Sigaba 35
Sembulo lesaniketwa Joseph Smith umPhrofethi naSidney Rigdon, eFayette noma edvute nakhona, eNew York, mhlaka 7 ngeNgongoni, 1830. Ngalesi sikhatsi umPhrofethi bekamatasatasa cishe onkhe emalanga ahumusha liBhayibheli. Loku kuhumusha kwacalwa ekucaleni kweNhlaba 1830, Oliver Cowdery naJohn Whitmer bebasebente njengebabhali. Njengoba besebabitelwe kuleminye imisebenti, Sidney Rigdon wabitwa ngekukhetfwa lokuvela kuNkulunkulu kutsi asebente njengembhali wemPhrofethi kulomsebenti (buka livesi 20). Njengesendlalelo kulombhalo walesembulo, umlandvo waJoseph Smith utsi: “NgeNgongoni Sidney Rigdon weta [avela e-Ohio] kutawubuta eNkhosini, weta na-Edward Partridge. …Masinyane nje emvakwekufika kwalabazalwane lababili, naku lokwashiwo yiNkhosi.”
1–2, Bantfu bangaba kanjani ngemadvodzana aNkulunkulu; 3–7, Sidney Rigdon ubitelwa kutsi abhabhatise nekutsi anike Moya loNgcwele; 8–12, Tibonakaliso netimangaliso tenteka ngelukholo; 13–16, Tinceku teNkhosi titawubhula tive ngemandla aMoya; 17–19, Joseph Smith uphetse tikhiya tetimfihlakalo; 20–21, Labakhetsiwe batawumelana nelilanga lekubuya kweNkhosi; 22–27, Israyeli utawusindziswa.
1 Lalelani livi leNkhosi Nkulunkulu wenu, ngisho Alfa na-Omega, sicalo nesiphetfo, lo indlela yakhe yinye naphakadze, lofanako namuhla njengayitolo, naphakadze.
2 NginguJesu Khristu, iNdvodzana yaNkulunkulu, lowabetselwa ngenca yetono temhlaba, ngisho bonkhe labatawukholelwa egameni lami, kute babe ngemadvodzana aNkulunkulu, babe munye nami njengoba ngimunye naBabe, njengoba naBabe amunye kimi, kute sibe munye.
3 Buka, ngicinisile, ngicinisile, ngitsi encekwini yami Sidney, ngikubukile kanye nemisebenti yakho. Ngiyivile imithandazo yakho, futsi ngikubekele umsebenti lomkhulu.
4 Ubusisiwe, ngoba utawukwenta tintfo letinkhulu. Buka watfunywa, njengaJohane kuyawulungisa indlela phambi kwami nangaphambi kwa Elija lokufanele ete, futsi bewungakwati loko.
5 Wabhabhatisa ngemanti kubonakalisa kuphendvuka, kodvwa abamtfolanga Moya loNgcwele;
6 Kodvwa manje ngikunika umyaleto, wekutsi utawubhabhatisa ngemanti, bese batfola Moya loNgcwele ngekubekwa tandla, njengebaphostoli basemandvulo.
7 Futsi kuyawukwenteka kutsi kuyawuba khona umsebenti lomkhulu eveni, ngisho nasemkhatsini webeTive, ngoba buwula netinengiso tabo kuyawembuleka emehlweni abo bonkhe bantfu.
8 Ngoba nginguNkulunkulu, futsi umkhono wami awukafinyetwa; ngitawukhombisa timangaliso, netibonakaliso, kubo bonkhe labakholelwa egameni lami.
9 Futsi noma ngubani locelako egameni lami ngekukholwa, bayawukhipha bodeveli; belaphe labagulako, bente timphumphutse titfole kubona kwato, nalabangeva beve, netimungulu tikhulume, netishosha tihambe.
10 Futsi sikhatsi siyeta masinyane lapho tintfo letinkhulu titawukwembulwa kubantfwana bebantfu.
11 Kodvwa ngaphandle kwelukholo kute lokuyawukwembulwa ngaphandle kwencitsakalo eBhabhulona, loyo lowente tonkhe tive tanatsa liwayini lelinenkhanuko yebugwadla bayo.
12 Futsi kute labenta lokuhle ngaphandle kwalabo lasebalungele kwemukela kuphelela kwelivangeli lami, lengilitfumele kulesi situkulwane.
13 Ngaloko-ke, ngibita tintfo letibutsakatsaka temhlaba, labo labangakafundzi nalabadzelelekile, kutsi babhule tive ngemandla aMoya wami;
14 Nemkhono wabo uyawuba ngewami, futsi ngitawuba sihlangu sabo nelihawu labo; ngitawubopha tinkhalo tabo, batawungilwela ngesibindzi; netitsa tabo tiyawuba ngaphansi kwetinyawo tabo; ngitawubawisela inkemba, futsi ngemlilo wentfukutselo yami ngitawubagcina.
15 Nelivangeli liyawushunyayelwa kulabamphofu nalabatitfobile, futsi bayawulindza sikhatsi sekubuya kwami, ngoba sesisondzele—
16 Futsi bayawufundza umfanekiso wesihlahla semkhiwa, ngoba ngisho namanje lihlobo selidvutane.
17 Ngitfumele kuphelela kwelivangeli lami ngesandla senceku yami Joseph; futsi ngimbusisile ebutsakatsakeni;
18 Ngimnike tikhiya temfihlakalo taleto tintfo letivaliwe, ngisho naleto tintfo letisuka ekusekelweni kwemhlaba, netintfo letiyawufika kusuka kulesi sikhatsi kute kube sikhatsi sekubuya kwami, uma ahlala kimi, futsi uma kungenjalo, lomunye ngitawumbeka esikhundleni sakhe.
19 Ngaloko-ke, mugadzeni kute kukholwa kwakhe kungehluleki, futsi kuyawunikwa nguMdvudvuti, Moya loNgcwele, lowati tonkhe tintfo.
20 Futsi ngikunika lomyaleto—kutsi uyawumbhalela, nemibhalo lengcwele iyawukwembulwa, njengoba injalo esifubeni sami, kute kusindziswe labakhetsiwe bami;
21 Ngoba batawuliva livi lami, baphindze bangibone, futsi angeke balale, bayawumelana nelilanga lekubuya kwami; ngoba bayawuhlanjululwa; njengoba nami ngihlambulukile.
22 Manje ngitsi kuwe, hlala naye, utawuhamba nawe; ungamshiyi, futsi noma kanjani leti tintfo titawugcwaliseka.
23 Futsi nangabe ningabhali, bukani, uyawuniketwa kutsi aphrofethe; wena uyawushumayela livangeli lami usebentise baphrofethi labangcwele kutsi bafakaze ngemavi akhe, njengoba ayawuniketwa kuye.
24 Gcinani yonkhe imiyaleto netivumelwano leniboshwe ngato; futsi ngitawukwenta emazulu kutsi atamatame kute nizuze, naSathane uyawutfutfumela neSiyoni lesetikwetintsaba iyawujabula iphumelele;
25 Ne-Israyeli iyawusindziswa ngesami sikhatsi lesifanele; futsi ngesikhiya lengisiniketile bayawuholwa, futsi angeke baphindze bahlazeke nanini.
26 Tfokotani niphindze nijabule, kuhlengwa kwenu sekusondzele.
27 Ningesabi, mhlambi lomncane, umbuso ngewenu ngite ngibuye. Bukani, ngita masinyane. Kunjalo nje. Amen.