Sigaba 57
Sembulo lesaniketwa ngaJoseph Smith umPhrofethi, eSiyoni, esifundzeni saseJackson, eMissouri, mhlaka 20 kuKholwane 1831. Ngekuvumelana nemyaleto weNkhosi wekutsi bahambe baye eMissouri, lapho yayitakwembula khona “lelive lelifa lenu” (sigaba 52), babonisi bebahambe besuka e-Ohio baya emnceleni longasenshonalanga eMissouri. Joseph Smith wacabanga ngesimo semaLamani wase sewuyatibuta kutsi: “Litawuchakaza nini lihlane njengembali na? ISiyoni iyawukwakhiwa nini ibe senkhatimulweni yayo, futsi liyawukuma kuphi lithempeli Lakho, lapho khona tonkhe tive tiyakuya khona ngetikhatsi tekugcina na?” Emvakwaloko watfola lesi sembulo.
1–3, E-Independence, eMissouri, yindzawo yeLidolobha laseSiyoni nelithempeli; 4–7, LabaNgcwele kufanele batsenge imihlaba baphinndze batfole emafa kuleyo ndzawo; 8–16, Sidney Gilbert kufanele asungule sitolo, William W. Phelps kufanele abe ngumkhiciti wetincwadzi bese kutsi Oliver Cowdery kufanele ahlele lokubhaliwe lokutawukhishelwa bantfu.
1 Lalelani, Awu nine babonisi belibandla lami, kusho iNkhosi Nkulunkulu wenu, nine lenibutsene ndzawonye, ngekwemiyaleto yami, kulelive, lekulive laseMissouri, lekulive lengilikhetsile ngaphindze ngalingcwelisela kugcogcwa kwalabangcwele.
2 Ngaloko-ke, leli live lesetsembiso, nendzawo yelidolobha laseSiyoni.
3 Futsi naku lokushiwo yiNkhosi Nkulunkulu wenu, uma nifisa kutfola kuhlakanipha naku kuhlakanipha. Bukani, lendzawo leseyibitwa manje ngekutsi yi-Independence yindzawo lesekhatsi nendzawo; nendzawo yelithempeli ingasenshonalanga, etikwencenye yemhlaba longasiwo khashane nenkantolo.
4 Ngaloko-ke, kukuhlakanipha kutsi umhlaba kufanele utsengwe ngulabangcwele, nayo yonkhe incenye yemhlaba lengasenshonalanga, kute kube semnceleni lohamba ucondze emkhatsini wemaJuda nebeTive;
5 Kanjalo nayo yonkhe incenye yemhlaba emnceleni wematsafa, nangabe bafundzi bami bavunyelwa kutsi batsenge imihlaba. Bukani, loku kukuhlakanipha, kutsi bayitfole kute ibe lifa laphakadze.
6 Futsi inceku yami Sidney Gilbert ayitsatse sikhundla lengiyibeke kuso, kwemukela timali, kuba sitfunywa selibandla, kutsenga umhlaba kuto tonkhe tifundza letisedvute, nangabe kungenteka ngekulunga, nangekucondziswa kuhlakanipha.
7 Nenceku yami Edward Partridge ayitsatse sikhundla lengiyibeke kuso, yehlukanisele labangcwele lifa labo, njengoba ngiyaletile; nalabo leyibakhetsile kutsi bayilekelele.
8 Ngetulu kwaloko, ngicinisile ngitsi kini, inceku yami Sidney Gilbert ayibekwe kulendzawo, isungule sitolo, kute itsengise imphahla ngaphandle kwemgunyati, kute itfole imali yekutsenga imihlaba kute kuzuze labangcwele, nekutsi itfole nanoma yini bafundzi labayidzingako kutsi bahlale efeni labo.
9 Nenceku yami Sidney nayo ayitfole imvumo—bukani naku kuhlakanipha, futsi loyo lofundzako akacondze—kute atfumele imphahla futsi kubantfu, ngisho nangalabo langatsandza kutfumela ngabo njengabomabhalane labacashiwe kumsita;
10 Futsi ngaleyo ndlela ondle labangcwele bami, kute livangeli lami lishunyayelwe kulabo labahleli ebumnyameni futsi naseveni nasetfuntini lekufa.
11 Ngetulu kwaloko, ngicinisile ngitsi kini, inceku yami William W. Phelps ayibekwe kulendzawo, futsi ibekwe njengemkhiciti wetincwadzi welibandla.
12 Futsi buka, uma umhlaba uyemukela imibhalo yakhe—buka naku kuhlakanipha—akatfole noma ngayini langayitfola ngekulunga, kute kuzuze labangcwele.
13 Futsi inceku yami Oliver Cowdery ayimsite, njengoba ngiyaletile, kunoma nguyiphi indzawo lengiyawumbeka kuyo, kwenta umfanekiso, kulungisa, nekukhetsa, kute tonkhe tintfo tilunge phambi kwami, njengoba tiyawukhonjiswa nguMoya ngaye.
14 Futsi labo lengikhulume ngabo abahlanyelwe eveni laseSiyoni, ngekushesha kangangoba kungenteka, nemindeni yabo, kute bente leto tintfo njengoba sengikhulumile.
15 Manje ngalokuphatselene nekubutsana—Umbhishobhi nesitfunywa abente emalungiselelo aleyo mindeni leyaletiwe kutsi ite kulendzawo, ngekushesha, kangangoba kungenteka, babekwe esabelweni sabo.
16 Kulabo labasele babonisi nemalunga leminye imiyaleto itawuniketwa emvakwaloku. Kunjalo nje. Amen.