Sigaba 19
Sembulo lesaniketwa ngaJoseph Smith, eManchester, eNew York, cishe ehlobo langemnyaka wa 1829. Emlandvweni wakhe, lesembulo umPhrofethi usatisa “njengemyaleto waNkulunkulu lokungesiwo wemuntfu, kuMartin Harris, loniketwe nguloyo longunaPhakadze.”
1–3, Khristu unawo onkhe emandla; 4–5, Bonkhe bantfu kumele baphendvuke noma beve buhlungu; 6–12, Sijeziso saphakadze sijeziso saNkulunkulu; 13–20, Khristu wahluphekela bonkhe bantfu, kute bangeva buhlungu uma baphendvuka; 21–28, Shumayela livangeli lekuphendvuka; 29–41, Yatisa ngetindzaba letimnandzi.
1 Ngingu-Alfa na-Omega, Khristu iNkhosi; yebo, impela nginguye lucobo, sicalo nesiphetfo, uMhlengi wemhlaba.
2 Mine, sengiyentile futsi ngayifeza intsandvo yakhe loyo lengiwakhe, ngisho Babe, mayelana nami—sengikwentile loku kute ngitfobise tonkhe tintfo tibe ngaphansi kwami—
3 Ngigcine onkhe emandla, ekubhubhisa Sathane nemisebenti yakhe ekupheleni kwemhlaba, nalelikhulu lilanga lekugcina lekwehlulela, lengiyawuliletsa kubantfu bawo, ngehlulela wonkhe umuntfu ngekwemisebenti yakhe netento lakatentile.
4 Futsi noma kanjani wonkhe umuntfu kufanele aphendvuke noma eve buhlungu, ngoba mine, Nkulunkulu, anginasiphetfo.
5 Ngaloko-ke, angisihocisi sehlulelo lengiyawusikhipha, kodvwa lusizi luyawutfunyelwa, kukhala, kuhhewula nekugedletela kwematinyo, yebo, kulabo labatfolakala bangesencele sami.
6 Noko, akukabhalwa kutsi ngeke kube nesiphetfo kulobu buhlungu, kodvwa kubhalwe kutsi lobungapheli buhlungu.
7 Ngetulu kwaloko, kubhalwe kutsi kulahlwa kwaphakadze; ngaloko-ke kugcame kakhudlwana kunaleminye imibhalo lengcwele, kute kusebente etinhlitiyweni tebantfwana bebantfu, ngenhloso yekudvumisa libito lami ngalokuphelele.
8 Ngaloko-ke, ngitawunichazela lemfihlakalo, ngoba nifanele kwati njengebaphostoli bami.
9 Ngikhuluma nani nine lenikhetsiwe kuloku, njengaloyedvwa, kute ningene ekuphumuleni kwami.
10 Ngoba, bukani, imfihlakalo yebunkulunkulu, yinkhulu kangakanani! Ngoba, bukani, anginasiphetfo, futsi sijeziso lesiphuma esandleni sami sijeziso lesingenasiphetfo, ngoba longenaSiphetfo libito lami. Ngaloko-ke—
11 Sijeziso saphakadze sijeziso saNkulunkulu.
12 Sijeziso lesingenasiphetfo saNkulunkulu.
13 Ngaloko-ke, ngikuyaleta kutsi uphendvuke, futsi ugcine imiyaleto loyitfolile ngenceku yami Joseph Smith, lomNcane egameni lami.
14 Futsi uyitfole ngemandla ami lamakhulu;
15 Ngako-ke ngikuyaleta kutsi uphendvuke—phendvuka, kungenjalo ngitawukushaya ngendvuku yemlomo wami, nangelulaka lwami, nangentfukutselo yami, futsi kuva kwakho buhlungu kube kukhulu—buhlungu lobungakanani awati, kutsi kukhulu kangakanani awati, yebo, kutsi bumatima kangakanani kukubeketelela awati.
16 Ngoba buka, mine, Nkulunkulu, ngibahluphekele bonkhe kuleti tintfo, kute bangabuva buhlungu uma baphendvuka;
17 Kodvwa uma bangaphendvuki kufanele beve buhlungu njengami;
18 Loko kuva buhlungu lokwenta mine, ngisho Nkulunkulu lucobo, lomkhulu kunabo bonkhe, ngichachatele ngenca yebuhlungu, futsi ngophe kuto tonkhe timbobo temtimba, ngive buhlungu emtimbeni nasemoyeni— futsi bengifisa kutsi ngingayinatsi leyondzebe lebabako, ngifinyele.
19 Noko, ludvumo alube kuBabe, futsi nganatsa ngacedza emalungiselelo ami kute kuzuze bantfwana bebantfu.
20 Ngaloko-ke, ngiyakuyaleta futsi kutsi uphendvuke, kungenjalo ngitawukutfobisa ngemandla ami lamakhulu; nekutsi uvume tono takho, kungenjalo utawuva buhlungu baleti tijeziso lesengikhulume ngato, lokuncane kwako, yebo, ngisho lokuncane lose uke wakuva ngesikhatsi ngisusa Moya wami.
21 Futsi ngiyakuyaleta kutsi ungashumayeli lokunye ngaphandle kwekuphendvuka, ungatikhombisi leti tintfo kubantfu kute kube kuhlakanipha kimi.
22 Ngoba basengakakulungeli kudla lokucinile, kodvwa lubisi lekufanele balutfole; ngaloko-ke, akukafaneli batati leti tintfo, funa babhubhe.
23 Fundza kimi, ulalele nemavi ami; hamba ngebumnene baMoya wami, utawuba nekuthula kimi.
24 NginguJesu Khristu; ngeta ngentsandvo yaBabe, futsi ngenta intsandvo yakhe.
25 Ngetulu kwaloko, ngiyakuyaleta kutsi ungamfisi umfati wamakhelwane wakho, noma ufise kubulala makhelwane wakho.
26 Ngetulu kwaloko, ngiyakuyaleta kutsi ungayigodli imphahla yakho, kodvwa nika incenye yayo kute kukhicitwe iNcwadzi yaMormon, lecuketse liciniso nelivi laNkulunkulu—
27 Lokulivi lami kubeTive, kute masinyane liye kumaJuda, emaLamani layinsali yawo, kute akholwe livangeli, futsi angalindzeli Mesiya losetawukuta losekavele afikile.
28 Etikwaloko, ngiyakuyaleta kutsi uyawuthandaza kuvakala nangenhlitiyo; yebo, phambi kwebantfu nasekusitsekeni, phambi kwebantfu nangasese.
29 Futsi uyawushumayela tindzaba letimnandzi, yebo, yatisa ngato etikwetintsaba, nakuto tonkhe tindzawo letiphakeme, nasemkhatsini wabo bonkhe labantfu loyawuvunyelwa kubabona.
30 Futsi uyawukwenta loko ngako konkhe kutitfoba, utsembele kimi, ungabetfuki labo labakwetfukako.
31 Futsi mayelana netimfundziso tenkholo ungakhulumi ngato, kodvwa uyawushumayela kuphendvuka nelukholo kuMsindzisi, nangekutsetselelwa kwetono ngekubhajatiswa, nangemlilo, yebo, ngisho nangaMoya loNgcwele.
32 Buka, lona ngumyaleto lomkhulu newekugcina lengiyawukunika wona mayelana naloludzaba; ngoba loku kuyawukwenela kuhamba kwakho imihla ngemihla, kute kube sekupheleni kwemphilo yakho.
33 Futsi lusizi uyawuluva uma ungayinaki lemiyalo, yebo, ngisho nekufa kwakho nekonakaliswa kwemphahla yakho.
34 Nika incenye yemphahla yakho, yebo, ngisho nangencenye yemhlaba wakho, nangako konkhe ngaphandle kwaloko kwekondla umndeni wakho.
35 Khokha sikweleti lovumelene ngaso nemkhiciti wetincwadzi. Tikhulule ebugcilini.
36 Shiya indlu nelikhaya lakho, ngaphandle uma ufisa kubona umndeni wakho;
37 Khuluma ngekukhululeka kubo bonkhe; yebo, shumayela, ukhutsate, umemetele liciniso, ngisho nangelivi lelikhulu, ngelivi lenjabulo, umemetele utsi—Hosana, hosana, libusisiwe libito leNkhosi Nkulunkulu!
38 Thandaza njalo, ngitawutfulula Moya wami etikwakho, futsi siyawuba sikhulu sibusiso sakho—yebo, ngisho nangetulu kwekutfola umcebo welive nekonakala kwekulunga lokuhambisana nawo.
39 Buka, ungakufundza yini loku ungabi nako kutfokota nekujabula enhlitiyweni yakho ngenca yenjabulo na?
40 Noma ungagijima sikhatsi lesidze njengemholi longaboni na?
41 Noma ungatitfoba ube mnene, futsi utiphatse ngekuhlakanipha ngaphambi kwami? Yebo, wota kimi uMsindzisi wakho. Amen.