Sigaba 34
Sembulo lesaniketwa ngaJoseph Smith umPhrofethi ku-Orson Pratt, eFayette, eNew York, mhlaka 4 Lweti 1830. Umnaketfu Pratt bekaneminyaka lelishumi nemfica budzala ngaleso sikhatsi. Besekaphendvukile aphindze abhajatisiwe ngesikhatsi eva kushunyayelwa kwelivangeli lelibuyiselwe ngumnakabo lomdzala, Parley P. Pratt, emavikini lasitfupha ngaphambilini. Lesembulo lesi satfolakala ekhaya laPeter Whitmer lomDzala.
1–4, Labatsembekile baba ngemadvodzana aNkulunkulu ngeNhlawulo; 5–9, Kushunyayelwa kwelivangeli kulungisa indlela yeKubuya kwesiBili; 10–12, Siphrofetho sita ngemandla aMoya loNgcwele.
1 Ndvodzana yami Orson, lalela uve futsi ubuke loku mine, iNkhosi Nkulunkulu, lengitawukusho kuwe, ngisho Jesu Khristu uMhlengi wakho;
2 Lokukhanya nekuphila kwemhlaba, kukhanya lokukhanya ebumnyameni bumnyama bangakucondzi;
3 Lowatsandza umhlaba wate wanikela ngemphilo yakhe, kute bonkhe labayawukholwa babe ngemadvodzana aNkulunkulu. Ngaloko-ke uyindvodzana yami;
4 Futsi ubisisiwe ngoba ukholiwe;
5 Futsi ubusiswe kakhulu ngoba ubitwe ngimi kutsi ushumayele livangeli lami—
6 Kutsi uphakamise livi lakho njengekukhala kwelicilongo, likhala sikhatsi lesidze futsi likhala kakhulu, ushumayele kuphendvuka esitukulwaneni lesigwegwile nalesiphambene, ulungisa indlela yeNkhosi yekubuya kwayo kwesibili.
7 Ngoba buka, ngicinisile ngicinisile, ngitsi kuwe, sikhatsi sesisedvute kutsi ngite ngelifu ngemandla nangeludvumo lolukhulu.
8 Futsi kuyawuba lilanga lelikhulu ngesikhatsi sekubuya kwami, ngoba tonkhe tive tiyawutfutfumela.
9 Kodvwa ngaphambi kwekufika kwalelo langa lelikhulu, lilanga liyawufiphala, nenyeti ibe bovu njengengati; netinkhanyeti tiyawukwala nekukhanya kwato, letinye tiyawukuwa, nekubhujiswa lokukhulu kulindze lababi.
10 Ngaloko-ke, phakamisa livi lakho ungatibambi, ngoba iNkhosi Nkulunkulu ikhulumile; ngako-ke phrofetha, futsi kutawukwembulwa ngemandla aMoya loNgcwele.
11 Futsi uma wetsembekile, buka, nginawe ngite ngibuye—
12 Futsi ngicinisile, ngicinisile, ngitsi kuwe, ngiyeta masinyane. NgiyiNkhosi neMhlengi wakho. Kunjalo nje. Amen.