Sigaba 43
Sembulo lesaniketwa ngaJoseph Smith umPhrofethi, eKirtland, e-Ohio, ngeNdlovana 1831. Ngalesi sikhatsi lamanye emalunga eliBandla bekaphatamiswe bantfu labebatenta bembuli. UmPhrofethi wabuta iNkhosi wase utfola lomlayeto lowawubhekiswe kubabonisi beliBandla. Incenye yekucala imayelana netindzaba tekuphatfwa kweliBandla; incenye yekugcina icuketse secwayiso babonisi lekufanele basinike tive temhlaba.
1–7, Tembulo nemiyaleto kuta kuphela ngaloyo lokhetsiwe; 8–14, LabaNgcwele bangcweliswa ngekwenta bonkhe bungcwele phambi kweNkhosi; 15–22, Babonisi batfunyelwa kutsi bashumayele kuphendvuka nekutsi balungiselele bantfu lilanga lelikhulu leNkhosi; 23–28, INkhosi ibita bantfu ngelivi Layo lucobo nangemandla emvelo; 29–35, Iminyaka letiNkhulungwane nekuboshwa kwaSathane kutawufika.
1 Awu lalelani, nine babonisi belibandla lami, nibeke indlebe emavini lengitawuwakhuluma kini.
2 Ngoba bukani, ngicinisile, ngicinisile, ngitsi kini, niniketwe umyaleto njengemtsetfo ebandleni lami, ngaloyo lengimkhetsele nine kutfola imiyaleto netembulo esandleni sami.
3 Futsi loku niyawukwati ngekuciniseka—kutsi kute lomunye lokhetselwe nine kutsi atfole imiyaleto netembulo ate atsatfwe yiNkhosi, uma ahlala kimi.
4 Kodvwa ngicinisile, ngicinisile, ngitsi kini, kute lomunye loyawukhetselwa lesi sipho ngaphandle uma kungaye; ngoba uma sitsatfwa kuye angeke abe nemandla ngaphandle kwekubeka lomunye esikhundleni sakhe.
5 Loku kuyawuba ngumtsetfo kini, kutsi ningemukeli timfundziso tanoma ngubani loyawuta phambi kwenu njengetembulo noma imiyaleto;
6 Futsi loku ngininika kona kute ningakhohliswa, kute nati kutsi atisito tami.
7 Ngoba ngicinisile ngitsi kini, loyo lobekwe ngimi uyawungena ngelisango futsi abekwe njengoba nginitjelile phambilini, kufundzisa leto tembulo lenititfolile naleniyawutitfola ngaye loyo lengimkhetsile.
8 Manje, bukani, ngininiketa umyaleto, wekutsi uma nihlangene ndzawonye niyawufundzisana niphindze nakhane, kute nati kutsi nitawutiphatsa kanjani nekutsi nitawulihola kanjani libandla lami, kutsi nitawukwenta kanjani mayelana netincenye temtsetfo nemiyaleto yami lengininikete yona.
9 Ngaleyo ndlela niyawufundziswa emtsetfweni welibandla lami, ningcweliswe nguloko lenikutfolile, futsi niyawutibopha kutsi nitiphatse ngabo bonkhe bungcwele phambi kwami—
10 Kute kutsi nangabe nikwenta loku, inkhatimulo iyawukwengetwa embusweni leseniwutfolile. Nangabe ningakwenti, kutawutsatfwa, ngisho naloko lesenikutfolile.
11 Buhlanteni bubi lobusemkhatsini wenu; tingcweliseni phambi kwami;
12 Futsi uma nifisa tinkhatimulo tembuso, khetsani inceku yami Joseph Smith, lomNcane, nimsekele phambi kwami ngemthandazo welukholo.
13 Ngetulu kwaloko, ngitsi kini, uma nifisa timfihlakalo tembuso, mnikeni kudla netingubo, nako konkhe lakudzingako kute afeze umsebenti lengimyalete ngawo;
14 Futsi uma ningakwenti utawuhlala nalabo labamemukele, kute ngitigcinele bantfu labamsulwa phambi kwami.
15 Ngetulu kwalo ngitsi, lalelani nine babonisi belibandla lami, lenginikhetsile: Anikatfunyelwa kutsi nifundziswe, kodvwa kutsi nifundzise bantfwana bebantfu tintfo lengitibeke etandleni tenu ngemandla aMoya wami;
16 Kufanele nifundziswe kusuka ezulwini. Tingcweliseni niyawuphiwa emandla, kute ninike ngisho njengoba sengikhulumile,
17 Lalelani, ngoba, bukani, lilanga lelikhulu leNkhosi selisondzele.
18 Ngoba lilanga liyeta lapho iNkhosi iyawukhuluma livi layo leliphuma ezulwini; emazulu ayawunyakata nemhlaba uyawutfutfumala, nelicilongo laNkulunkulu liyawukhala sikhatsi lesidze futsi likhale kakhulu, liyawutsi etiveni letilele: Nine labangcwele vukani niphile; nine toni hlalani nilale ngite ngibuye futsi.
19 Ngaloko-ke bophani tinkhalo tenu funa nitfolakale emkhatsini walababi.
20 Phakamisani emavi enu ningatibambi. Bitani tive kutsi tiphendvuke, labadzala nalabancane, lababoshiwe nalabakhululekile, nitsi: Tilungiseleleni lilanga lelikhulu leNkhosi;
21 Ngoba uma mine, lengiyindvodza, ngiphakamisa livi lami nginibita kutsi niphendvuke, ningizonda, niyawutsini ngesikhatsi lilanga lifika lapho kudvuma kuyawuvakalisa emavi ako kusukela emikhawulweni yemhlaba, kukhuluma etindlebeni tabo bonke labaphilako, kutsi—Phendvukani, nilungiselele lilanga lelikhulu leNkhosi na?
22 Yebo, ngetulu kwaloko, ngesikhatsi imibani iyawumanyata kusukela emphumalanga kuya enshonalanga, futsi iyawuvakalisa emavi ayo kubo bonkhe labaphilako, yente tindlebe tabo bonkhe labevako tilume, isho lamavi—Phendvukani, ngoba lilanga lelikhulu leNkhosi selifikile na?
23 Ngetulu kwaloko, iNkhosi iyawukhuluma livi layo lelisuka ezulwini, itsi: Lalelani, Awu nine tive temhlaba, nive emavi aloyo Nkulunkulu lowanidala.
24 Awu, nine tive temhlaba, kukangaphi ngifisa kunibutsela ndzawonye njengesikhukhukati sifukamela emantjwele aso ngaphansi kwetimphiko taso, kodvwa anitange ningivumele!
25 Kukangaki nginibita ngemlomo wetinceku tami, nangekusetjentelwa tingilosi, nangelivi lami, nangelivi lekudvuma, nangelivi lemibani, nangelivi letiphepho, nangelivi lekutamatama kwemhlaba, neletangcotfo letinkhulu, nangelivi lendlala nangabomashayabhuce wetifo letitinhlobonhlobo, nangemsindvo lomkhulu welicilongo, nangelivi lekwehlulela, nangelivi lemusa lilanga lonkhe, nangelivi lenkhatimulo neludvumo nengcebo yemphilo yaphakadze, futsi bengiyawunisindzisa ngensindziso yaphakadze, kodvwa anitange ningivumele!
26 Bukani, lilanga selifikile, lapho indzebe yelulaka lwentfukutselo yami seyigcwele.
27 Bukani, ngicinisile ngitsi kini, lawa ngemavi eNkhosi Nkulunkulu wenu.
28 Ngaloko-ke sebentani, sebentani esivinini sami kwekugcina—kwekugcina bitani bantfu basemhlabeni.
29 Ngoba ngesami sikhatsi lesifanele ngitawubuya emhlabeni ngitawukwehlulela, futsi bantfu bami bayawuhlengwa baphindze babuse nami emhlabeni.
30 Ngoba imiNyaka letiNkhulungwane, lengikhulume ngayo ngemlomo wetinceku tami, iyawufika.
31 Ngoba Sathane uyawuboshwa, futsi ngesikhatsi sekakhululiwe futsi uyawubusa kwesikhashana kuphela.
32 Loyo lophila ngekulunga uyawuguculwa ngekuphatima kweliso, nemhlaba uyawukwendlula kanjalo njengemlilo.
33 Nalababi bayawuhamba baye emlilweni longacimeki, nesiphetfo sabo kute umuntfu losatiko emhlabeni, naloyawuke asati, bate bafike phambi kwami ekwehlulelweni.
34 Lalelani lamavi. Bukani, nginguJesu Khristu, uMsindzisi wemhlaba. Gcinani leti tintfo etinhlitiyweni tenu, vumelani tintfo letinesizotsa taphakadze tihlale etingcodvweni tenu.
35 Banini nesizotsa. Gcinani yonkhe imiyaleto yami. Kunjalo nje. Amen.