IMfundziso neTivumelwano
Sigaba 1
Sembulo lesaniketwa ngaJoseph Smith umPhrofethi, ngamhlaka 1 Lweti, 1831, emhlanganweni lokhetsekile webabonisi beliBandla, lowawubanjwe eHiram, Ohio. Tembulo letiningi tasetike tatfolwa eNkhosini ngaphambi kwalesi sikhatsi, futsi nekuhlanganiswa kwato kute tishicilelwe tibe yincwadzi kwakungulesinye setihloko letibalulekile letavunywa kulomhlangano. Lesi sigaba sakha sendlalelo seNkhosi etimfundzisweni, etivumelwaneni, kanye nasemiyaletweni lenikwe kuloluhlelo lwekwengamela.
1–7, Livi lesecwayiso liya kubo bonkhe bantfu; 8–16, Kuhlubuka nebubi kwendvulela Kubuya kwesiBili; 17–23, Joseph Smith ubitwa kutsi atawubuyisela emhlabeni emaciniso nemandla eNkhosi; 24–33, iNcwadzi yaMormon iyavetwa neliBandla leliliciniso liyasungulwa; 34–36, Kuthula kutawutsatfwa emhlabeni; 37–39, Hlolisisani lemiyaleto.
1 Lalelani, Awu nine bantfu belibandla lami, kusho livi laloyo lohlala ekuphakameni, nemehlo akhe lasetikwebantfu bonkhe; yebo, ngicinisile ngitsi: Lalelani nine bantfu bakhashane; nani lenisetichingini taselwandle, lalelani kanyekanye.
2 Ngoba ngicinisile livi leNkhosi liya kubo bonkhe bantfu, futsi kute lotawuphunyuka; kute neliso lelingeke libone, noma indlebe lengeke ive, noma inhlitiyo lengeke itsintseke.
3 Nalabahlamuka iNkhosi bayawuhlushwa ngelusizi lolukhulu; ngoba bubi babo buyawumenyetelwa etikwetindlu, netimfihlo tabo tiyawukwembulwa.
4 Nelivi lesecwayiso liyawuya kubo bonkhe bantfu, ngemilomo yebafundzi bami, lengibakhetsile kuleti tinsuku tekugcina.
5 Bayawuhamba futsi kute loyawubavimba, ngoba mine iNkhosi ngibayaletile.
6 Bukani, leli ligunya lami, neligunya letinceku tami, nesendlalelo sami encwadzini yemiyaleto yami, lengibanikete yona kutsi bayishicilelele nine, Awu bantfu basemhlabeni.
7 Ngaloko-ke, yesabani niphindze nitfutfumele, Awu nine bantfu, ngoba loko mine iNkhosi lengikushito kubo kuyawufezeka.
8 Futsi ngicinisile ngitsi kini, labo labahambako, bahambisa leti tindzaba kubantfu basemhlabeni, kubo emandla aniketiwe kute babophe emhlabeni nasezulwini, labangakholwa nalabahlamuka iNkhosi;
9 Yebo, ngicinisile, kubabophela lusuku lapho lulaka lwaNkulunkulu luyawutfululwa kulababi ngaphandle kwesilinganiso—
10 Kufinyelela elusukwini lapho iNkhosi iyawukuta kutawukhokhela wonkhe umuntfu ngekwemsebenti wakhe, futsi ilinganise wonkhe umuntfu ngesilinganiso lalinganisa ngaso umlingani wakhe.
11 Ngaloko-ke livi leNkhosi liya kuyo yonkhe imikhawulo yemhlaba, kute bonkhe labatawukuva beve:
12 Tilungiseleleni, tilungiseleleni loko lokutawukuta, ngoba iNkhosi seyisedvute;
13 Futsi intfukutselo yeNkhosi seyokhelekile, nenkemba yakhe seyigeziwe, itawuwela etikwebantfu basemhlabeni.
14 Nemkhono weNkhosi uyawukwembulwa; nelusuku luyeta lapho labo labangeke balive livi leNkhosi, noma livi letinceku takhe, noma bangawanaki emavi ebaphrofethi nebaphostoli, bayawususwa emkhatsini webantfu;
15 Ngoba baphambukile etimisweni tami, futsi basephulile nesivumelwano sami saphakadze;
16 Abayifuni iNkhosi kute imise kulunga kwayo, kodvwa nguloyo muntfu uhamba ngeyakhe indlela, nangekwemfanekiso wankulunkulu wakhe, umfanekiso wakhe lowo lofana nemhlaba, nesicu sawo sisitfombe, lesigugako nalesitawushabalala eBhabhulona, ngisho iBhabhulona lenkhulu, letawukuwa.
17 Ngaloko-ke, mine iNkhosi, ngekwati lusizi lolutawukuta etikwalabantfu basemhlabeni, ngabita inceku yami Joseph Smith, lomNcane, ngakhuluma naye ngisezulwini, ngamnika imiyaleto;
18 Ngaphindze nganika labanye imiyaleto, kute bamemetele leti tintfo emhlabeni; konkhe loku kute kugcwaliseke, lokwabhalwa baphrofethi—
19 Tintfo letibutsakatsaka temhlaba titawuvela tibhubhise letinemandla naleticinile, kute umuntfu angamyali umlingani wakhe, noma angatsembeli emkhonweni wenyama—
20 Kodvwa kute wonkhe umuntfu akhulume egameni laNkulunkulu iNkhosi, ngisho uMsindzisi wemhlaba;
21 Kute lukholo nalo lwandze emhlabeni;
22 Kute sivumelwano sami saphakadze simiswe;
23 Kute kuphelela kwelivangeli lami kumenyetelwe ngulababutsakatsaka nebantfukatana emhlabeni wonkhe, nangaphambi kwemakhosi nebabusi.
24 Bukani, nginguNkulunkulu futsi ngikukhulumile loku; lemiyaleto isuka kimi, futsi yaniketwa tinceku tami ebutsakatsakeni bato, ngendlela yelulwini lwabo, kute bakhone kucondza.
25 Futsi nangabe bebaphambuka bekungatiswa;
26 Nangabe bebafuna inhlakanipho bebangakhonjiswa;
27 Nangabe bebona bebangajeziswa, kute baphendvuke;
28 Nangabe bebatitfoba bebangentiwa bacine, batfole sibusiso lesivela ezulwini, batfole lwati ngetikhatsi letitsite.
29 Futsi emvakwekutfola umbhalo wemaNefi, yebo, ngisho nenceku yami Joseph Smith lomNcane, bekangaba nemandla ekuhumusha ngemusa waNkulunkulu, nangemandla aNkulunkulu, iNcwadzi yaMormon.
30 Nalabo bebanikwe lemiyaleto, bebangaba nemandla ekubeka sisekelo salelibandla, nekulikhipha ekusitsekeni nasebumnyameni, lokungulona kuphela leliliciniso naleliphilako libandla emhlabeni wonkhe, mine, iNkhosi, lengitfokotako ngalo, ngikhuluma nelibandla lonkhe hhayi ngalinye—
31 Ngoba mine iNkhosi angeke ngisibuke sono ngisivumele ngisho nakancane;
32 Noko, loyo lophendvukako ente imiyaleto yeNkhosi uyawutsetselelwa;
33 Futsi loyo longeke aphendvuke, kuye kuyawutsatfwa ngisho naloko kukhanya lesekakutfolile; ngoba Moya wami angeke asamenta umuntfu aphile, kusho iNkhosi yemaBandla.
34 Ngetulu kwaloko, ngicinisile ngitsi kini, Awu bantfu basemhlabeni: Mine iNkhosi ngitimisele kwembula leti tintfo kubo bonkhe bantfu;
35 Ngoba angikhetsi libala lemuntfu, futsi ngifuna wonkhe umuntfu ati kutsi lusuku luyeta ngekushesha; lihora lisengakefiki, kodvwa selisedvute, lapho kuthula kutawutsatfwa emhlabeni, nadeveli uyawuba nemandla embusweni wakhe.
36 NeNkhosi iyawuba nemandla etikwalabangcwele bayo, futsi iyawubusa emkhatsini wabo, yehle ngekwehlulela etikwe-Edomu, noma umhlaba.
37 Hlolisisani lemiyaleto, ngoba iliciniso futsi yetsembekile, netiphrofetho netetsembiso letikuyo tiyawufezeka tonkhe.
38 Loku mine iNkhosi lengikukhulumile, ngikukhulumile, futsi angicolisi ngalengikushito; noma emazulu nemhlaba kwendlula, livi lami angeke lendlule, kodvwa lonkhe liyawugcwaliseka, noma ngelivi lami noma ngelivi letinceku tami, kuyafana.
39 Ngoba bukani, futsi nibuke, iNkhosi inguNkulunkulu, naMoya uyafakaza, nebufakazi buliciniso, futsi liciniso lihlala phakadze naphakadze. Amen.