¶ 1 BEA nae hoko o behe i hono fitu oe ta‘u, i hono nima oe mahina, bea i hono hogofulu oe aho i he mahina, nae ha‘u ai ae niihi i he kau mātua o Isileli ke fakafehui kia Jihova, bea naa nau nofo i hoku ao.

2 Bea nae hoko mai kiate au ae folofola a Jihova, o behe,

3 Foha oe tagata, lea ki he kau mātua o Isileli, bea ke behe kiate kinautolu, Oku behe e Jihova koe Otua; kuo mou ha‘u ke fakafehui kiate au? Oku behe e Jihova koe Otua, Hage oku ou moui, e ikai teu tali ha fakafehui meiate kimoutolu.

¶ 4 Ikai te ke fakahalaia akinautolu, e foha oe tagata, ikai te ke fakahalaia akinautolu? Fakailo kiate kinautolu ae fakalielia oe nau gaahi tamai:

5 Bea ke behe kiate kinautolu, Oku behe e Jihova koe Otua; I he aho koia naaku fili a Isileli, beau hiki hake hoku nima ki he hako oe fale o Jekobe, bea naaku fakaha au kiate kinautolu i he fonua ko Ijibite, i he eku hiki hake hoku nima kiate kinautolu, beau behe, Ko au, ko Jihova, ko ho mou Otua;

6 I he aho naaku hiki hake hoku nima kiate kinautolu, keu omi akinautolu mei he fonua ko Ijibite, ki ha fonua neu fili mai mo onautolu, nae fetafeaki ai ae hua huho moe honi, aia koe fugani i he fonua kotoabe.

7 Bea naaku toki behe ai kiate kinautolu, Liaki atu ekimoutolu, e he tagata taki taha ae gaahi mea fakalielia oku ne jio ki ai, bea oua naa fakauli akimoutolu i he gaahi tamabua o Ijibite: Ko au ko Jihova, ko ho mou Otua.

8 Ka naa nau agatuu kiate au, bea nae ikai te nau fanogo kiate au: nae ikai ke liaki taki taha e he tagata, ae gaahi fakalielia naa nau jio ki ai, bea nae ikai liaki‘i ekinautolu ae gaahi tamabua o Ijibite: koia naaku behe ai, teu liligi atu hoku houhau kiate kinautolu, ke fai eku houhau kiate kinautolu i he lotolotoga oe fonua ko Ijibite.

9 Ka naaku gaue koeuhi ko hoku huafa, koeuhi ke oua naa fakalielia ia i he ao oe hiteni, aia naa nau nofo ai, akinautolu naaku fakaha au i ho nau ao kiate kinautolu, i he eku omi akinautolu mei he fonua ko Ijibite.

10 Koia naaku behe ai ke nau alu atu mei he fonua ko Ijibite, beau omi akinautolu ki he toafa.

11 Bea naaku foaki kiate kinautolu eku gaahi fekau, beau fakailo kiate kinautolu a hoku finagalo, aia ka fai e he tagata te ne moui mooni mei ai.

12 Bea naaku foaki foki kiate kinautolu a hoku gaahi aho tabu, koe fakailoga kiate kinautolu mo au, ke nau ilo ko au ko Jihova, oku fakamaonioni‘i akinautolu.

13 Ka nae agatuu ae fale o Isileli kiate au i he toafa: nae ikai te nau alu i he eku gaahi fekau, bea naa nau baetaku ki hoku finagalo, aia ka fai ki ai ae tagata, te ne moui mooni mei ai; bea nae fakalielia i lahi aubito a hoku gaahi aho tabu: koia neu behe, teu liligi hoku houhau kiate kinautolu i he toafa, ke nau auha ai.

14 Ka naaku gaue koeuhi ko hoku huafa, ke oua naa fakalielia‘i ia i he ao oe hiteni, akinautolu naaku omi ai akinautolu i ho nau ao.

15 Kae umaa foki, naaku hiki hake hoku nima kiate kinautolu i he toafa, koeuhi keu omi akinautolu ki he fonua naaku foaki kiate kinautolu oku fetafeaki ai ae hua huhu moe honi, aia koe fugani i he fonua kotoabe;

16 Koeuhi naa nau baetaku ki hoku finagalo, bea nae ikai te nau alu i he eku gaahi fekau, ka naa nau fakauli‘i hoku gaahi aho tabu: he nae muimui ho nau loto ki ho nau gaahi tamabua.

17 Ka ne ogo ia, nae mamae hoku mata kiate kinautolu, ke oua naa fakaauha akinautolu, bea nae ikai teu fakaojioji akinautolu i he toafa.

18 Ka naaku behe ki he e nau fānau i he toafa, Oua naa mou muimui i he gaahi fekau a hoo mou gaahi tamai, bea oua naa fai ki ho nau loto, be te mou fakalielia‘i aki akimoutolu a ho nau gaahi tamabua;

19 Ko au ko Jihova ko ho mou Otua; eveeva i he eku gaahi fekau, bea tauhi ki hoku finagalo ke fai ki ai;

20 Bea fakatabu‘i a hoku gaahi aho tabu; bea e tuku ia koe fakailoga kiate kimoutolu mo au, koeuhi ke mou ilo, ko au, ko Jihova, ko ho mou Otua.

21 Ka ne ogo ia nae agatuu ae fānau kiate au: nae ikai te nau eveeva i he eku fekau, be te nau tauhi ki hoku finagalo, ke fai ki ai, aia ka fai e he tagata, te ne moui mooni mei ai; naa nau fakauli‘i hoku gaahi aho tabu: koia neu behe ai, teu liligi hoku houhau kiate kinautolu, ke fai eku houhau kiate kinautolu i he toafa.

22 Ka naa moia, neu taofi ki hoku nima, beau gaue koeuhi ko hoku huafa, ke oua naa fakalielia‘i ia i he ao oe hiteni, akinautolu naaku omi ai akinautolu i ho nau ao.

23 Bea naaku hiki hake foki a hoku nima kiate kinautolu i he toafa, koeuhi keu fakahe‘i akinautolu ki he lotolotoga oe gaahi hiteni, bea fakamovetevete akinautolu ki he gaahi fonua;

24 Koeuhi nae ikai te nau fai hoku finagalo, ka naa nau manuki‘i a eku gaahi fekau, mo nau fakauli‘i a hoku gaahi aho tabu, bea nae muimui a ho nau mata ki he gaahi tamabua oe nau gaahi tamai.

25 Koia naaku tuku kiate kinautolu ae gaahi fekau nae ikai lelei, moe tuutuuni e ikai te nau moui ai;

26 Bea naaku fakalielia‘i akinautolu i he e nau gaahi feilaulau anautolu, koe mea i he e nau tuku ke alu atu i he afi aia kotoabe nae ha‘u mei he manāva, koeuhi keu fakatokilalo akinautolu, koeuhi ke nau ilo ko au ko Jihova.

¶ 27 Koia, foha oe tagata, lea atu ki he fale o Isileli, bea ke behe kiate kinautolu, Oku behe e Jihova koe Otua: Koe mooni, koe mea eni kuo takua noa au e hoo mou gaahi tamai, koeuhi kuo nau fai ae agahala kiate au.

28 He nae hili eku omi akinautolu ki he fonua, aia naaku hiki hake ai hoku nima kiate kinautolu, keu foaki ia kiate kinautolu, bea nau toki mamata ki hono gaahi botu maoluga kotoabe, moe vao akau matolu, bea naa nau atu i ai e nau gaahi feilaulau, bea nau fai i ai ae fakahouhau i he e nau gaahi feilaulau: nae gaohi foki i ai e nau fakanamu kakala, o nau liligi i ai e nau gaahi feilaulau inu.

29 Bea naaku toki lea kiate nautolu, Koeha ae botu maoluga koia, aia oku mou alu ki ai? Bea oku ui ia ko Bama, o a‘u mai ki he aho ni.

¶ 30 Koia, lea ki he fale o Isileli, Oku behe e Jihova koe Otua; kuo mou fakalielia o hage ko hoo mou gaahi tamai? bea oku mou fai feauaki o hage koe nau gaahi fakalielia?

31 He ka mou ka atu hoo mou gaahi feilaulau, bea ka mou ka tuku ke alu atu i he afi a ho mou gaahi foha, oku mou fakalielia‘i akimoutolu mo ho mou gaahi tamabua, o a‘u mai ki he aho ni: bea e fakafehui au ekimoutolu, e fale o Isileli? Oku behe e Jihova koe Otua, hage oku ou moui, e ikai teu tali haa mou fakafehui kiate au.

32 Bea koia oku i ho mou loto ke fai, e ikai aubito hoko ia, aia oku mou lea aki, Te mau hage koe hiteni, o hage koe gaahi faahiga i he gaahi fonua, oku tauhi ki he akau moe maka.

¶ 33 Oku behe e Jihova koe Otua, o hage oku ou moui, teu bule‘i mooni aki akimoutolu ae nima malohi, bea moe nima kuo mafao, moe liligi atu oe houhau.

34 Bea teu omi akimoutolu mei he kakai, bea teu tanaki akimoutolu mei he gaahi fonua kuo mou he ki ai, aki ae nima malohi moe nima kuo mafau, bea moe liligi atu oe houhau.

35 Bea teu omi akimoutolu ki he toafa oe kakai, bea te ta fai mo koe i ai koe mata ki he mata.

36 Hage ko eku fai mo hoo mou gaahi tamai i he toafa oe fonua ko Ijibite, e behe a eku fai mo kimoutolu, oku behe e Jihova koe Otua.

37 Bea teu bule ke mou alu atu i he lolo vaa akau, bea teu omi akimoutolu ke mou buke ki he eku fuakava:

38 Bea teu fakamaa akimoutolu mei he kau agatuu mo kinautolu oku fai agahala kiate au: Teu omi akinautolu mei he fonua oku nau aunofo ai, bea e ikai te nau hu atu ki he fonua o Isileli; bea te mou ilo ko Jihova au.

39 Bea koe mea kiate kimoutolu, e fale o Isileli, Oku behe e Jihova koe Otua; Alu akimoutolu, tauhi taki taha ki hono tamabua, o fai ki mui foki, o kabau e ikai te mou fanogo kiate au: kae oua naa mou toe fakalielia‘i a hoku huafa tabuha i hoo mou feilaulau, bea mo ho mou gaahi tamabua.

40 Koeuhi e tauhi au e he fale kotoa o Isileli, i hoku mouga maonioni, i he mouga oe maoluga o Isileli, oku behe e Jihova koe Otua: teu ma‘u akinautolu i ai, bea teu amanaki i ai ki hoo mou gaahi feilaulau, moe inaji mei hoo mou mea foaki, mo hoo mou mea maonioni kotoabe.

41 Teu ma‘u akimoutolu mo hoo mou namu kakala, o kau ka omi akimoutolu mei he kakai, bea tanaki akimoutolu mei he gaahi fonua aia kuo mou he ki ai, bea e fakamaonioni‘i au iate kimoutolu i he ao oe hiteni.

42 Bea te mou ilo ko au ko Jihova, o kau ka toe omi akimoutolu ki he fonua o Isileli, ki he fonua koia, naaku hiki hake ai hoku nima, ke foaki ia ki hoo mou gaahi tamai.

43 Bea te mou manatu i ai ki ho mou gaahi hala, bea mo hoo mou faiaga, aia kuo mou fakalielia ai; bea te mou fehia kiate kimoutolu i ho mou ao be omoutolu, koeuhi koe gaahi kovi aia kuo mou fai.

44 Bea te mou ilo, ko au, ko Jihova, o kau ka gaue kiate kimoutolu, koeuhi ko hoku huafa, ka e ikai ke hage ko ho mou gaahi hala kovi, be hage ko hoo mou fai fakalielia, e fale o Isileli; oku behe e Jihova koe Otua.

¶ 45 Bea nae hoko mai foki ae folofola a Jihova kiate au, o behe,

46 Foha oe tagata, fakahaga ho mata ki he feituu toga, bea tuku hoo lea ki he feituu toga, bea ke kikite ki he vao akau oe goue i he feituu toga;

47 Bea lea ki he vao akau i he feituu toga, Fanogo ki he folofola a Jihova; Oku behe e Jihova koe Otua; Vakai, teu tutu ae afi iate koe, bea e maumau ai ae akau mata kotoabe oku iate koe, moe akau momoa kotoabe; e ikai fuifui ae afi ulo, bea e magia ai ae mata kotoabe, mei he feituu toga o a‘u ki he tokelau.

48 Bea e mamata e he kakai kotoabe ko au, ko Jihova, kuo tutu ia; bea e ikai fuifui ia.

49 Bea naaku toki behe ai, Oiaue, e Jihova koe Otua! oku nau behe kiate au, Ikai oku lea ia i he fakatātā be?