¶ 1 BEA hili ia naa ne omi au ki he mataba, ae mataba aia oku haga atu ki he botu hahake:

2 Bea vakai, nae malama mai ae nāunāu oe Otua o Isileli mei he hala mei he botu hahake: bea nae tatau hono le‘o moe uulu ae gaahi vai lahi: bea nae ulo a mamani koe mea i hono nāunāu.

3 Bea nae tatau a ene ha mai moe mea ha mai naaku mamata ki ai, io, o tatau moe mea ha mai naaku mamata ai i he eku ha‘u ke kikite ki he fakaauha oe kolo: bea nae tatau hono gaahi mea nae ha mai, mo ia naaku mamata ki ai i he vee vaitafe ko Kiba; bea neu to hifo ki hoku mata.

4 Bea nae haele mai ae nāunāu o Jihova o hu ki he fale i he hala oe mataba aia oku haga atu ki he botu hahake.

5 Koia nae hiki hake ai au e he laumalie, o ne ave au ki he lotoa ki loto; bea vakai, nae fakabito aki ae nāunāu o Jihova ae fale kotoa.

6 Bea naaku fanogo ki he ene folofola mai mei loto fale; bea naa ma tutuu moe tagata.

¶ 7 Bea naa ne behe mai kiate au, Foha oe tagata, koe botu o hoku afioaga, moe botu ki hoku aofiva‘e, aia teu nofo ai i he lotolotoga oe fānau a Isileli o taegata, bea mo hoku huafa maonioni, e ikai toe fakauli e he fale o Isileli, akinautolu, be ko ho nau gaahi tu‘i, i he e nau fai feauaki, be koe agaaga o ho nau gaahi tu‘i i ho nau gaahi botu maoluga.

8 He koe mea i he e nau fokotuu e nau mataba ki he eku mataba, moe nau gaahi bou ki he eku gaahi bou, bea moe a i ho mau vahaa mo kinautolu, bea kuo nau fakalielia‘i a hoku huafa maonioni i he e nau gaahi fakalielia kuo fai: koia naaku fakaauha ai akinautolu i he houhau.

9 Ka koeni, ka tuku atu ekinautolu e nau gaahi mea fakalielia, moe agaaga o ho nau gaahi tu‘i, ke mamao meiate au, bea teu toki nofo au i ho nau lotolotoga o taegata.

¶ 10 Akoe foha oe tagata, fakaha ae fale ki he fale o Isileli, koeuhi ke nau ma ki he e nau gaahi kovi: bea tuku ke nau fua ae fakatātā.

11 Bea kabau te nau ma i he mea kotoabe kuo nau fai, fakaha kiate kinautolu a hono aga oe fale, mo hono fakafuofua, a hono gaahi hala ki tua mo hono gaahi hala ki loto, mo hono aga kotoabe, mo hono tuutuuni kotoabe, bea mo hono gaahi fono kotoabe: bea ke tohi ia i ho nau ao, koeuhi ke nau fai ki hono aga kotoabe, bea mo hono tuutuuni kotoabe, mo nau fai ki ai.

12 Koeni ae fono oku kau ki he fale; Iloga a hono gataaga takatakai hake oe tumutumu oe mouga, e tobu tabu aubito ia. Vakai koe fono eni ki he fale.

¶ 13 Bea ko hono fakafuofua eni oe gaahi feilaulauaga o lau ki hono kiubite: bea koe kiubite, koe kiubite oku taha bea moe aofinima katoa e taha; ko hono takele koe kiubite e taha, bea ko hono laulahi koe kiubite e taha, bea ko hono taba fakatali aia e takatakai aki koe haga e taha ia; bea koe mea ia ki hono botu ki oluga oe feilaulauaga.

14 Bea ko hono fua mei he fuga kelekele o hoko hake ki hono uluaki hala fakatakamilo, koe kiubite ia e ua, bea ko hono laulahi koe kiubite e taha; bea mei he hala jii o a‘u ki he hala lahi koe kiubite ia e fa, bea koe kiubite e taha a hono laulahi.

15 Bea koe fuga feilaulauaga koe kiubite ia e fa; bea e alu hake mei he feilaulauaga ae nifo e fa.

16 Bea ko hono loloa oe feilaulauaga koe kiubite e hogofulu ma ua, moe hogofulu ma ua a hono laulahi, koeuhi ke botubotu malie hono botu e fa.

17 Bea ko hono hala takatakai ko hono loloa koe kiubite e hogofulu ma fa, bea ko hono laulahi i hono botu e fa, koe kiubite e hogofulu ma fa; bea koe taba fakatali e takatakai ai koe vaeuamalie oe kiubite; bea ko hono botu ki lalo koe kiubite e taha, o takatakai hake; bea e hagatonu hono hala tuuga ki he botu hahake.

¶ 18 Bea naa ne behe kiate au, Foha oe tagata, Oku behe e Jihova koe Otua; Koeni ia a hono tuutuuni oe feilaulauaga i he aho koia e gaohi ai ia, ke atu i ai ae feilaulau tutu, bea ke luluku aki ia ae toto.

19 Bea koe kau taulaeiki ae kau Livai, oku oe hako o Satoki, akinautolu oku unuunu mai ke gaue kiate au, Oku behe e Jihova koe Otua, te ke atu ki ai ae bulu mui koe feilaulau koeuhi koe agahala.

20 Bea te ke too a hono toto oona, o bani aki ia a hono nifo e fa, moe tuliki e fa oe hala takatakai, bea moe taba fakatali oku takatakai aki ia: e behe a hono fakamaa mo hono fufulu.

21 Te ke too foki ae bulu oku feilaulau aki i he agahala, bea te ne tutu ia i he botu fale oku tuku ki ai i he tua botu tobu tabu.

22 Bea i hono aho ua te ke feilaulau aki ae uhiki‘i koji tae hano mele, koe feilaulau ia i he agahala; bea te nau fufulu ae feilaulauaga o hage koia nae fai i he atu ae bulu.

23 Bea ka hili a hoo fakamaa ia, te ke atu ha bulu mui oku tae hano mele, moe sibi tagata mei he faga sibi oku tae hano mele.

24 Bea te mou atu ia i he ao o Jihova, bea e li e he kau taulaeiki ha masima ki ai, bea te nau o hake ia kia Jihova, koe feilaulau tutu kiate ia.

25 Bea koe aho e fitu mo hoo teuteu i he aho kotoabe ha koji, koe feilaulau i he agahala: bea te nau teuteu foki ha bulu mui, moe sibi tagata mei he faga sibi, oku tae hano mele.

26 Koe aho e fitu te nau fufulu ai ae feilaulauaga mo fakamaa ia; bea te nau fakatabu‘i akinautolu.

27 Bea ka oji ae gaahi aho koia, e hoko o behe, i hono aho valu o fai ki mui, e atu e he kau taulaeiki hoo mou gaahi feilaulau tutu, mo hoo mou gaahi feilaulau fakalelei i he feilaulauaga; bea teu ma‘u akimoutolu, oku behe e Jihova koe Otua.