¶ 1 NAE toe hoko kiate au ae folofola a Jihova, o behe,

2 Koeha hono uhiga iate kimoutolu, oku mou lea aki ae fakatātā ki he fonua o Isileli, o behe, Kuo kai e he gaahi tamai ae kalebi mahi, bea kuo maninia ae nifo oe fānau?

3 Oku behe e Jihova koe Otua, o hage oku ou moui, e ikai toe aoga ke mou ai ae lea fakatātā koia ki Isileli.

4 Vakai, oku aaku ae laumalie kotoabe; hage oku aaku ae laumalie oe tamai, oku behe foki ae laumalie oe foha oku aaku ia: koe laumalie oku agahala e mate ia.

¶ 5 Ka koeuhi, kabau e agatonu ha tagata, bea ne fai aia oku totonu mo lelei,

6 Bea kuo ikai kai ia i he gaahi mouga, be haga hono mata ki he gaahi tamabua i he fale o Isileli, be te ne tono‘i ae unoho o hono kaugaabi, be te ne ofi ki ha fefine mahaki fakafefine,

7 Bea kuo ikai fakamalohi‘i eia ha taha, ka kuo ne toe age ae mea nae tuku koe fakamooni kiate ia oku fai totogi, bea oku ikai maumau‘i eia i ha fai malohi, kuo ne foaki ene ma ki he fiekaia, bea kuo ne fakakofu ae telefua aki ae kofu;

8 Koia oku ikai foaki ke toe totogi mai, bea te ne ma‘u hano tubu, bea kuo ne taofi hono nima mei he fai kovi, bea kuo ne fai ae fakamāu totonu ae tagata ki he tagata,

9 Kuo ne eveeva i he eku gaahi tuutuuni, bea kuo ne fai ki he eku gaahi fakamāu, ke fai totonu; koia ia oku agatonu, bea koe mooni e fakamoui ia, oku behe e Jihova koe Otua.

¶ 10 Kabau te ne ma‘u ha foha, oku kaihaa, bea oku ne liligi ae toto, o ne fai o tatau ki he gaahi mea ni,

11 Bea oku ikai te ne fai ha mea i he gaahi mea oku totonu ni, ka kuo ne kai i he gaahi mouga, bea kuo ne tono‘i ae unoho o hono kaugaabi,

12 Kuo ne fakamalohi‘i ae majiva moe baea, kuo ne maumau‘i i he fai malohi, bea oku ikai te ne toe age ae mea nae tuku koe fakamooni, bea kuo ne haga hake hono mata ki he gaahi tamabua, bea kuo ne fai fakalielia,

13 Kuo ne atu mea ke toe totogi mai, bea kuo ne ma‘u a hono tubu: bea e moui ia? e ikai te ne moui: kuo ne fai ae gaahi fakalielia ni kotoabe; koe mooni te ne mate; e iate ia be a hono toto.

¶ 14 Bea, vakai, kabau e ma‘u eia ha foha, oku mamata ki he agahala kotoabe kuo fai e he ene tamai, bea oku ne tokaga, ka oku ikai ke ne fai o hage koia,

15 Oku ikai te ne kai i he gaahi mouga be te ne hiki hono mata ki he gaahi tamabua oe fale o Isileli, be te ne tono‘i ae unoho o hono kaugaabi,

16 Oku ikai te ne fakamalohi‘i ha toko taha, be te ne taofi kiate ia ae mea nae tuku koe fakamooni, be te ne maumau i ha fai malohi, ka kuo ne foaki a ene ma ki he fiekaia, bea kuo ne fakakofu ae telefua aki ae kofu,

17 Kuo ne taofi a hono nima mei he majiva, bea oku ikai te ne ma‘u ha totogi taetotonu, be hano tubu, ka kuo fai eku gaahi fakamāu, mo eveeva i he eku gaahi tuutuuni: e ikai mate ia koeuhi koe fai kovi a ene tamai, koe mooni e moui be ia.

18 Ka ko ene tamai, koeuhi naa ne fakamalohi kakaha, o ne maumau hono tokoua i he fai malohi, bea naa ne fai aia nae ikai lelei i he haohaoga o hono kakai, vakai, e mate mooni ia i he ene fai kovi.

¶ 19 Ka oku mou behe, Koeha? ikai oku fua e he foha ae fai kovi a ene tamai? Oka fai e he foha aia oku lelei mo totonu, bea kuo ne tauhi eku gaahi fekau, mo ne fai ki ai, e moui mooni ia.

20 Koe laumalie koia e agahala, e mate ia. E ikai fua e he foha ae fai kovi a ene tamai, bea e ikai fua e he tamai ae fai kovi ae foha: koe maonioni ae maonioni e iate ia be, bea koe fai kovi ae agahala e iate ia be.

¶ 21 Ka koeni, kabau e tafoki ae agahala mei he agahala kotoabe kuo ne fai, bea tauhi eia eku gaahi fekau, mo ne fai aia oku lelei mo totonu, koe mooni e fakamoui ia, e ikai jii mate ia.

22 Ko ene gaahi agahala kotoabe aia kuo ne fai, e ikai toe lau ia kiate ia: e moui be ia, koe mea i he ene maonioni aia kuo ne fai.

23 He oku ou ma‘u ha momoi fiemalie jii i he mate ae agahala? Oku behe e Jihova koe Otua, ka e ikai mua, ke tafoki ia mei hono hala, bea moui?

24 Ka i he liliu ae maonioni mei he ene maonioni mo ne fai agahala, bea ne fai o tatau moe fakalielia kotoabe aia oku fai e he tagata agahala, e moui ia? Ko ene maonioni kotoabe aia kuo ne fai, e ikai ha lau ki ai: i he fai kovi kuo ne fai, moe agahala, kuo ne agahala ai, e mate be ia i ai.

¶ 25 Ka oku mou behe, Oku ikai fai tatau ae aga a Jihova. Koeni, fanogo, e fale o Isileli: Ikai oku tatau a eku aga? Ikai ko hoo mou aga amoutolu oku fai kehekehe?

26 Oka liliu ae tagata maonioni mei he ene maonioni o ne fai agahala, bea mate ai ia; ko ene agahala kuo ne fai, koia ia te ne mate ai.

27 Bea behe, oka liliu ae tagata agahala mei he ene agahala aia kuo ne fai, mo ne fai aia oku lelei mo totonu e fakamoui eia a hono laumalie ke moui.

28 Koeuhi kuo ne tokaga, mo liliu mai mei he ene agahala kotoabe aia naa ne fai, e moui mooni ia, e ikai aubito te ne mate.

29 Ka oku behe be e he fale o Isileli, Oku ikai fai tatau ae mea a Jihova. E fale o Isileli, Ikai oku fai tatau a eku aga? Ikai ko hoo mou aga amoutolu oku fai kehekehe?

30 Koia teu fakamāu ai akimoutolu, e fale o Isileli, o fakatatau ki ho mou hala taki taha, oku behe e Jihova koe Otua. Fakatomala bea fakatafoki akimoutolu mei hoo mou gaahi agahala; koia e ikai hoko ai hoo mou agahala ko ho mou auhaaga.

¶ 31 Liaki meiate kimoutolu a hoo mou agahala kotoabe, aia kuo mou fai hala ai; bea gaohi kiate kimoutolu ae loto foou bea moe laumalie foou: he koeha te mou fie mate ai e fale o Isileli?

32 He oku ikai teu fiemalie i he mate oia oku mate, oku behe e Jihova koe Otua: koia fakatafoki akimoutolu, bea mou moui.