Sigaba 24
Sembulo lesaniketwa Joseph Smith umPhrofethi naOliver Cowdery,eHarmony, ePennsylvania, kuKholwane 1830. Namona bekungakapheli tinyanga letine liBandla, lisunguliwe kuhlushwa besekumatima, nebaholi bekufanele bafune kuphepha etindzaweni letikhweshile kwesikhashana. Letembulo letintsatfu letilandzelako taniketwa ngalesi sikhatsi kubacinisa, kubakhutsata, nekubafundzisa.
1–9, Joseph Smith ubitelwa kuhumusha, kushumayela, nekuchaza ngalokugcwele imibhalo lengcwele; 10–12, Oliver Cowdery ubitelwa kushumayela livangeli; 13–19, Umtsetfo lophatseleni netimangaliso, kucalekisa, kutsintsitsa lutfuli etinyaweni, nekuhamba ungakaphatsi sipatsi noma sikhwama uyembulwa.
1 Buka, wabitelwa futsi wakhetselwa kutsi ubhale iNcwadzi yaMormon, nasebufundisini bami; futsi ngikukhiphile etinhluphekweni takho, ngakuyala, kangangoba sewukhululiwe kuto tonkhe titsa takho, ukhululiwe nasemandleni aSathane nasebumnyameni!
2 Noko, angeke ucolelwe etiphambekweni takho; noko, hamba indlela yakho ungabe usona futsi.
3 Hlonipha umsebenti wakho; futsi emvakwekube sewuhlanyele emasimu akho wawavikela, hamba ngekushesha uye ebandleni eColesville, eFayette, naseManchester, bayawukusekela; futsi ngitawubabusisa ngekwamoya nangekwasemhlabeni;
4 Kodvwa uma bangakwemukeli, ngitawutfumela etikwabo sicalekiso esikhundleni sesibusiso.
5 Chubeka nekubita Nkulunkulu egameni lami, ubhale naletintfo lewutawuniketwa tona nguMdvudvuti, uphindze uchaze ngalokugcwele yonkhe imibhalo lengcwele ebandleni.
6 Utawuniketwa ngaleso sikhatsi lotawukukhuluma nalotawukubhala, futsi batawukuva, nakungenjalo ngitawutfumela kubo sicalekiso esinkhundleni sesibusiso
7 Ngoba uyawunikela wonkhe umsebenti wakho eSiyoni, futsi kuloku uyawuba nemandla
8 Beketela etinhluphekweni, ngoba usetawuba naletiningi; kodvwa tibeketelele, ngoba, buka, nginawe, kute kube sekugcineni kwemalanga akho.
9 Futsi emisebentini yasemhlabeni angeke ube nemandla, ngoba loku akusilo lubito lwakho. Naka lubito lwakho futsi uyawutfola naloko longahlonipha ngako umsebenti wakho, uchaze ngalokugcwele yonkhe imibhalo lengcwele, futsi uchubeke nekubeka tandla nekucinisekisa emalunga elibandla.
10 Futsi umnakenu Oliver kumele achubeke nekufakaza ngelibito lami embikwemhlaba, kanye nasebandleni. Futsi akukameli acabange kutsi angasho lokwanele kusekela umsebenti wami; buka, nginaye kute kube sekugcineni.
11 Ngami uyawuba neludvumo, hhayi ngekwakhe, noma asebutsakatsakeni noma asemandleni, noma ebugcilini noma ekukhululweni;
12 Ngato tonkhe tikhatsi, nakuto tonkhe tindzawo, utawuvula umlomo wakhe amemetele livangeli lami njengekukhala kwelicilongo, emini nasebusuku. Futsi ngitawumnika emandla langatange atiwe ngumuntfu.
13 Ningaceli timangaliso, ngaphandle uma ngitawuniyaleta, ngaphandle kwekukhipha emadimoni, kwelapha labagulako, nekumelana netinyoka letinebutsi, nekumelana nebutsi lobubulalanako.
14 Futsi leti tintfo angeke nitente, ngaphandle uma kufunwa kini ngulabo labakufisako, kute imibhalo lengcwele igcwaliseke; ngoba niyawukwenta njengoba kubhaliwe.
15 Futsi noma nguyiphi indzawo leniyawungena kuyo, banganemukeli egameni lami, niyawushiya sicalekiso esikhundleni sesibusiso, ngekutsintsitsa lutfuli lwetinyawo tenu ngekumelana nabo njengebufakazi, nihlante tinyawo tenu endleleni.
16 Futsi kuyawukwenteka kutsi noma ngubani loyawubeka tandla takhe etikwenu ngeludlame, niyawulayetela kutsi bashaywe egameni lami; futsi, buka, ngiyawubashaya ngekwemavi enu, ngesami sikhatsi lesifanele.
17 Futsi noma ngubani loyawuya emtsetfweni nani uyawucalekiswa ngumtsetfo.
18 Aniyikutsatsa sipatji noma sikhwama, noma tintfonga, nemabhantji lamabili, ngoba libandla liyawuninika ngaleso sikhatsi loko lenikudzingako mayelana nekudla netingubo, neticatfulo, imali, kanye nesikhwama.
19 Ngoba nibitelwe kutsena sivini sami ngekutsena lokunemandla, yebo, ngisho kwekugcina; yebo, kanye nabo bonkhe labo lenibabekile, futsi bayawukwenta njengalesi sifanekiso. Amen.