Seksiyon 18
Pagpadayag ngadto nila ni Joseph Smith ang Propeta, Oliver Cowdery, ug David Whitmer, gihatag sa Fayette, New York, Hunyo 1829. Sumala sa Propeta, kini nga pagpadayag nailhan nga “ang pagtawag sa napulog duha ka apostoles niining kataposang mga adlaw, ug mga instruksiyon usab nga may kalabotan sa pagtukod sa Simbahan.”
1–5, Ang mga kasulatan nagpakita kon unsaon pagtukod ang Simbahan; 6–8, Ang kalibotan nagkahinog sa pagkadaotan; 9–16, Ang bili sa mga kalag mahinungdanon; 17–25, Aron makaangkon og kaluwasan, ang mga tawo kinahanglan nga modala diha kanila sa ngalan ni Kristo; 26–36, Ang katungdanan ug ang misyon sa Napulog Duha gipadayag; 37–39, Sila si Oliver Cowdery ug David Whitmer mao ang mangita og Napulog Duha; 40–47, Aron makaangkon og kaluwasan, ang mga tawo kinahanglan nga maghinulsol, mabunyagan, ug mosunod sa mga sugo.
1 Karon, tan-awa, tungod sa butang nga imong gitinguha, akong sulugoong Oliver Cowdery, nga mahibaloan gikan kanako, hatagan ko ikaw niini nga mga pulong:
2 Tan-awa, akong gipadayag kanimo pinaagi sa akong Espiritu sa daghang higayon, nga ang mga butang nga imong gisulat tinuod; mao nga imong nahibaloan nga kini tinuod.
3 Ug kon imong mahibaloan nga kini tinuod, tan-awa, hatagan ko ikaw og sugo, nga ikaw mosalig sa mga butang nga nahisulat;
4 Kay diha niini ang tanang butang nahisulat nga may kalabotan sa pundasyon sa akong simbahan, akong ebanghelyo, ug akong bato.
5 Mao nga, kon imong tukoron ang akong simbahan, diha sa pundasyon sa akong ebanghelyo ug sa akong bato, ang mga ganghaan sa impyerno dili magmadaogon batok kanimo.
6 Tan-awa, ang kalibotan nagkahinog sa pagkadaotan; ug kinahanglan gayod nga ang mga anak sa katawhan awhagon sa paghinulsol, ang mga Hentil ug usab ang balay ni Israel.
7 Mao nga, kay ikaw nabunyagan na pinaagi sa mga kamot sa akong sulugoon nga si Joseph Smith, Jun., sumala nianang akong gisugo kaniya, iyang natuman ang butang nga akong gisugo kaniya.
8 Ug karon, ayaw kahibulong nga ako mitawag kaniya alang sa akong kaugalingong katuyoan, diin nga katuyoan nahibaloan ngari kanako; mao nga, kon magmakugihon siya sa pagsunod sa akong mga sugo mapanalanginan siya og kinabuhing dayon; ug ang iyang ngalan mao si Joseph.
9 Ug karon, Oliver Cowdery, sultihan ko ikaw, ug usab si David Whitmer, pinaagi sa sugo; kay, tan-awa, ako nagsugo sa tanang tawo sa tanang dapit nga maghinulsol, ug sultihan ko ikaw, gani sama kang Pablo nga akong apostol, kay ikaw gitawag gani sa sama niana nga katungdanan diin siya gitawag.
10 Hinumdomi ang bili sa mga kalag mahinungdanon sa panan-aw sa Dios;
11 Kay, tan-awa, ang Ginoo nga inyong Manunubos nag-antos sa kamatayon diha sa unod; mao nga nag-antos siya sa kasakit sa tanang tawo, aron ang tanang tawo maghinulsol ug moduol kaniya.
12 Ug nabuhi siya pag-usab gikan sa mga patay, nga iyang madala ang tanang tawo ngadto kaniya, sa mga kondisyon sa paghinulsol.
13 Ug pagkadako sa iyang kamaya sa kalag nga naghinulsol!
14 Mao nga, gitawag kamo aron isangyaw ang paghinulsol ngadto niini nga katawhan.
15 Ug kon maningkamot kamo sa tanan ninyong mga adlaw sa pagsangyaw og paghinulsol ngadto niini nga katawhan, ug makadala, og bisan usa ka kalag ngari kanako, pagkadako sa inyong kamaya uban kaniya didto sa gingharian sa akong Amahan!
16 Ug karon, kon dako ang inyong kamaya tungod sa usa ka kalag nga inyong nadala ngari kanako didto sa gingharian sa akong Amahan, pagkadako sa inyong kamaya kon kamo makadala og daghang kalag ngari kanako!
17 Tan-awa, anaa kaninyo ang akong ebanghelyo, ug ang akong bato, ug ang akong kaluwasan.
18 Pangayo sa Amahan pinaagi sa akong ngalan inubanan sa pagtuo, magatuo nga kamo makadawat, ug makabaton kamo sa Espiritu Santo, nga mopakita sa tanang butang nga gikinahanglan sa mga anak sa katawhan.
19 Ug kon kamo walay pagtuo, paglaom, ug gugmang putli, kamo walay mahimo.
20 Ayaw pakigbatok sa ubang simbahan, gawas sa simbahan sa yawa.
21 Dad-a diha kaninyo ang ngalan ni Kristo, ug isulti ang kamatuoran pinaagi sa kaligdong.
22 Ug kutob sa maghinulsol ug magpabunyag pinaagi sa akong ngalan, nga mao si Jesukristo, ug molahutay sa kataposan, ang maong tawo maluwas.
23 Tan-awa, si Jesukristo mao ang ngalan nga gihatag sa Amahan, ug wala nay laing ngalan nga gihatag diin ang tawo mahimong maluwas;
24 Mao nga, ang tanang tawo kinahanglan nga modala diha kanila sa ngalan nga gihatag sa Amahan, kay niana nga ngalan sila pagatawgon sa kataposang adlaw;
25 Mao nga, kon wala sila masayod sa ngalan diin sila pagatawgon, sila walay luna sa gingharian sa akong Amahan.
26 Ug karon, tan-awa, adunay uban nga gitawag sa pagpahayag sa akong ebanghelyo, ngadto sa Hentil ug sa Judeo;
27 Oo, bisan ang napulog duha; ug ang Napulog Duha mahimo nga akong mga disipulo, ug modala sila diha kanila sa akong ngalan; ug ang Napulog Duha mao sila ang magtinguha sa pagdala sa akong ngalan uban sa hingpit nga katuyoan sa kasingkasing.
28 Ug kon magtinguha sila sa pagdala diha kanila sa akong ngalan uban sa hingpit nga katuyoan sa kasingkasing, tawagon sila sa pagpanglakaw ngadto sa tibuok kalibotan sa pagsangyaw sa akong ebanghelyo ngadto sa matag nilalang.
29 Ug mao kana sila ang akong giorden nga mobunyag pinaagi sa akong ngalan, sumala nianang nahisulat;
30 Ug kamo aduna nianang nahisulat; mao nga, kinahanglan ipahigayon ninyo kini sumala sa mga pulong nga nahisulat.
31 Ug mamulong ako kaninyo, nga Napulog Duha—Tan-awa, ang akong grasya igo alang kaninyo; kinahanglan kamo nga maglakaw nga matarong sa akong atubangan ug dili na magpakasala.
32 Ug, tan-awa, kamo ang akong giorden aron mag-orden og mga pari ug mga magtutudlo; sa pagpahayag sa akong ebanghelyo, sumala sa gahom sa Espiritu Santo nga anaa kaninyo, ug sumala sa mga katungdanan ug mga gasa sa Dios ngadto sa mga tawo;
33 Ug ako, si Jesukristo, ang inyong Ginoo ug inyong Dios, ang namulong niini.
34 Kini nga mga pulong dili gikan sa mga tawo ni gikan sa tawo, apan gikan kanako; mao nga, kamo magpamatuod nga kini gikan kanako ug dili sa tawo;
35 Kay ang akong tingog mao ang namulong niini nganha kaninyo; kay gihatag kini pinaagi sa akong Espiritu nganha kaninyo, ug pinaagi sa akong gahom kamo makabasa niini sa usag usa; ug kon dili pa tungod sa akong gahom dili kamo makabaton niini;
36 Mao nga, makapamatuod kamo nga kamo nakadungog sa akong tingog, ug nahibalo sa akong mga pulong.
37 Ug karon, tan-awa, ako mosugo kanimo, Oliver Cowdery, ug usab ni David Whitmer, nga kamo ang mangita sa Napulog Duha, kinsa adunay mga tinguha nianang akong gipamulong;
38 Ug pinaagi sa ilang mga tinguha ug sa ilang mga binuhatan mailhan ninyo sila.
39 Ug kon makit-an ninyo sila ipakita ninyo kini nga mga butang ngadto kanila.
40 Ug mangluhod kamo ug mosimba sa Amahan pinaagi sa akong ngalan.
41 Ug kinahanglan mosangyaw kamo ngadto sa kalibotan, nga mag-ingon: Kamo kinahanglan nga maghinulsol ug magpabunyag, pinaagi sa ngalan ni Jesukristo;
42 Kay ang tanang tawo kinahanglan nga maghinulsol ug magpabunyag, ug dili lamang ang mga lalaki, apan ang mga babaye, ug ang mga bata kinsa miabot na sa edad sa pagkamay-tulubagon.
43 Ug karon, human kamo makadawat niini, kinahanglan nga sundon ninyo ang akong mga sugo sa tanang butang;
44 Ug pinaagi sa inyong mga kamot magbuhat ako og katingalahan nga buhat taliwala sa mga anak sa katawhan, ngadto sa pagkabig sa ilang daghan nga mga sala, aron sila maghinulsol, ug aron sila makaadto sa gingharian sa akong Amahan.
45 Mao nga, ang mga panalangin nga ihatag nako kaninyo labaw pa sa tanang butang.
46 Ug human nga kamo makadawat niini, kon kamo dili mosunod sa akong mga sugo dili kamo maluwas sa gingharian sa akong Amahan.
47 Tan-awa, ako, si Jesukristo, inyong Ginoo ug inyong Dios, ug inyong Manunubos, pinaagi sa gahom sa akong Espiritu namulong niini. Amen.