Sigaba 28
Sembulo lesaniketwa ngaJoseph Smith umPhrofethi ku-Oliver Cowdery, eFayette, eNew York, ngeNyoni 1830. Hiram Page, lilunga leliBandla, bekanelitje lelitsite labekatsi liyamsita kutfola tembulo mayelana nekwakhiwa kweSiyoni neluhlelo lweliBandla. Emalunga lamaningana bekakhohliswe nguleti tinsolo, futsi ngisho na-Oliver Cowdery watfonywa ngalokungakalungi ngaloko. Ngaphambi nje kwemhlangano lowawutawuba khona, umPhrofethi wabuta ngalokukhulu kutitfoba eNkhosini mayelana naloludzaba, kwase kulandzela lesembulo lesi.
1–7, Joseph Smith uphetse tikhiya tetimfihlakalo, futsi nguye kuphela lotfola tembulo teliBandla; 8–10, Oliver Cowdery kufanele ashumayele kumaLamani; 11–16, Sathane wakhohlisa Hiram Page wamnika tembulo letingemanga.
1 Buka, ngitsi kuwe, Oliver, kutawuniketwa kuwe kutsi libandla likulalele kuto tonkhe tintfo noma ngabe yini loyawubafundzisa yona ngeMdvudvuti, mayelana netembulo nemiyaleto lengiyiniketile.
2 Kodvwa, buka, ngicinisile, ngicinisile, ngitsi kuwe, kute namunye loyawukhetfwa kutsi atfole imiyaleto netembulo kuleli libandla ngaphandle kwaJoseph Smith, lomNcane, njengoba naMosi atitfola.
3 Futsi uyawumlalela etintfweni lengiyawumnika tona, njenga-Aroni, kushumayela imiyaleto netembulo ngekwetsembeka, ngemandla nangeligunya ebandleni.
4 Futsi uma uholwa nguMdvudvuti nanoma ngusiphi sikhatsi kutsi ukhulume noma ufundzise, noma ngetikhatsi tonkhe ngendlela yemyaleto ebandleni, ungakwenta.
5 Kodvwa awuyikubhala ngekwemyaleto, kodvwa ngenhlakanipho;
6 Futsi ungamyali loyinhloko yakho, naloyinhloko yelibandla;
7 Ngoba ngimnike tikhiya tetimfihlakalo, netembulo letivaliwe, ngite ngibakhetsele lomunye esikhundleni sakhe.
8 Manje, buka, ngitsi kuwe uyawukuya kumaLamani ushumayele livangeli lami kubo; futsi nangabe batemukela timfundziso takho uyawukwenta libandla lami lakhiwe emkhatsini wabo; uphindze utfole tembulo, kodvwa ungatibhali ngendlela yemlayeto.
9 Manje, buka, ngitsi kuwe akukembulwa, futsi kute umuntfu lowatiko kutsi lidolobha iSiyoni liyawukwakhiwa kuphi, kodvwa kuyawukwembulwa esikhatsini lesitako. Buka, ngitsi kuwe liyawuba seminceleni ngakumaLamani.
10 Ungahambi kulendzawo kute kube semvakwemhlangano; futsi inceku yami Joseph uyawukhetfwa kute engamele lomhlangano ngelivi labo, futsi konkhe lakusho kuwe uyawukukhuluma.
11 Ngetulu kwaloko, uyawuhlangana nemnakenu, Hiram Page, ninobabili, umtjele kutsi leti tintfo latibhalile latitsetse kulelo litje atisuki kimi nekutsi Sathane umkhohlisile;
12 Ngoba, buka, leti tintfo akamiselwa tona, futsi kute lutfo lokuyawumiswa kunoma nguliphi laleli libandla ngalokuphambene netivumelwano telibandla.
13 Ngoba tonkhe tintfo kufanele tentiwe ngeluhlelo, nangekuvumelana ebandleni, ngemthandazo wekukholwa.
14 Uyawulekelela kucatulula tonkhe leti tintfo, ngekwetivumelwano telibandla, ngaphambi kwekutsi utsatse luhambo lwakho emkhatsini wemaLamani.
15 Futsi kuyawukwembulwa kuwe ngesikhatsi uhamba, kute kube sikhatsi loyawubuya ngaso, loyawukwenta.
16 Futsi kufanele uvule umlomo wakho ngaso sonkhe sikhatsi, umemetele livangeli lami ngemsindvo wenjabulo. Amen.