Sigaba 32
Sembulo lesaniketwa ngaJoseph Smith umPhrofethi kuParley P. Pratt naku Ziba Peterson, eManchester, eNew York, ekucaleni kwenyanga yeMphala ngemnyaka wa 1830. Kwaba nenshisekelo netifiso letinkhulu kubabonisi mayelana nemaLamani, tibusiso tawo letatiphrofethiwe liBandla lelalitifundze eNcwadzini yaMormon. Ngenca yaloko, kwancuswa kutsi iNkhosi ivete intsandvo yayo mayelana nekutsi babonisi bangatfunyelwa yini ngaleso sikhatsi etiveni temaNdiya eNshonalanga. Lesembulo salandzela.
1–3, Parley P. Pratt naZiba Peterson babitelwa kuyoshumayela emaLamani nekutsi bahambe na-Oliver cowdery kanye naPeter Whitmer lomNcane; 4–5, Kufanele bathandaze kute bayicondze imibhalo lengcwele.
1 Manje mayelana nenceku yami Parley P. Pratt, buka, ngitsi kuye njengoba ngiphila ngifisa kutsi ashumayele livangeli lami afundze kimi, abemnene futsi atfobeke ngenhlitiyo.
2 Futsi ngimkhetse kutsi utawuhamba netinceku tami, Oliver Cowdery naPeter Whitmer, lomNcane, aye ehlane emkhatsini wemaLamani.
3 Kanjalo naZiba Peterson utawuhamba nabo; nami lucobo lwami ngitawuhamba nabo ngibe semkhatsini wabo; futsi ngingummeli wabo kuBabe, kute lokuyawubancoba.
4 Futsi batawulalela loko lokubhaliwe, bangatenti shengatsi banalesinye sembulo; bayawuthandaza njalo kute ngibembulele loko kute bakucondze.
5 Bayawuwalalela lamavi bangawedzeleli, futsi ngitawubabusisa. Amen.