Sigaba 31
Sembulo lesaniketwa ngaJoseph Smith umPhrofethi kuThomas B. Marsh, ngeNyoni 1830. Lesenteko salandzela masinyane nje emvakwemhlangano weliBandla (buka sihloko sesigaba 30) Thomas B. Marsh bekabhajatisiwe ekucaleni kwenyanga futsi abekwe ngenjembonisi eBandleni ngaphambi kwekutsi kuniketwe lesembulo.
1–6, Thomas B. Marsh ubitelwa kutsi utawushumayela livangeli futsi uyacinisekiswa ngenhlalakahle yemndeni wakhe; 7–13, Uyayalwa kutsi abeketele, athandaze njalo, aphindze alandzele uMdvudvuti.
1 Thomas, ndvodzana yami, ubusisiwe ngenca yelukholo lwakho emsebentini wami.
2 Buka, ube netinhlupheko letiningi ngenca yemndeni wakho; noko, ngitawukubusisa wena nemndeni wakho, yebo, nebantfwana bakho; futsi lilanga liyeta lapho batawukholwa futsi balati liciniso baphindze babemunye nawe ebandleni lami.
3 Tfokota uphindze ujabule, ngoba lihora lemsebenti wakho wekufundzisa livangeli lifikile; nelulwimi lwakho luyawuchacheka, futsi uyawumemetela tindzaba letimnandzi tentfokoto lenkhulu kulesi situkulwane.
4 Uyawumemetela tintfo letembulwe encekwini yami Joseph Smith, lomNcane. Utawucala kushumayela kusukela nyalo kuya phambili, yebo, kuvuna ensimini leseyimhlophe leseyilungele kushiswa.
5 Ngaloko-ke, jikijela lisikela lakho ngawo wonkhe umphefumulo wakho, tono takho titsetselelwe, futsi utawetfwala titfungo emhlane wakho, ngoba tisebenti kufanele titfole umvuzo wato. Ngaloko-ke, umndeni wakho utawuphila.
6 Buka, ngicinisile ngitsi kuwe, suka kubo kwesikhashana nje, ushumayele livi lami, ngitawubalungiselela indzawo yekuhlala.
7 Yebo, ngitawuvula tinhlitiyo tebantfu, futsi batawukwemukela. Ngitawusungula libandla ngawe;
8 Futsi uyawubacinisa ubalungiselele sikhatsi lapho batawugcogcwa khona.
9 Beketela etinhluphekweni, ungabetfuki labo labakwetfukako. Busa indlu yakho ngebumnene futsi ucine.
10 Buka, ngitsi kuwe uyawuba ngumelaphi ebandleni, kodvwa hhayi emhlabeni, ngoba angeke bakwemukele.
11 Hamba uye noma ngukuphi lapho ngitawukutfumela khona, utawukwembulelwa nguMdvudvuti kutsi utawukwentani nekutsi utawuya kuphi.
12 Thandaza njalo, funa ungene ekulingweni ulahlekelwe ngumvuzo wakho.
13 Tsembeka kute kube sekugcineni, buka, nginawe. Lawa mavi akaphumi kumuntfu noma kubantfu, kodvwa ngewami, ngisho Jesu Khristu, uMhlengi, ngentsandvo yaBabe. Amen.