Sigaba 12
Sembulo lesaniketwa ngaJoseph Smith umPhrofethi kuJoseph Knight lomDzala, eHarmony, ePennsylvania, ngeNkhwekhweti 1829. Joseph Knight bekakukholwa lobekushiwo nguJoseph Smith mayelana nekutsi bekanabongcwengcwe beNcwadzi yaMormon, nemsebenti wekuhumusha lobewuchubeka ngaleso sikhatsi futsi etikhatsini letiningi bekaloko aniketa Joseph Smith nembhali wakhe lusito lwetintfo letiphatsekako, lokwabenta bakwati kuchubeka nekuhumusha. Ngesicelo saJoseph Knight, umPhrofethi wabuta iNkhosi wabese uyasitfola lesembulo.
1–6, Tisebenti esivinini titawutfola insindziso; 7–9, Bonkhe labafisako nalabanemandla bangasita emsebentini weNkhosi.
1 Umsebenti lomkhulu nalomangalisako sewutawucala emkhatsini webantfwana bebantfu.
2 Buka, nginguNkulunkulu; naka livi lami, leliphilile futsi lelinemandla, lelikhalipha kwengca inkemba lesika ngetinhlangotsi totimbili, lisika lidzimate lehlukanise emalunga nemnkantja; ngako-ke naka emavi ami.
3 Buka, insimu seyimhlophe seyilungele kuvunwa; ngako-ke, noma ngubani lonesifiso sekuvuna, akajikijele lisikela lakhe ngemandla, avune kusesemini, kute abekele umphefumulo wakhe insindziso yaphakadze embusweni waNkulunkulu.
4 Yebo, noma ngubani lotawujikijela lisikela lakhe avune, nguye loyo lobitwe nguNkulunkulu.
5 Ngako-ke, uma atawucela kimi utawutfola; uma utawunconcotsa utawuvulelwa.
6 Manje, njengoba ucelile, buka, ngitsi kuwe, gcina imiyaleto yami, ufune kuletsa uphindze ucinisekise umgomo weSiyoni.
7 Buka, ngikhuluma nawe, kanye nakubo bonkhe labanesifiso sekuveta baphindze bacinisekise lomsebenti;
8 Futsi kute namunye longasita kulomsebenti ngaphandle uma atfobekile futsi agcwele lutsandvo, anelukholo, nelitsemba, nelutsandvo, anekutitsiba etintfweni tonkhe, kunoma ngayini layawuphatsiswa yona ngekwetsenjwa.
9 Buka, ngikukhanya nekuphila kwemhlaba, lokhuluma lamavi, ngako-ke naka ngemandla akho, emvakwaloko ubitiwe. Amen.