Sigaba 39
Sembulo lesaniketwa ngaJoseph Smith umPhrofethi kuJames Covel, eFayette, eNew York, mhlaka 5 Bhimbidvwane 1831. James Covel, lobesekabe ngumholi welibandla lemaWeseli cishe iminyaka lengemashumi lamane, wenta sivumelwano neNkhosi sekutsi uyawutfobela noma ngumuphi umyaleto iNkhosi leyayiyawumnika wona ngaJoseph umPhrofethi.
1–4, LabaNgcwele banemandla ekuba ngemadvodzana aNkulunkulu; 5–6, Kwemukela livangeli kwemukela Khristu; 7–14, James Covel uyaletwa kutsi abhajatiswe aphindze asebente esivinini seNkhosi; 15–21, Tinceku teNkhosi kufanele tishumayele livangeli ngaphambi kweKubuya kwesiBili; 22–24, Labo labemukela livangeli batawugcogcwa manje naphakadze.
1 Lalela futsi uve livi laloyo lovela kulolonkhe liphakadze kuya kulolonkhe, lomKhulu ngiNguye, ngisho Jesu Khristu lucobo—
2 Lokukhanya nekuphila kwemhlaba; kukhanya lokukhanya ebumnyameni bumnyama bangakucondzi;
3 Yena kanye loyo loweta ekhatsi nesikhatsi kubami, futsi bami bangangemukeli;
4 Kodvwa bonkhe labo labangemukela, ngabanika emandla ekuba ngemadvodzana ami; kanjalo ke ngitawuniketa kubo bonkhe labo labatawungemukela, emandla ekuba ngemadvodzana ami.
5 Futsi ngicinisile, ngicinisile, ngitsi kuwe, loyo lowemukela livangeli lami wemukela mine; nalongalemukeli livangeli lami akangemukeli nami.
6 Futsi leli livangeli lami—kuphendvuka nekubhajatiswa ngemanti, bese kuta kubhajatiswa ngemlilo nangaMoya loNgcwele, ngisho uMdvudvuti, lokhombisa tonkhe tintfo, aphindze afundzise netintfo letinekuthula tembuso.
7 Manje, buka, ngitsi kuwe, nceku yami James, ngiyibonile imisebenti yakho futsi ngiyakwati.
8 Futsi ngicinisile ngitsi kuwe, inhlitiyo yakho seyilungile phambi kwami ngalesi sikhatsi; buka, ngibeke tibusiso letinkhulu kuwe;
9 Noko, sewubone lusizi lolukhulu, ngoba ungilahlile tikhatsi letiningi ngenca yekutikhukhumeta nangekunaka kwemhlaba.
10 Kodvwa, buka, emalanga ekukhululwa kwakho sekafikile, uma ungalalela livi lami, lelitsi kuwe: Sukuma ubhajatiswe, uhlante tono takho, ubite libito lami, uyawuphiwa Moya wami, nesibusiso lesikhulu longakase usati.
11 Uma wenta loku, ngikulungiselele umsebenti lomkhulu. Uyawushumayela kuphelela kwelivangeli lami, lengilitfumele kulawa malanga ekugcina, lesivumelwano lengisitfumele kubuyisa bantfu bami, lababendlu yaka-Israyeli.
12 Futsi kuyawukwenteka kutsi emandla ayawuba setikwakho; uyawuba nelukholo lolukhulu, futsi ngitawuba nawe ngihambe phambi kwebuso bakho.
13 Ubitelwe kusebenta esivinini sami, nekwakha libandla lami, nekuveta iSiyoni, kute ijabule etikwetintsaba futsi iphumelele.
14 Buka, ngicinisile, ngicinisile, ngitsi kuwe, awukabitelwa kuya emaveni lasemphumalanga, kodvwa ubitelwe kuya e-Ohio.
15 Futsi nangabe bantfu bami bayawubutsana e-Ohio, ngigcine sibusiso lesikhulu kunaleso umuntfu lake wasibona emkhatsini webantfwana bebantfu, futsi siyawutfululelwa kubo. Kusuka kuleyondzawo emadvodza ayawuhamba aye kuto tonkhe tive.
16 Buka, ngicinisile, ngicinisile, ngitsi kini, bantfu base-Ohio bangibita ngalokukhulu kukholwa, bacabanga kutsi ngitawuvimba sandla sami kwehlulela tive, kodvwa angikwati kuphikisa livi lami.
17 Ngaloko-ke calani nisebente ngemandla enu, nibitele tisebenti letetsembekile esivinini sami, kute sitsenwe kwekugcina.
18 Nangabe baphendvuka baphindze bemukela kuphelela kwelivangeli lami, futsi bangcweliswa, ngitawuvimba sandla sami ekwahluleleni.
19 Ngaloko-ke, hambani, nimemete ngelivi lelikhulu, nitsi: Umbuso welizulu sewusondzele; nimemete: Hosana! Libusisiwe libito laNkulunkulu Losetikwako Konkhe.
20 Hambani nibhabhatise ngemanti, nilungise indlela phambi kwebuso bami kulungiselela sikhatsi sekubuya kwami;
21 Ngoba sikhatsi sesisondzele; lelilanga noma lihora lelingatiwa ngumuntfu; kodvwa noma kanjani liyawufika.
22 Futsi loyo lotemukelako leti tintfo wemukela mine; futsi bayawugcogcelwa kimi manje naphakadze.
23 Ngetulu kwaloko, kuyawukwenteka kutsi bonkhe labo leniyawubabhabhatisa ngemanti, niyawubabeka tandla tenu, bese batfola sipho saMoya loNgcwele, futsi bayawube balindze timphawu tekubuya kwami, futsi bayawungati.
24 Bukani, ngita masinyane. Kunjalo nje. Amen.