Sigaba 45
Sembulo lesaniketwa ngaJoseph Smith umPhrofethi eBandleni, eKirtland, e-Ohio, mhlaka 7 ngenyanga yeNdlovulenkhulu 1831. Kwendvulela kubhalwa kwalesi sembulo, umlandvo waJoseph Smith utsi “kulesi sikhatsi seliBandla …imibiko leminingi lengemanga …netindzaba letibuwula tatiswa kubantfu bonkhe …tasabalaliswa, …ngenhloso yekuvimbela bantfu kutsi baphenye lomsebenti, noma bemukele lenkholo. … Kodvwa kute kujabule labaNgcwele, … nganiketwa loku lokulandzelako”
1–5, Khristu ungummeli wetfu kuBabe; 6–10, Livangeli lisitfunywa kulungisa indlela phambi kweNkhosi; 11–15, Enoki nabomnakabo bemukelwa yiNkhosi; 16–23, Khristu wembula tibonakaliso tekubuya Kwakhe njengoba taniketwa eNtsabeni yeMincumo; 24–38, Livangeli litawubuyiselwa, tikhatsi tebeTive titawugcwaliseka, nesifo lesibhubhisako sitawugcwala eveni; 39–47, Tibonakaliso, timangaliso, neKuvuka kuyawuba khona ngeKubuya kwesiBili; 48–53, Khristu utawukuma etikwentsaba yeMincumo, nemaJuda atawubona emanceba etandleni nasetinyaweni Takhe; 54–59, INkhosi itawubusa ngesikhatsi semiNyaka letiNkhulungwane; 60–62, UmPhrofethi uyaletwa kutsi acale kuhumusha liThestamente leLisha, lokutawukwatiswa ngalo lwati lolubalulekile; 63–75, LabaNgcwele bayaletwa kutsi babutsane futsi bakhe iJerusalema leNsha, lokutawuta kuyo bantfu betive tonkhe.
1 Lalelani, Awu nine bantfu belibandla lami, leniphiwe umbuso; lalelani nibeke indlebe kuye lowabeka sisekelo semhlaba, lowenta emazulu nako konkhe lokukuwo, nangaye lokwentiwa tonkhe tintfo letiphilako, naletihambako, naletikhona.
2 Ngetulu kwaloko, ngitsi, lalelani livi lami, funa kufa kunincobe; ngesikhatsi leningasicabangi kutsi lihlobo liyawuphela, nekuvuna kuphele, nemiphefumulo yenu ingakasindziswa.
3 Lalelani yena longummeli kuBabe, lomele licala lenu phambi kwakhe—
4 Atsi: Babe, buka tinhlupheko nekufa kwakhe loyo longentanga sono, ngaye lowatfokota kakhulu; buka ingati yeNdvodzana yakho leyacitfwa, ingati yaloyo lowamnikela kute udvunyiswe;
5 Ngaloko-ke, Babe, bahawukele laba bomnaketfu labakholelwa egameni lami, kute bete kimi futsi batfole kuphila lokuphakadze.
6 Lalelani, Awu nine bantfu belibandla lami, nani babonisi lalelani kanyekanye, nive livi lami ngesikhatsi kusatsiwa namuhla, ningatenti lukhuni tinhlitiyo tenu;
7 Ngoba ngicinisile ngitsi kini ngingu-Alfa na-Omega, sicalo nesiphetfo, kukhanya nekuphila kwemhlaba—kukhanya lokukhanya ebumnyameni nebumnyama bangakucondzi.
8 Ngeta kubami, futsi bami bangangemukeli; kodvwa kubo bonkhe labo labangemukela ngabanika emandla ekwenta timangaliso letiningi, nekuba ngemadvodzana aNkulunkulu; nakulabo labakholelwa egameni lami ngabanika emandla ekutfola kuphila lokuphakadze.
9 Kanjalo-ke ngitfumele sivumelwano sami saphakadze emhlabeni, kute sibe kukhanya kwemhlaba, nekutsi sibe sibonelo kubantfu bami, nekutsi beTive babuke kuso, nekuba sitfunywa phambi kwebuso bami kulungisa indlela phambi kwami.
10 Ngaloko-ke, wotani kuso, futsi loyo lotako ngitawubonisana naye njengebantfu etikhatsini takadzeni, futsi ngitawunikhombisa kucabanga kwami lokunemandla.
11 Ngaloko-ke, lalelani kanyekanye ningivumele nginikhombise kuhlakanipha kwami—kuhlakanipha kwakhe loyo lenitsi nguNkulunkulu wa-Enoki, nabomnakabo,
12 Labehlukaniswa nemhlaba, bemukelwa kimi—lidolobha lelibekiwe kute kufike lilanga lekulunga—lilanga lelafunwa ngibo bonkhe bantfu labangcwele, bangalitfoli ngenca yebubi netinengiso;
13 Futsi bavuma kutsi babafokatana netihambi emhlabeni;
14 Kodvwa batfola setsembiso sekutsi kufanele balitfole futsi balibone enyameni yabo.
15 Ngaloko-ke, lalelani futsi ngitawubonisana nani, ngitawukhuluma kini ngiphrofethe, njengakubantfu etikhatsini takadzeni.
16 Ngitawukukhombisa kucace njengoba ngakukhombisa kubafundzi bami ngesikhatsi ngime phambi kwabo enyameni, ngikhuluma nabo, ngitsi: Njengoba ningibutile mayelana netibonakaliso tekubuya kwami, ngelusuku lapho ngiyawuta ngisenkhatimulweni yami emafini elizulu, kugcwalisa tetsembiso lengitentile kuboyihlo.
17 Ngoba njengoba nibuke sikhatsi lesidze sekungabikhona kwemimoya yenu emitimbeni yenu kutsi kubugcili, ngitawunikhombisa kutsi lilanga lekuhlengwa liyawufika kanjani, nekubuyiselwa kabusha kwa-Israyeli lohlakatekile.
18 Manje niyalibona lithempeli leliseJerusalema, lenilibita ngendlu yaNkulunkulu, futsi netitsa tenu titsi lendlu ngeke iwe.
19 Kodvwa, ngicinisile ngitsi kini, kubhujiswa kuyawufika kulesi situkulwane njengelisela ebusuku, futsi nalaba bantfu bayawubhujiswa baphindze bahlakateke etiveni tonkhe.
20 Nalelithempeli lenilibonako manje liyawudzilitelwa phansi kangangoba kute ngisho nalinye litje leliyawusala lihleti etikwalelinye.
21 Futsi kuyawukwenteka, kutsi lesi situkulwane semaJuda angeke sendlule ite yonkhe imbubhiso lenginitjele ngayo ngalokuphatselene nabo yenteke.
22 Nitsi niyati kutsi kuphela kwemhlaba kuyeta; nitsi futsi niyati kutsi emazulu nemhlaba kutawendlula;
23 Kuloku nicinisile, ngoba kunjalo; kodvwa leti tintfo lenginitjele tona angeke tenteke kute kugcwaliseke konkhe.
24 Loku nginitjelile ngalokuphatselene neJerusalema; futsi uma lelo langa lifika, insali iyawuhlakatwa etiveni tonkhe;
25 Kodvwa iyawugcogcwa futsi; kodvwa iyawuhlala kulesimo kute kugcwaliseke tikhatsi tebeTive.
26 Kulelo langa kuyawuvakala timphi nemahemuhemu etimphi, nemhlaba wonkhe uyawuba nesiphitsiphitsi, nebantfu bayawulahlekelwa sibindzi, bayawutsi Khristu ulibatisa kubuya kwakhe kute kube kuphela kwemhlaba.
27 Nelutsandvo lwebantfu luyawuphola, nebubi buyawukwandza.
28 Futsi uma sikhatsi sebeTive sesifika, kuyawuvela kukhanya kulabo labahleli ebumnyameni, futsi kuyawuba kuphelela kwelivangeli lami;
29 Kodvwa abalemukeli; ngoba abakucondzi kukhanya, futsi bayatisusa tinhlitiyo tabo kimi ngenca yetimfundziso tebantfu.
30 Futsi kuleso situkulwane tikhatsi tebeTive tiyawugcwaliseka.
31 Futsi kuyawuba khona bantfu labayawuphila kuleso situkulwane labangayikufa bate babone sijeziso lesisabalele; ngoba sifo lesibhubhisako siyawugcwala live.
32 Kodvwa bafundzi bami bayawukuma etindzaweni letingcwele, futsi angeke banyakatiswe; kodvwa emkhatsini walababi, bantfu bayawuphakamisa emavi abo bacalekise Nkulunkulu bese bayafa.
33 Futsi kuyawuba khona kutamatama kwemhlaba etindzaweni letehlukahlukene, nembubhiso leningi; kodvwa bantfu bayawutenta lukhuni tinhlitiyo tabo ngekumelana nami, batsatselane inkemba, baphindze babulalane.
34 Manje ngesikhatsi mine iNkhosi sengiwakhulumile lawa mavi kubafundzi bami, bakhatsateka.
35 Ngatsi kubo: Ningakhatsateki, ngoba, uma tonkhe leti tintfo tenteka, niyawukwati kutsi tetsembiso letentiwe kini tiyawugcwaliseka.
36 Futsi uma kukhanya sekucala kuvela, kuyawuba ngulokucondzene nabo njengemfanekiso lengitawunikhombisa wona—
37 Niyabuka nibone tihlahla temkhiwa, futsi niyatibona ngemehlo enu, nitsi uma seticala kuhluma, nemacembe ato sekatsambile, kutsi lihlobo selisedvute;
38 Kanjalo-ke kuyawuba njalo kulelo langa ngesikhatsi bayawubona tonkhe leti tintfo, bayobe sebati kutsi lihora selisondzele.
39 Futsi kuyawukwenteka kutsi loyo longesabako uyawube abuke phambili alindzele lilanga lelikhulu lekubuya kweNkhosi, alindzele ngisho netibonakaliso tekubuya kweNdvodzana yeMuntfu.
40 Futsi bayawubona tibonakaliso netimangaliso, ngoba tiyawukhonjiswa emazulwini etulu, nasemhlabeni phansi.
41 Bayawubona ingati, nemlilo, nekushunca kwentfutfu.
42 Futsi ngaphambi kwekufika kwelilanga leNkhosi, lilanga liyawufiphala, nenyanga iguculwe ibe yingati, netinkhanyeti tidzilike ezulwini.
43 Nensali iyawugcogcelwa kulena ndzawo;
44 Ngaleso sikhatsi bayobe bangilindzile, futsi, buka, ngiyawukuta; bayawungibona emafini asezulwini, ngembatsiswe emandla nenkhatimulo lenkhulu; nato tonkhe tingilosi letingcwele; futsi loyo longangilindzi uyawususwa.
45 Kodvwa ngaphambi kwekube umkhono weNkhosi wehle, ingilosi iyawushaya licilongo layo, nalabangcwele lesebalala bayawuvuka bangihlangabete efini.
46 Ngaloko-ke, uma nife ninemoya wekuthula nibusisiwe; ngoba njengoba ningibona futsi nati kutsi nginguye, kanjalo-ke niyawukuta kimi nemiphefumulo yenu iyawuphila, nekuhlengwa kwenu kuyawupheleliswa; nalabangcwele bayawukuta bavela emagumbini lamane emhlaba.
47 Emvakwaloko umkhono weNkhosi uyawukwehlela etikwetive.
48 Futsi emvakwaloko iNkhosi iyawubeka lunyawo lwayo lume etikwalentsaba, bese ichekeka kabili, nemhlaba uyawutamatama, udzayitele uye lena nalena, nemazulu ayawutamatama.
49 INkhosi iyawukhuluma livi layo, nemikhawulo yonkhe yemhlaba iyawuliva, netive temhlaba tiyawulila, nalabo labahlekile bayawububona buwula babo.
50 Futsi nenhlekelele iyawumsibekela umphukuti, nesedzeleli siyawushabalaliswa; nalabo labahlalela bubi bayawususwa baphonswe emlilweni
51 Emvakwaloko emaJuda ayawungibuka atsi: Ngewani lamanceba lasetandleni nasetinyaweni takho na?
52 Emvakwaloko bayawukwati kutsi ngiyiNkhosi; ngoba ngiyawutsi kubo: Lamanceba ngemanceba lengawatfola endlini yebangani bami. Nginguye lowaphakanyiselwa etulu, NginguJesu lowabetselwa esiphambanweni. NgiyiNdvodzana yaNkulunkulu.
53 Emvakwaloko bayawukhala ngenca yebubi babo; bayawubese bayalila ngoba bahlupha inkhosi yabo.
54 Emvakwaloko tive letingemahedeni tiyawuhlengwa, nalabo labebangawati umtsetfo bayawuba nesabelo ekuvukeni kwekucala; futsi bayabeketelelwa.
55 Sathane uyawuboshwa, kangangoba akayikuba nendzawo etinhlitiyweni tebantfwana bebantfu.
56 Futsi ngalelo langa, lapho ngiyawufika ngenkhatimulo yami, umfanekiso lengakhuluma ngawo uyawugcwaliseka lomayelana netintfombi letilishumi.
57 Ngoba labo labahlakaniphile nalabemukele liciniso, bemukela Moya loNgcwele kutsi abe ngumcondzisi wabo, bangakhohliswa—ngicinisile ngitsi kini, angeke bajutjwe bese baphonswa emlilweni, kodvwa bayawulubeketelela lelo langa.
58 Nemhlaba uyawuniketwa bona kutsi ube lifa; futsi bayawukwandza bakhule ngemandla, nebantfwana babo bayawukhula bangenasono bate batfole insindziso.
59 Ngoba iNkhosi iyawuba semkhatsini wabo, nenkhatimulo yayo iyawuba setikwabo, futsi iyawuba yinkhosi nesishayamtsetfo sabo.
60 Manje, buka, ngitsi kuwe, angeke usavunyelwa kutsi wati lokunye mayelana nalesi sehluko, kute kuhunyushwe liThestamente leliSha, futsi kuto tonkhe leti tintfo tiyawukwembulwa;
61 Ngaloko-ke ngiyakuvumela kutsi sewungalihumusha, kute ulungiselelwe tintfo letitako.
62 Ngoba ngicinisile ngitsi kini, tinkhulu tintfo letinihlalele.
63 Niva ngetimphi takulamanye emave; kodvwa, bukani, ngitsi kini, setisondzele naseminyango yenu, futsi kungakabi yiminyaka lemingaki kusukela manje nitawuva ngetimphi emaveni enu.
64 Ngaloko-ke mine, iNkhosi, ngitsite, gcogcanani kusuka emaveni lasemphumalanga, butsanani ndzawonye nine babonisi belibandla lami; hambani niye emaveni lasenshonalanga, nibite bahlali kutsi baphendvuke, futsi nangabe baphendvuka, ngakheleni emabandla.
65 Ngenhlitiyo yinye nangemcondvo munye, butsisani ingcebo yenu kute nitsenge lifa leniyawuniketwa lona emvakwaloku.
66 Futsi liyawubitwa ngekutsi yiJerusalema leNsha, live lemoya wekuthula, lidolobha lekukhosela, indzawo yekuphepha yalabangcwele baNkulunkulu Losetikwako Konkhe;
67 Nenkhatimulo yeNkhosi iyawuba lapho, nekwesabeka kweNkhosi kuyawuba lapho, kangangoba lababi abayukuta kulo, futsi liyawubitwa ngekutsi yiSiyoni.
68 Futsi kuyawukwenteka kutsi emkhatsini walababi, wonkhe umuntfu longeke atsatse inkemba abhekane namakhelwane wakhe kutawufanele abalekele eSiyoni kute aphephe.
69 Lapho bayawubutsana kulo bavela etiveni tonkhe ngaphansi kwelizulu; futsi kuyawuba ngibo kuphela bantfu labangayukuba semphini lomunye kulomunye.
70 Futsi kuyawutsiwa emkhatsini walababi: Asingayini kuyawukulwa neSiyoni, ngoba bahlali baseSiyoni bayesabeka; ngaloko-ke angeke sincobe.
71 Futsi kuyawukwenteka kutsi labalungile bayawugcogcwa emkhatsini wetive tonkhe, bete eSiyoni, bahlabela emaculo enjabulo yaphakadze.
72 Manje ngitsi kini, gcinani leti tintfo tingayi ngephandle emhlabeni ngite ngibone kutsi kufanele, kute nifeze lomsebenti emehlweni ebantfu, nasemehlweni etitsa tenu, kute bangayati imisebenti yenu nite nifeze loko lenginiyalete ngako;
73 Kute ngesikhatsi labayawukwati ngaso, bacabange ngaleti tintfo.
74 Ngoba ngesikhatsi iNkhosi leyawuvela ngaso iyawukwesabeka kubo, kangangoba kwesaba kuyawubabamba, futsi bayawukuma khashane batfutfumale.
75 Netive tonkhe tiyawukwesaba ngenca yekwesabeka kweNkhosi, nemandla akhe lamakhulu. Kunjalo nje. Amen.