27:7–8, 12.)
Tikhiya nemandla ebuPhristi baka-Aroni kubekwa ebaleni nguJohane uMbhabhatisi.
1 Etikwenu tinceku letisebenta nami, egameni laMesiya ngiyaninika buPhristi baka-Aroni, lobuphetse tikhiya tekusetjentelwa tingilosi, futsi netelivangeli lekuphendvuka, netekubhabhatisa ngekucwiliswa kute kutsetselelwe tono; futsi loku angeke kuphindze kutsatfwe emhlabeni, ate emadvodzana aLevi aphindze futsi anikele umnikelo eNkhosini ngekulunga.