¶ 1 BEA nae hoko mai ae folofola a Jihova kiate au, o behe,

2 Foha oe tagata, fakahaga ho mata kia Koki, ae fonua ko Mekoki, aia oku eiki lahi hake ia Meseke, bea mo Tubale, bea kikite kiate ia,

3 Mo ke behe, Oku behe e Jihova koe Otua; Vakai, e Koki, oku ou tuu au kiate koe, akoe koe eiki lahi i Meseke, bea mo Tubale;

4 Bea teu fakafoki koe ki mui, bea teu ai ae mātau ki ho gutu, bea teu fuji mai akoe, mo hoo kau tau kotoabe, ae faga hose, moe kau heka hose, akinautolu kotoabe oku kofu fakaeieiki, io, ae fuu toko lahi oku too ae fakaū moe ba, bea oku nau taki taha too moe heleta i ho nau nima;

5 A Beasia, mo Itiobea, mo Libea, fakataha mo kinautolu; oku ai kotoabe ekinautolu ae ba, moe tatā ki he tau:

6 A Komela, bea mo ene gaahi matatau; ae fale o Tokama mei he feituu tokelau, mo ene faahitau aana; bea moe kakai toko lahi kuo fakataha mo koe.

7 Ke ke teuteu be koe, bea ke teuteu be maau, akoe, moe kakai kotoabe kuo fakataha mai kiate koe, bea ke leohi ekoe kiate kinautolu.

¶ 8 Hili ae gaahi aho lahi e fai ae aahi kiate koe: te ke toe hoko mai i he gaahi ta‘u fakamui, ki he fonua kuo fakamoui mai mei he heleta, bea e tanaki koe mei he gaahi kakai toko lahi, ki he gaahi mouga o Isileli, aia nae lala o fuoloa: io, e omi ia mei he gaahi buleaga, bea te nau nofo malu kotoabe akinautolu.

9 Te ke alu hake, bea hoko mai o hage koe taufa matagi, bea te ke hage koe ao ke ufiufi ae fonua, akoe, mo hoo gaahi matatau, moe kakai toko lahi e fakataha mo koe.

10 Oku behe e Jihova koe Otua; e hoko foki o behe, i he kuoga be koia, e hu ae gaahi mea ki ho loto, bea te ke fakakaukau ai ki ha gaue kovi:

11 Bea te ke lea o behe, Teu alu hake ki he fonua oe gaahi kolo oku ikai a‘i; teu alu kiate kinautolu oku mālōlō, mo nofo fiemalie, akinautolu oku nofo, oku ikai ha nau a, be ha sogo, be ha mataba,

12 Koeuhi keu vete ia, mo ma‘u ha koloa; ke ai hoku nima ki he gaahi botu lala kuo fakakakai, bea moe kakai aia kuo tanaki mei he gaahi buleaga, akinautolu kuo ma‘u ae faga manu moe koloa, bea oku nau nofo i he lotolotoga oe fonua.

13 E behe mai kiate koe e Siba, mo Tetani, moe kau fakatau i Tasisi, moe faga laione mui kotoabe oku i ai, Kuo ke ha‘u koe ke fai ha vete? kuo ke fakataha hoo kakai ke ma‘u malohi ha koloa? ke fetuku mo ave ha siliva mo ha koula, ke ave ae faga manu moe koloa, bea ke ave moe mea lahi aubito?

14 Koia, foha oe tagata, kikite, bea ke behe kia Koki, Oku behe e Jihova koe Otua; e ikai te ke ilo i he aho koia, e nofo fiemalie a hoku kakai ko Isileli?

15 Bea te ke ha‘u mei ho botu i he feituu tokelau, akoe, moe kakai toko lahi e fakataha mo koe, koe kau heka hose kotoabe akinautolu, koe fuu toko lahi aubito, bea koe kau tau malohi:

16 Bea te ke hoko hake ki hoku kakai ko Isileli, o hage koe ao ke ufiufi ae fonua; e hoko ia i he gaahi aho fakamui, bea teu omi koe ke tau‘i a hoku fonua, koeuhi ke ilo‘i au e he hiteni, oka fakaogoogolelei‘i au ekoe, E Koki, i ho nau ao.

17 Oku behe e Jihova koe Otua; ko koe ia aia naaku lea ki ai i mua i he eku kau tamaioeiki koe kau balofita o Isileli, akinautolu nae kikite i he gaahi aho koia ki ha gaahi ta‘u lahi, o behe, Teu omi koe ke tau‘i akinautolu.

18 Bea e hoko o behe foki i he kuoga be koia, e ha‘u a Koki ki he fonua o Isileli ke tau‘i ia, oku behe e Jihova koe Otua, e alu hake foki ae houhau i hoku fofoga.

19 He kuou lea i he eku fuaa, bea moe kakaha o hoku tubutamaki, Koe mooni e ai ae galulu fakamanavahe i he fonua o Isileli i he aho koia;

20 Koia e tetetete ai i hoku ao ae gaahi ika oe tahi, moe faga manu buna oe lagi, ae faga manu oe vao, moe mea totolo kotoabe, oku gaolo i he fuga o mamani, bea moe kakai kotoabe oku i he fuga o mamani, bea e holoki hifo ae gaahi mouga, bea e holo moe gaahi botu lilifa, bea e higa ki lalo ki he kelekele ae gaahi a kotoabe.

21 Bea teu ui mai ae heleta kiate ia, i hoku gaahi mouga kotoabe, oku behe e Jihova koe Otua: e tuu taki taha ae tagata mo ene heleta ke tau‘i a hono tokoua.

22 Bea teu fai mo ia i he mahaki fakaauha moe liligi toto; bea teu fakauha kiate ia, mo ene gaahi matatau, bea moe kakai kotoabe oku fakataha mo ia, koe lovai fakamanavahe, moe uha maka lalahi, moe afi, moe sulifa.

23 E behe a eku fakaogoogolelei‘i au e au be, mo hoku fakamaonioni‘i; bea e ilo‘i au e he mata oe gaahi buleaga lahi, bea te nau ilo ko Jihova au.