Sigaba 14
Sembulo lesaniketwa ngaJoseph Smith umPhrofethi kuDavid Whitmer, eFayette, eNew York, ngeNhlaba 1829. Umndeni wakaWhitmer besewunenshisekelo lenkhulu ekuhunyushweni kweNcwadzi yaMormon. UmPhrofethi wahlala ekhaya laPeter Whitmer lomDzala, lapho ahlala khona wate waphela umsebenti wekuhumusha, futsi kwate kwatfolakala nelilungelo lekushicilela incwadzi leyayitawukhicitwa. Emadvodzana lamatsatfu akaWhitmer, ngayinye itfole bufakazi beliciniso mayelana nalomsebenti, abanekukhatsateka lokukhulu mayelana nalobekufanele ngamunye akwente. Lesembulo lesi kanye naletimbili letilandzelako (tigaba 15 na 16) tatfolakala njengemphendvulo embutweni nge-Urimu neThumimu. David Whitmer muva waba ngulomunye waboFakazi labaTsatfu beNcwadzi yaMormon.
1–6, Tisebenti esivinini titawutfola insindziso; 7–8, Kuphila lokuphakadze kusipho lesikhulu kunato tonkhe tipho taNkulunkulu; 9–11, Khristu wadala emazulu nemhlaba.
1 Umsebenti lomkhulu nalomangalisako sewutawucala emkhatsini webantfwana bebantfu.
2 Buka, nginguNkulunkulu; naka livi lami, leliphilile futsi lelinemandla, lelikhalipha kwengca inkemba lesika ngetinhlangotsi totimbili, lisika lidzimate lehlukanise emalunga nemnkantja; ngako-ke naka emavi ami.
3 Buka, insimu seyimhlophe seyilungele kuvunwa; ngako-ke, noma ngubani lonesifiso sekuvuna, akajikijele lisikela lakhe ngemandla, avune kusesemini, kute abekele umphefumulo wakhe insindziso yaphakadze embusweni waNkulunkulu.
4 Yebo, noma ngubani lotawujikijela lisikela lakhe avune, nguye loyo lobitwe nguNkulunkulu.
5 Ngako-ke, uma atawucela kimi utawutfola; uma utawunconcotsa utawuvulelwa.
6 Tama kuletsa uphindze usungule iSiyoni yami. Gcina imiyaleto yami kuto tonkhe tintfo.
7 Futsi, uma ugcina imiyaleto yami uphindze ubeketele kute kube sekugcineni uyawuzuza kuphila lokuphakadze, lokusipho lesikhulu kunato tonkhe tipho taNkulunkulu.
8 Futsi kuyawukwenteka, kutsi uma ucela kuBabe egameni lami, unelitsemba ukholwa, uyawutfola Moya loNgcwele, lokunika lotawukusho, kute ukwati kuma njengafakazi ngetintfo loyawutiva naloyawutibona, nekutsi ushumayele kuphendvuka kulesi situkulwane.
9 Buka, nginguJesu Khristu, iNdvodzana yaNkulunkulu lophilako, leyadala emazulu nemhlaba, kukhanya lokungeke kwafihlwa ebumnyameni;
10 Ngaloko-ke, kumele ngiletse kuphelela kwelivangeli lami lisuka kubeTive liya endlini yaka-Israyeli.
11 Buka, unguDavid, futsi ubitiwe kutsi welekelele; lokuyintfo loyawutsi uma uyenta, futsi wetsembekile, uyawubusiswa ngekwamoya nangekwemhlaba, nemvuzo wakho uyawuba mkhulu. Amen.