Sigaba 23
Kulandzelana kwetembulo letisihlanu letaniketwa ngaJoseph Smith umPhrofethi, eManchester, eNew York, kuMabasa 1830, kuOliver Cowdery, nakuHyrum Smith, nakuSamuel H. Smith, nakuJoseph Smith lomDzala, kanye nakuJoseph Knight lomDzala. Njengesifiso lesimnene kulabantfu labasihlanu lasebashiwo kute bati ngemisebenti yabo ngamunye, umPhrofethi wabuta eNkhosini wase utfola lesembulo semuntfu ngamunye.
1–7, Laba bafundzi bekucala babitelwa kutsi bashumayele, bakhutsate, baphindze bacinise liBandla.
1 Buka, ngikhuluma kuwe, Oliver, emavi lambalwa. Buka, ubusisiwe, futsi awukho ngaphansi kwekulahlwa. Kodvwa caphela kutikhukhumeta, funa ungene ekulingweni.
2 Yenta lubito lwakho lwatiwe ebandleni, kanye naphambi kwemhlaba, futsi inhlitiyo yakho iyawuvuleka kute ushumayele liciniso kusukela manje naphakadze. Amen.
3 Buka, ngikhuluma kuwe, Hyrum, emavi lambalwa; ngoba nawe awukho ngaphansi kwekulahlwa, nenhlitiyo yakho ivulekile, nelulwimi lwakho luchachekile; lubito lwakho kukhutsata, nekucinisa libandla njalo. Ngaloko-ke umsebenti wakho usebandleni ingunaphakadze, futsi loku kungenca yemndeni wakho. Amen.
4 Buka, ngikhuluma emavi lambalwa kuwe, Samuel; ngoba nawe awukho ngaphansi kwekulahlwa, nelubito lwakho kukhutsata, nekucinisa libandla; futsi wena asengakabitelwa kushumayela kwamanje ngaphambi kwemhlaba. Amen,
5 Buka, ngikhuluma emavi lambalwa kuwe, Joseph; ngoba nawe awukho ngaphansi kwekulahlwa, lwakho lubito kukhutsata, nekucinisa libandla; futsi lona ngumsebenti wakho kusukela manje naphakadze, Amen.
6 Buka, ngembula kuwe, Joseph Knight, ngalamavi, kutsi kumele utsatse siphambano sakho, ngekutsi kumela uthandaze kuvakale phambi kwemhlaba nasekusitsekeni, nasemndenini wakho, nasemkhatsini webangani bakho, nakuto tonkhe tindzawo.
7 Futsi, buka, kungumsebenti wakho kuhlanganyela nelibandla lelingilo sibili, ukhutsate njalo, kute uwutfole umvuzo wesisebenti. Amen.