Sigaba 72
Sembulo lesaniketwa ngaJoseph Smith umPhrofethi, eKirtland, e-Ohio, mhlaka 4 iNgongoni, 1831. Babonisi nemalunga lambalwa bebabutsene kutawutfola lwati ngemsebenti wabo nekwakhiwa lokwengetiwe etimfundzisweni teliBandla. Lesi sigaba siyinhlanganisela yetembulo letintsatfu letatfolakala ngelilanga lelifanako. Emavesi 1 kuya ku 8 atisa ngekubitwa kwaNewel K. Whitney njengembhishobhi. Wabese uyabitwa waphindze wabekwa, lokwatsi emvakwaloko kwatfolakala emavesi 9 kuya ku 23, labekaniketa lwati lolwengetiwe ngemisebenti yembhishobhi. Emvakwaloko, emavesi 24 kuya ku 26 aniketwa, labekaniketa imiyaleto mayelana nekubutsana eSiyoni.
1–8, Babonisi kufanele banike umbiko wekuphatsa kwabo kumbhishobhi; 9–15, Umbhishobhi ugcina indlu yengcebo aphindze anakekele labamphofu nalabeswele; 16–26, Babhishobhi kufanele bacinisekise kufaneleka kwebabonisi.
1 Lalelani, nive livi leNkhosi, Awu nine lenibutsene ndzawonye, lenibaphristi labakhulu belibandla lami, leninikwe umbuso nemandla.
2 Ngoba ngicinisile naku lokushiwo yiNkhosi, ngibona kufanele kutsi nikhetselwe umbhishobhi, noma akhetfwe kini, ebandleni kulencenye yesivini seNkhosi.
3 Futsi ngicinisile kuloku nente ngekuhlakanipha, ngoba kudzingekile eNkhosini, esandleni sanoma ngumuphi umphatsi, kutsi anikete umbiko ngekuphatsa kwakhe, manje naphakadze.
4 Ngoba loyo lowetsembekile nalohlakaniphile manje ubalwa njengalofanele kutfola lifa letindlu letilungiselwe yena nguBabe.
5 Ngicinisile ngitsi kini, babonisi balibandla kulencenye yesivini sami bayawuniketa umbiko ngekuphatsa kwabo kumbhishobhi, loyawubekwa ngimi kulencenye yesivini sami.
6 Leti tintfo kufanele tibhalwe phansi, kute tendluliselwe kumbhishobhi eSiyoni.
7 Futsi umsebenti wembhishobhi uyawukwatiswa ngemiyaleto leniketiwe, nangelivi lemhlangano.
8 Manje, ngicinisile ngitsi kini, inceku yami Newel K. Whitney nguyona ndvodza letawukhetfwa futsi ibekwe kulamandla. Lena yintsandvo yeNkhosi Nkulunkulu wenu, uMhlengi wenu. Kunjalo nje. Amen.
9 Livi leNkhosi, ngetulu kwemtsetfo lesewuniketiwe, lelatisa ngemsebenti wembhishobhi losekabekiwe ebandleni kulencenye yesivini, ngekweliciniso lokungulona—
10 Kugcina indlu yengcebo yeNkhosi; kwemukela timali telibandla kulencenye yesivini;
11 Kutfola umbiko webabonisi njengoba kuyaletiwe ngaphambilini; nekunaka tidzingo tabo, lokufanele babhadale loko labakutfolako, nangabe banako kwekubhadala;
12 Kute naloku kungcweliswe khona kutawuzuza libandla, kutawusita labamphofu nalabeswele.
13 Futsi loyo lote langabhadala ngako, kufanele kwentiwe umbiko wendluliselwe kumbhishobhi waseSiyoni, lokufanele abhadale lesikweleti ngaloko iNkhosi leyiyawukubeka etandleni takhe.
14 Futsi imisebenti yalabetsembekile labasebenta etintfweni tamoya, kuhambisa livangeli netintfo tembuso ebandleni, nasemhlabeni, iyawubhadala sikweleti kumbhishobhi eSiyoni;
15 Ngako-ke lembhadalo ivela ebandleni, ngoba ngekwemtsetfo wonkhe umuntfu lota eSiyoni kumele abeke tonkhe tintfo phambi kwembhishobhi eSiyoni.
16 Manje, ngicinisile ngitsi kini, njengoba wonkhe umbonisi kulencenye yesivini kumele anike umbiko ngekuphatsa kwakhe kumbhishophi kulencenye yesivini—
17 Sitifiketi lesiphuma kumehluleli noma kumbhishobhi kulencenye yesivini, lesiya kumbhishobhi eSiyoni, senta wonkhe umuntfu emukeleke, siphendvula tonkhe tintfo, kute atfole lifa, nekutsi emukelwe njengemphatsi lohlakaniphile futsi njengesisebenti lesetsembekile.
18 Kungenjalo angeke emukelwe ngumbhishobhi waseSiyoni.
19 Manje, ngicinisile ngitsi kini, wonkhe umbonisi lotawukwenta umbiko kumbhishobhi welibandla kulencenye yesivini akavunywe libandla noma ngemabandla, lapho asebenta khona, kute yena nembiko wakhe kuvunywe kuto tonkhe tintfo.
20 Ngetulu kwaloko, tinceku tami lengitikhetse njengebaphatsi kulokuphatselene nalokubhaliwe kwelibandla lami banalo lilungelo lekutfola lusito kumbhishobhi noma kubabhishobhi kuto tonkhe tintfo—
21 Kute tembulo tikhishwe kuya kubantfu, tihambe tiye emikhawulweni yemhlaba; kute nabo batfole timali letiyawusita libandla kutsi lizuze kuto tonkhe tintfo;
22 Kute nabo bavumeleke kuto tonkhe tintfo, futsi babalwe njengebaphatsi labahlakaniphile.
23 Manje, bukani, loku kuyawuba sibonelo kuwo onkhe emagala elibandla lami lasabalale kuyo yonkhe indzawo, kunoma nguliphi live lapho ayawusungulwa khona, Manje sengenta siphetfo salengikushoko. Amen.
24 Emavi lambalwa kwengeta emitsetfweni yembuso, ngalokuphatselene nemalunga elibandla—labo labakhetfwe nguMoya loNgcwele kuya eSiyoni, nalabo labanenhlanhla yekuya eSiyoni—
25 Abaphatse sitifiketi lesiya kumbhishobhi lesisuka kubabonisi labatsatfu belibandla, noma sitifiketi lesisuka kumbhishobhi;
26 Kungenjalo loyo loya eveni laseSiyoni angeke abalwe njengemphatsi lohlakaniphile. Loku futsi kusibonelo. Amen.