Sigaba 20
Sembulo ngekuhlelwa nangekuphatfwa kweliBandla, lesaniketwa ngaJoseph Smith umPhrofethi, eFayette, New York noma edvute nakhona. Tincenye talesembulo kungenteka kutsi taniketwa kusukela ehlobo langemnyaka wa 1829. Sembulo sonkhe lesiphelele, ngaleso sikhatsi lebesatiwa ngekutsi yimiBhalo neTivumelwano, kungenteka kutsi cishe sabhalwa masinyane nje emvakwamhlaka 6 kuMabasa, 1830 (lilanga lekwasungulwa ngalo liBandla). UmPhrofethi wabhala loku, “Sakutfola Kuye [Jesu Khristu] loku lokulandzelako, ngemoya wesiphrofetho newesembulo; lokungasinikanga lwati loluningi kuphela, kodvwa kwasikhombisa lilanga lokungulona lona lapho, ngekwentsandvo nangekwemyaleto Wakhe, kumele sichubeke siphindze sihlele liBandla lakhe (futsi) lapha emhlabeni.
1–16, INcwadzi yaMormon ikhombisa kutsi umsebenti wemalanga ekugcina uvela kuNkulunkulu; 17–28, Timfundziso tendalo, kuwa, inhlawulo, nembhabhatiso tiyacinisekiswa; 29–37, Imitsetfo lelawula kuphendvuka, kulunga, kungcweliswa, nekubhajatiswa ibekwa ebaleni; 38–67, Imisebenti yebabonisi, baphristi, bafundzisi, badikhoni ivetwa kancane; 68–74, Imisebenti yemalunga, kubusiswa kwebantfwana, nendlela yekubhabhatisa iyavetwa; 75–84, Imithandazo yesidlo seNkhosi nemitsetfo lelawula kuba lilunga lelibandla iyaniketwa.
1 Kucala kweliBandla laKhristu kulawa malanga ekugcina, kuyinkhulungwane nemakhulu lasiphohlongo nemashumi lamatsatfu eminyaka seloku kwefika iNkhosi neMsindzisi wetfu Jesu Khristu enyameni, lelahlelwa kahle laphindze lasungulwa ngekuvumelana nemitsetfo yelive letfu, ngentsandvo nangemiyaleto yaNkulunkulu, enyangeni yesine, elangeni lesitfupha lenyanga lebitwa ngekutsi nguMabasa.
2 Imiyaleto leyaniketwa Joseph Smith, lomNcane, lowabitwa nguNkulunkulu, wabekwa waba ngumphostoli waJesu Khristu, kutsi abe ngumbonisi wekucala walelibandla;
3 Naku-Oliver Cowdery, naye lowabitwa nguNkulunkulu, umphostoli waJesu Khristu, kutsi abe ngumbonisi wesibili walelibandla, nalowabekwa ngaphansi kwesandla sakhe;
4 Futsi loku kungekwemusa weNkhosi neMsindzisi wetfu Jesu Khristu, ludvumo alube kuye, manje naphakadze. Amen.
5 Emvakwekube iNkhosi seyimkhombisile ngekweliciniso lombonisi wekucala kutsi tono takhe besetitsetselelwe, waphindze watihilela etintfweni letilite temhlaba;
6 Kodvwa emvakwekuphendvuka, nekutitfoba ngeliciniso, ngelukholo, Nkulunkulu wambusisa ngengilosi lengcwele, buso bayo lobebufana nembani, tingubo tayo timsulwa tiphindze timhlophe ngetulu kwabo bonkhe bumhlophe;
7 Futsi wamnika imiyaleto leyamkhutsata;
8 Wamnika emandla lavela ezulwini, ngetindlela lebetilungiswe ngaphambilini, kuhumusha iNcwadzi yaMormon;
9 Lecuketse umbhalo webantfu labawile, nekuphelela kwelivangeli laJesu Khristu lokufanele liye kubeTive kanye nemaJuda;
10 Leyaniketwa ngekuphefumulelwa, futsi icinisekiswa kulabanye ngekusentjentelwa tingilosi, yaphindze yafundziswa ngibo emhlabeni—
11 Lokubonisa bantfu kutsi lemibhalo lengcwele iliciniso, nekutsi Nkulunkulu uyabaphefumulela bantfu aphindze ababitele emsebentini wakhe longcwele kuletikhatsi nakuletinsuku, njengasetikhatsini takadzeni;
12 Ngaloko ukhombisa kutsi usenguNkulunkulu lofanako itolo, namuhla naphakadze. Amen.
13 Ngako-ke, njengoba umhlaba unebufakazi lobukhulu kangaka, bantfu bayawukwehlulelwa ngibo, ngisho labaningi labayawukwemukela lwati lwalomsebenti emvakwalesi sikhatsi.
14 Futsi labo labemukela lomsebenti ngekukholwa, nalabenta umsebenti wekulunga, bayawuniketwa umchele wekuphila lokuphakadze.
15 Kodvwa labo labatenta lukhuni tinhlitiyo tabo ngekungakholwa, bawulahle, loko kuyawuletsa kulahlwa kubo—
16 Ngoba iNkhosi Nkulunkulu ikukhulumile loku; futsi natsi, babonisi belibandla, sivile futsi siyafakaza ngemavi aloyo loneBukhosi lobukhatimulako losezulwini, ludvumo alube kuye phakadze naphakadze. Amen.
17 Ngaleti tintfo siyati kutsi ukhona Nkulunkulu ezulwini, lote siphetfo nalophakadze, kusukela phakadze kuya phakadze kusenguye Nkulunkulu longagucuki, umdali welizulu nemhlaba, nako konkhe lokukuwo;
18 Nekutsi wadala umuntfu, wesilisa newesifazane, ngemfanekiso nangesimo sakhe, wabadala;
19 Wabanika nemiyaleto kutsi bamtsandze baphindze bamsebentele, lokunguye kuphela Nkulunkulu lophilako nalonguye sibili, nekutsi kufanele kube nguye kuphela umuntfu lokufanele bamkhonte.
20 Kodvwa ngekuphambuka kulemitsetfo lengcwele bantfu baba bemvelo nalabanebusathane, futsi baba ngulabawile.
21 Ngaloko-ke, Nkulunkulu Somandla wanikela ngeNdvodzana yakhe leTelwe Yodvwa, njengoba kubhaliwe kuleyo mibhalo lengcwele leyembuliwe mayelana naye.
22 Wabeketelela tilingo kodvwa akatange atinake.
23 Wabetselwa, wafa, waphindze wavuka ngelilanga lesitsatfu;
24 Wenyukela ezulwini, kute ahlale ngasesandleni sangesekudla saBabe, kute abuse ngemandla onkhe ngekwentsandvo yaBabe;
25 Kute bonkhe labo labayawukholwa futsi babhajatiswe egameni lakhe lelingcwele, baphindze babeketele elukholweni kute kube sekugcineni, basindziswe—
26 Kungasibo labo kuphela labakholwa emvakwekufika kwakhe ekhatsi nesikhatsi, enyameni, kodvwa bonkhe labo kusukela ekucaleni, ngisho nabo bonkhe labebakhona asengakefiki, labebakholelwa emavini ebaphrofethi labangcwele, labebakhuluma njengoba bebaphefumulelwa sipho saMoya loNgcwele, labebafakaza ngaye ngeliciniso kuto tonkhe tintfo, kufanele babe nekuphila lokuphakadze;
27 Kanye nalabo labatawufika muva, labatawukholelwa etiphiweni naselubitweni lwaNkulunkulu ngaMoya loNgcwele, lofakaza ngaBabe nangeNdvodzana;
28 Babe, iNdvodzana, naMoya loNgcwele banguNkulunkulu munye, lote siphetfo nalophakadze. Amen.
29 Futsi siyati kutsi bonkhe bantfu kumele baphendvuke baphindze bakholwe egameni laJesu Khristu, bakhonte Babe egameni lakhe, babeketele elukholweni egameni lakhe kute kube sekugcineni, nakungenjalo angeke basindziswe embusweni waNkulunkulu.
30 Futsi siyati kutsi kulunga ngemusa weNkhosi yetfu neMsindzisi Jesu Khristu kulungile futsi kuliciniso.
31 Siyati nekutsi kungcweliswa ngemusa weNkhosi yetfu neMsindzisi Jesu Khristu kulungile futsi kuliciniso, kubo bonkhe labo labamtsandzako nalabamsebentelako Nkulunkulu ngawo onkhe emandla abo, nangengcondvo yabo kanye nangemfutfo wabo.
32 Kodvwa kusenekwenteka kutsi umuntfu abe ngephandle kwemusa bese uyahlubuka kuNkulunkulu lophilako;
33 Ngako-ke libandla alicaphele liphindze lithandaze njalo, funa liwele ekulingweni;
34 Yebo, ngisho nalabo labangcwelisiwe abacaphele nabo.
35 Futsi siyati kutsi leti tintfo tiliciniso tiphindze tingekwesembulo saJohane, asingeti lutfo futsi asiphunguli lutfo etiphrofethweni tencwadzi yakhe, imibhalo lengcwele, noma tembulo taNkulunkulu letitawufika emvakwaloku ngesipho nangemandla aMoya loNgcwele, ngelivi laNkulunkulu, noma ngekusitwa tingilosi.
36 Futsi iNkhosi Nkulunkulu ikukhulumile loku, ludvumo, nemandla, nenkhatimulo akuniketwe libito lakhe lelingcwele, manje naphakadze. Amen.
37 Ngetulu kwaloko, ngendlela yemyaleto ebandleni mayelana nendlela yembhabhatiso—Bonkhe labo labatitfobako phambi kwaNkulunkulu, futsi bafisa kubhajatiswa, bete ngetinhlitiyo letidzabukile nemimoya letfobekile, bakhombisa libandla kutsi baphendvuke ngekweliciniso etonweni tabo tonkhe, futsi batimisele kubitwa ngelibito laJesu Khristu, banenshisekelo yekumsebentela kute kube sekugcineni, bakhombisa ngekweliciniso ngemisebenti yabo kutsi sebatfole incenye yaMoya waKhristu kute batsetselelwe tono tabo, bayawukwemukelwa ngembhabhatiso ebandleni lakhe.
38 Lona ngumsebenti webabonisi, baphristi, bafundzisi, badikhoni, nemalunga elibandla laKhristu—Umphostoli ungumbonisi, futsi lubito lwakhe kubhabhatisa;
39 Nekubeka labanye babonisi, baphristi, bafundzisi, nebadikhoni;
40 Nekubusisa sinkhwa neliwayini—timphawu temtimba nengati yaKhristu—
41 Nekucinisekisa labo lababhajatiselwa ebandleni, ngekubabeka tandla enhloko kute babhajatiswe ngemlilo nangaMoya loNgcwele, ngekwemibhalo lengcwele;
42 Nekufundzisa, kuchaza ngalokugcwele, kukhutsata, kubhabhatisa, nekugadza libandla;
43 Nekucinisekisa emalunga elibandla ngekubabeka tandla enhloko, nekunika Moya loNgcwele
44 Nekuhola yonkhe imihlangano.
45 Babonisi kufanele bachube imihlangano ngekuholwa nguMoya loNgcwele, ngekwemiyaleto nangekwetembulo taNkulunkulu.
46 Umsebenti wemphristi kushumayela, kufundzisa, kuchaza ngalokugcwele, kukhutsata, kubhabhatisa, nekubusisa sidlo seNkhosi,
47 Nekuvakashela umuti welilunga ngalinye, nekuwakhutsata kutsi athandaze kuvakale, nasekusitsekeni futsi bente yonkhe imisebenti yemndeni.
48 Futsi angaphindze abeke labanye baphristi, bafundzisi, nebadikhoni.
49 Kufanele ahole imihlangano uma kute umbonisi lokhona;
50 Kodvwa uma umbonisi akhona, kufanele ashumayele kuphela, afundzise, achaze ngalokugcwele, akhutsate aphindze abhabhatise,
51 Aphindze avakashele umuti welilunga ngalinye, nekuwakhutsata kutsi athandaze kuvakale nasekusitsekeni, futsi bente yonkhe imisebenti yemndeni
52 Kuyo yonkhe lemisebenti umphristi kufanele alekelele umbonisi uma kunesidzingo.
53 Umsebenti wemfundzisi kugadza libandla njalo, kubasita nekubacinisa;
54 Nekucinisekisa kutsi kute bubi ebandleni, kungevani emkhatsini wabo, nekucamba emanga, nenhlebo, nekukhuluma kabi;
55 Nekucinisekisa kutsi libandla liyahlangana njalo nje, kanjalo nekucinisekisa kutsi onkhe emalunga ayawenta umsebenti wawo.
56 Futsi kufanele ahole imihlangano uma angekho umbonisi noma umphristi—
57 Kufanele alekelelwe njalo, kuyo yonkhe imisebenti yakhe ebandleni, badikhoni, uma kunesidzingo.
58 Kodvwa bafundzisi noma badikhoni bete ligunya lekubhabhatisa, kubusisa sidlo seNkhosi, nekubeka tandla;
59 Kodvwa, kufanele, becwayise, bachaze ngalokugcwele, bakhutsate, bafundzise, baphindze bameme bonkhe bantfu kutsi bete kuKhristu.
60 Wonkhe umbonisi, umphristi, umfundzisi, umdikhoni kufanele abekwe ngekwetiphiwo nangekwelubito lwaNkulunkulu kuye; futsi kufanele abekwe ngemandla aMoya loNgcwele, lakuloyo lombekako.
61 Baboniso labehlukene labayincenye yelibandla laKhristu kufanele bahlangane emhlanganweni kanye etinyangeni letintsatfu, noma ngetikhatsi letitsite njengoba leyo lemihlangano leshitiwo itawucondzisa noma yente sincumo.
62 Futsi leyo mihlangano leshitiwo kufanele yente noma ngumuphi umsebenti welibandla lokudzingeka wentiwe.
63 Babonisi kufanele batfole timvume kulabanye babonisi, ngekuvota kwelibandla labakulo, noma kulemihlangano.
64 Umphristi, umfundzisi noma umdikhoni ngamunye, lobekwe ngumphristi, angatfola sitifiketi kuye ngaleso sikhatsi, sitifiketi lokuyawutsi uma siyiswa kumbonisi, simnike imvume, leyiyawumgunyata kwenta imisebenti yelubito lwakhe, noma angayitfola emhlanganweni.
65 Kute umuntu lokufanele abekwe kunoma ngusiphi sikhundla kulelibandla, lapho kuneligala lelibandla lelihlelekile ngalokufanele lelifanako, ngaphandle kwelivoti lalelo bandla.
66 Kodvwa babonisi labengamele, babhishobhi labahambako, beluleki labakhulu bemkhandlu, baphristi labakhulu, nebabonisi, bangaba nelilungelo lekubeka ebuphristini, lapho kute khona ligala lelibandla lapho livoti lingabitwa khona.
67 Wonkhe mengameli webuphristi lobukhulu (noma umbonisi lowengamele) umbhishobhi, umeluleki lomkhulu wemkhandlu, nemphristi lomkhulu, kufanele babekwe ngekugunyatwa ngumkhandlu lomkhulu noma ngumhlangano lomkhulu.
68 Umsebenti wemalunga ngemuva kwekwemukelwa ngembhabhatiso—Babonisi noma baphristi kafanele babe nesikhatsi lesenele kuchaza ngalokugcwele tonkhe tintfo mayelana nelibandla laKhristu kute acondze, ngaphambi kwekudla sidlo seNkhosi nekucinisekiswa ngekubekwa tandla babonisi, kute tonkhe tintfo tentiwe ngeluhlelo.
69 Futsi emalunga ayawukhombisa embikwelibandla, nasembikwebabonisi, ngekutiphatsa ngekulunga, kutsi bakufanele loku, kute kube nemisebenti lemihle nelukholo ngekuvumelana nemibhalo lengcwele—bahamba ngebungcwele embikweNkhosi.
70 Lonkhe lilunga lelibandla laKhristu lelinebantfwana kufanele libaletse kubabonisi embikwelibandla, lokufanele babeke tandla etikwabo egameni laJesu Khristu, futsi ababusise egameni lakhe.
71 Kute namunye longemukelwa ebandleni laKhristu ngaphandle kwekutsi abe asafike eminyakeni yekwati kutiphendvulela embikwaNkulunkulu, futsi angakwati kuphendvuka.
72 Umbhabhatiso kufanele wentiwe ngalendlela lelandzelako kubo bonkhe labaphendvukako—
73 Lomuntfu lobitwe nguNkulunkulu futsi loneligunya lelisuka kuJesu Khristu lekubhabhatisa, uyawukwehlela emantini nemuntfu lotiletsile kutsi atawubhajatiswa, uyawutsi, ambita ngelibito: Ngekugunyatwa nguJesu Khristu, ngiyakubhabhatisa egameni laBabe, neleNdvodzana, nelaMoya loNgcwele. Amen.
74 Emvakwaloko uyawubese umcwilisa emantini, aphindze aphume emantini.
75 Kufanele kutsi libandla lihlangane njalo ndzawonye kutawudla sinkhwa neliwayini kukhumbula iNkhosi Jesu;
76 Umbonisi noma umphristi uyawukubusisa; futsi uyawukubusisa ngalendlela—uyawuguca nelibandla abite libito laBabe athandaze ngesizotsa, atsi:
77 Awu Nkhosi, Babe waPhakadze, siyakucela egameni leNdvodzana yakho, Jesu Khristu, kutsi ubusise uphindze ungcwelise lesi sinkhwa emiphefumulweni yabo bonkhe labo labasidlako; kute basidle njengesikhumbuto semtimba weNdvodzana yakho, futsi bakhombise kuwe, Awu Nkulunkulu, Babe waPhakadze, kutsi bayafisa kubitwa ngelibito leNdvodzana yakho, futsi bayikhumbule njalo, bagcine imiyaleto yayo leyibanikete yona, kute babe naMoya wayo njalo. Amen.
78 Indlela yekubusisa liwayini—uyawutsatsa sitja, atsi:
79 Awu Nkulunkulu, Babe waPhakadze, siyakucela, egameni leNdvodzana yakho, Jesu Khristu, kutsi ubusise uphindze ungcwelise leli liwayini emiphefumulweni yabo bonkhe labalinatsako, kute bakwente njengesikhumbuto sengati yeNdvodzana yakho, leyacitselwa bona; kute bakhombise kuwe, Awu Nkulunkulu, Babe waPhakadze, kutsi bayayikhumbula njalo, kute babe naMoya wayo njalo. Amen.
80 Noma nguliphi lilunga lelibandla laKhristu leliphambukako, noma lelitfolwa lenta lokungakalungi, kutawubhekwana nalo njengekusho kwemibhalo lengcwele.
81 Kuyawuba ngumsebenti walamabandla lehlukene, layincenye yelibandla laKhristu, kutfumela umfundzisi wabo munye noma ngetulu kuyawuhlanganyela emihlanganweni lemikhulu leyehlukene lebanjwa babonisi belibandla,
82 Neluhla lwemabito emalunga lehlukene latihlanganisa nelibandla kusukela emhlanganweni wekugcina; noma atfumele luhla ngemphristi lotsite; kute luhla loluhlala lugciniwe lwawo onkhe emabito emalunga alo lonkhe libandla agcinwe ebhukwini ngumunye webabonisi, loyo loyawukhetfwa ngulabanye babonisi ngetikhatsi letitsite;
83 Nekutsi, uma kukhona labacoshiwe ebandleni, kute emabito abo esulwe ebhukwini lelibandla lelikhulu lemabito.
84 Onkhe emalunga lasuka ebandleni lapho ahlala khona, aya ebandleni lapho angatiwa khona, angatsatsa incwadzi lecinisekisa kutsi angemalunga lafanele, nalahamba ngendlela lengiyo, sitifiketi leso lesingasayinwa ngunoma ngumuphi umbonisi noma umphristi uma lelo lunga lelitfola lencwadzi lijwayelene nalombonisi noma umphristi, noma ingasayinwa bafundzisi noma emadikhoni elibandla.