Sigaba 41
Sembulo lesaniketwa ngaJoseph Smith umPhrofethi eBandleni, eKirtland, e-Ohio, mhlaka 4 iNdlovana 1831. Lesi sembulo siyala umPhrofethi kanye nebabonisi beliBandla kutsi bathandaze kute batfole “umtsetfo” waNkulunkulu (buka sigaba 42). Joseph Smith bekatsandza kufika eKirtland abuya eNew York, kwase kutsi Leman Copley, lobekalilunga leliBandla ahlala edvute nendzawo yaseThompson, e-Ohio, “wacela uMnakabo Joseph naSidney [Rigdon] …batawuhlala naye wase ubatsembisa kutsi bekatawubaniketa tindlu netidzingo.” Lesembulo lesilandzelako sicacisa kutsi ngukuphi lapho Joseph naSidney bekufanele bahlale khona futsi siphindze simayelana nekubitwa kwa-Edward Partridge kutsi abe nguMbhishobhi wekucala weliBandla.
1–3, Babonisi batawulawula liBandla ngemoya wesembulo; 4–6, Bafundzi beliciniso batawumukela baphindze bagcine umtsetfo weNkhosi; 7–12, Edward Partridge ubekwa njengembhishobhi eBandleni.
1 Lalelani futsi nive, Awu nine bantfu bami, kusho iNkhosi naNkulunkulu wenu, nine lengitfokotela kunibusisa ngetibusiso letinkhulu kunato tonkhe tibusiso, nine leningivako; futsi nine leningangiva ngitawunicalekisa, nine lenivuma libito lami ngemlomo, ngaletimatima kunato tonkhe ticalekiso.
2 Lalelani, Awu nine babonisi belibandla lami lenginibitile, bukani, ngininika umyaleto, wekutsi niyawubutsana ndzawonye kute nivumelane ngelivi lami;
3 Futsi ngemithandazo yelukholo lwenu niyawutfola umtsetfo wami, kute nati kutsi niyawulilawula kanjani libandla lami niphindze nente tonkhe tintfo kahle phambi kwami.
4 Ngitawuba ngumbusi wenu ngesikhatsi ngibuya, bukani, ngiyabuya masinyane, futsi niyawubona kutsi umtsetfo wami uyagcinwa.
5 Loyo lowemukela umtsetfo wami aphindze awente, nguye kanye longumfundzi wami; kodvwa loyo lotsi uwemukelile kodvwa angawenti, nguye kanye longasiye umfundzi wami, futsi uyawususwa emkhatsini wenu;
6 Ngoba akulungi kutsi tintfo letitebantfwana bembuso tiniketwe labo labangakafaneli, noma tinja, noma ematje laligugu alahlwe etihhontjini.
7 Ngetulu kwaloko, kufanele kutsi inceku yami Joseph Smith, lomNcane, abe nendlu leyakhiwe, kute atawuhlala kuyo ahumushe.
8 Ngetulu kwaloko, kufanele kutsi inceku yami Sidney Rigdon, itiphatse njengekutsandza kwayo, nangabe igcina imiyaleto yami
9 Ngetulu kwaloko, ngibite inceku yami Edward Partridge; futsi nginika umyaleto, wekutsi abekwe ngelivi lelibandla, futsi abekwe abe ngumbhishobhi ebandleni, kute ashiye lokutsengiswako kwakhe acitse sonkhe sikhatsi sakhe emisebentini yelibandla;
10 Kubuketa tonkhe tintfo njengoba kuyawuncunyelwa kuye emitsetfweni yami ngelilanga lengiyawuyinika ngalo.
11 Futsi loku kungenca yekutsi inhlitiyo yakhe imsulwa phambi kwami, ngoba ufana na-Nathanayeli wakudzala, lekute bucili kuye.
12 Lamavi aniketwa nine, futsi amsulwa phambi kwami; ngaloko-ke, caphelani kutsi niwaphatsa kanjani, ngoba nitawuphendvula emiphefumulweni yenu ngelilanga lekwehlulela. Kunjalo nje. Amen.