¶ 1 NAE toe hoko foki ae folofola a Jihova kiate au, o behe,

2 Foha oe tagata, lea ki he fānau a hoo kakai, bea ke behe kiate kinautolu, Kabau teu omi ae heleta ki ha fonua, bea e vahe‘i e he kakai oe fonua ha tagata i ho nau botu fonua, bea tuku ia ko ho nau tagata leo:

3 Bea kabau i he ene jio oku ha‘u ae heleta ki he fonua, bea oku ne ifi ae mea lea, mo tala ki he kakai;

4 Ka behe, koia kotoabe oku fanogo ki he ba mai ae mealea, ka oku ikai tuitala; kabau e hoko mai ae heleta, bea teia aki ia, e i hono tumuaki be oona a hono toto.

5 He naa ne fanogo ki he le‘o oe mea lea ka nae ikai valokia ai ia: e iate ia be a hono toto. Ka koia oku tuitala e fakamoui eia a hono laumalie.

6 Bea kabau e jio ae tagata leo oku ha‘u ae heleta, ka oku ikai ifi eia ae mealea, bea oku ikai ha tala ki he kakai: kabau e hoko mai ae heleta o teia aki ha taha iate kinautolu, e ave mooni ia i he ene hia, ka ko hono toto teu eke ki ai ki he nima oe tagata leo.

7 Bea oku behe, E foha oe tagata, kuou tuku koe koe leo ki he fale o Isileli; koia te ke fanogo ki he folofola mei hoku fofoga, bea ke valoki‘i akinautolu meiate au.

8 O kau ka behe ki he agahala, E agahala koe mooni te ke mate koe; kabau e ikai te ke lea koe ke valoki‘i ae agahala mei hono hala, e mate ae agahala koia i he ene hia, ka teu eke‘i hono toto mou ho nima oou.

9 Ka koeni, kabau te ke valoki ae agahala ke liliu mei hono hala; bea kabau e ikai tafoki ia mei hono hala e mate mooni ia i he ene hia; ka kuo ke fakatonuhia‘i ekoe a ho laumalie.

¶ 10 Koia, E foha oe tagata, ke ke lea ki he fale o Isileli; oku mou lea, o behe, Kabau oku iate kimautolu be e mau fai kovi moe mau agahala, bea oku mau fakaaau ai ki mui, bea ta koe umaa e mau moui?

11 Lea kiate kinautolu, Oku behe e Jihova koe Otua, hage oku ou moui, oku ikai teu fiemalie i he mate ae agahala; ka i he tafoki ae agahala mei hono hala ke ne moui: tafoki mai, tafoki mai mei ho mou hala kovi: he koeha te mou fie mate ai, e fale o Isileli?

12 Koia, akoe foha oe tagata, ke ke behe ki he fānau a hoo kakai, E ikai fakamoui aki ae maonioni a ene maonioni i he aho o ene fai hala: bea koeuhi koe fai hala ae agahala, e ikai te ne higa ai i he aho koia oku ne tafoki mei he ene agahala; bea e ikai faa moui ae maonioni i he aho oku ne agahala ai.

13 O kau ka behe e au ki he maonioni, koe mooni te ne moui; ka oku ne falala be ia ki he ene maonioni aana, mo ne fai hala, ko ene maonioni kotoabe e ikai manatu‘i; ka e mate be ia, i he ene kovi aia kuo ne fai.

14 Mo eni foki, o kau ka behe e au ki he agahala, koe mooni te ke mate koe; bea kabau te ne tafoki mei he ene agahala, bea fai eia aia oku totonu mo lelei;

15 Ka toe atu e he agahala ae mea nae tuku koe fakamooni, mo ne toe atu aia naa ne kaihaaji, mo ne eveeva i he fekau oe fakamoui, o ikai ke toe fai hala; koe mooni e moui be ia, e ikai jii te ne mate.

16 E ikai toe lau kiate ia ha taha i he gaahi agahala aia kuo ne fai: kuo ne fai aia oku totonu mo lelei: koe mooni te ne moui.

¶ 17 Ka oku behe e he fānau a hoo kakai, Oku ikai fai tatau ae ulugaaga a Jihova: ka ko kinautolu ia oku fai kehekehe e nau aga.

18 Oka tafoki aia oku maonioni mei he ene maonioni, mo ne fai hala, e mate mooni ai ia.

19 Ka koe agahala oka tafoki mai ia mei he ene agahala, mo ne fai eia aia oku totonu mo lelei, e moui ai ia.

20 Ka oku mou behe, Oku ikai fai tatau ae ulugaaga a Jihova. E fale o Isileli, teu fakamāu akimoutolu o fakatatau ki ho mou hala taki taha.

¶ 21 Bea i he ene hoko ki hono hogofulu ma ua ta‘u oe mau bobula, i hono hogofulu oe mahina, bea mo hono nima oe aho i he mahina, nae ha‘u kiate au, ha toko taha nae hao mai mei Jelusalema, mo ne behe mai, Kuo kaba ae kolo.

22 Ka koeni, i he heeki ai ke ha‘u aia nae hola mai nae iate au ae nima o Jihova, i he efiafi bouli; bea nae matoo a hoku gutu, o a‘u ki he ene hoko mai i he bogibogi; nae matoo a hoku gutu, nae ikai teu kei noa.

23 Bea nae toki omi ia ae folofola a Jihova kiate au, o behe,

24 Foha oe tagata, ko kinautolu oku nofo ki he gaahi botu liaki o Isileli, oku lea o behe, Nae toko taha be a Ebalahame, bea ne ma‘u eia ae fonua: ka oku mau toko lahi; kuo foaki mai ae fonua ko ho mau tofia.

25 Koia ke ke lea kiate kinautolu. Oku behe e Jihova koe Otua; Oku mou kai moe toto, mo haga hake ho mou mata ki ho mou gaahi tamabua, mo liligi toto: bea e omoutolu koa ae fonua?

26 Oku mou tuu mo hoo mou heleta, oku mou fai mea fakalielia, bea oku mou tono‘i kotoabe ae unoho o hono kaugaabi: bea e omoutolu koa ae fonua?

27 Ke ke lea o behe kiate kinautolu, Oku behe e Jihova koe Otua; Ko au eni, oku ou moui, bea koe mooni e to hifo i he heleta, akinautolu oku i he gaahi botu lala, bea mo ia oku i he ataatā oe goueaga, teu foaki ia koe mea kai ki he faga manu, bea ko kinautolu e i he kolo tau, be i he gaahi ana‘i maka te nau mate i he mahaki fakaauha.

28 He teu fakatokilalo ae fonua ke lala aubito, bea e gata ae fakaeieiki o hono malohi; e gaogao ae gaahi mouga o Isileli, e ikai ha taha e alu atu ai.

29 Bea te nau toki ilo ko Jihova au, o kau ka fakatokilalo ae fonua ke lala aubito, koeuhi koe gaahi mea fakalielia aia kuo nau fai.

¶ 30 Ko eni foki, akoe foha oe tagata, oku kei felauikovi aki koe e he fānau a hoo kakai i he vee a, bea i he mataba kotoabe oe fale, mo nau fealeleaaki mo taki taha behe ki hono kaiga, o behe, Oku ou kole ke mou ha‘u ke tau fanogo ki ha folofola oku omi mei a Jihova.

31 Bea oku nau ha‘u kiate koe o hage koe ha‘u ae kakai, bea oku nau nofo i ho ao o hage ko hoku kakai, bea oku nau fanogo ki hoo gaahi lea, ka oku ikai te nau fie fai ki ai: he oku nau fakaha aki ho nau gutu ae ofa lahi, ka oku muimui ho nau loto ki he e nau manumanu.

32 Bea vakai, oku ke tatau kiate kinautolu moe faji malie lahi a ha taha oku le‘o malie, mo faa ta ke malie ae mea tatagi: he oku nau fanogo ki hoo gaahi lea, ka oku ikai te nau fai ki ai.

33 Bea ka hoko mai ae mea ko eni, (vakai, e hoko be ia,) te nau toki ilo, ta nae ai ha balofita iate kinautolu.