Sigaba 9
Sembulo lesaniketwa ngaJoseph Smith umPhrofethi ku-Oliver Cowdery, eHarmony, ePennsylvania, kuMabasa 1829. Oliver uyalwa kutsi abeketele futsi uyancuswa kutsi anetiswe kubhala, kwanyalo, loko lokushiwo ngumhumushi, kunekwetama kuhumusha.
1–6, Leminye imibhalo yakadzeni isetawuhunyuswa; 7–14, INcwadzi yaMormon ihunyushwa ngekufundza nangekutfola siciniseko ngekwakamoya.
1 Buka, ngitsi kuwe, ndvodzana yami, njengoba awukahumushi njengaloko lobowukucelile kimi, futsi uphindze wacala kubhalela inceku yami, Joseph Smith, lomNcane, kanjalo-ke ngifisa kutsi uchubeke ute ucedze lombhalo, lengiwunike yena ngekumetsemba.
2 Futsi emvakwaloko, buka, leminye imibhalo nginayo, lengitawukunika emandla longawasebentisela kulekelela kuyihumusha.
3 Beketela, ndvodzana yami, ngoba kukuhlakanipha kimi, futsi akukafaneli kutsi uhumushe kulesi sikhatsi sanyalo.
4 Buka, umsebenti wena lobitelwe kuwenta kubhalela inceku yami Joseph Smith.
5 Futsi, buka, kungoba awuchubekanga njengoba ucalile, ngesikhatsi ucala kuhumusha, lokubange kutsi ngilitsatse lelilungelo kuwe
6 Ungavungami, ndvodzana yami, ngoba kukuhlakanipha kimi lokudale kutsi ngikuphatse ngalendlela.
7 Buka, awukacondzisisi; ucabange kutsi ngitawukunika lelilungelo, ekubeni ungatange utihluphe ngaphandle kwekucela kimi.
8 Kodvwa, buka, ngitsi kuwe, kufanele uzindle ngako engcondvweni yakho; bese ubuta kimi kutsi kulungile yini, uma kulungile ngiyawukwenta kutsi sifuba sakho sitsintseke ngekhatsi kuwe; ngako-ke, uyawukuva kutsi kulungile.
9 Kodvwa uma kungakalungi angeke ube naleyo mizwa, kodvwa uyawuba nemcabango longenangcondvo loyawukubangela kutsi ukukhohlwe loko lokuyintfo lengakalungi, ngako-ke, angeke ukwati kubhala loko lokungcwele ngaphandle kwekutsi unikwe ngimi.
10 Manje, kube bewukwati loku ngabe uhumushile; noko, akukafaneli kutsi uhumushe nyalo.
11 Buka, bekufanele ngesikhatsi ucala, kodvwa wesaba, futsi sikhatsi sesendlulile, akusafaneli nyalo;
12 Ngoba, awuboni yini kutsi nginike inceku yami Joseph emandla lenele, lakwatile ngawo kukhokhela sikhatsi lesilahlekile na? Futsi kute kini lengimlahlile.
13 Yenta loku lengikuyale ngako, uyawuphumelela. Tsembeka, ungasivumeli silingo.
14 Cina emsebentini lengikubitele kuwo, futsi angeke kulahleke ngisho lunwele lunye enhloko yakho, uyawuphakanyiswa ngelusuku lwekugcina. Amen.