ʻOku Vahevahe ʻe ʻAna ʻEne Fakamoʻoní
ʻOku nofo ʻa e tokotaha naʻá ne faʻú ʻi Kololato, USA.
Naʻe tangutu fakalongolongo pē ʻa ʻAna ʻi heʻene kalasi Palaimelí. Naʻá ne sio ki he tā ʻo Sīsū naʻe pukepuke ʻe Sisitā ʻAlapaó.
“ʻOku ʻilo nai ʻe ha taha ʻa e ʻuhinga ʻo e fakamoʻoní?” Ko e fehuʻi ange ia ʻa Sisitā ʻAlapaó.
Ne hiki hake ʻe ʻAna hono nimá. “Ko e tala ʻoku tau ʻilo ʻoku moʻoni ʻa e Siasí?”
“Ko ha konga ia ʻe taha.” Naʻe malimali pē ʻa Sisitā ʻAlapao. “ʻI heʻetau vahevahe ʻetau fakamoʻoní, ʻoku tau vahevahe ʻa e meʻa ʻoku tau ʻilo pe tui ʻoku moʻoni fekauʻaki mo Sīsū Kalaisi mo e Siasí. Ko e hā e meʻa ʻokú ke ʻiloʻi ʻoku moʻoní, ʻAna?”
Naʻe fakakaukau ʻa ʻAna ki ai. “ʻOku ou ʻilo ʻoku ʻofa ʻa Sīsū ʻiate au!”
“ʻIo, ʻokú Ne ʻofa atu. ʻOkú ke maʻu ha fakamoʻoni ʻoku ʻofa ʻa Sīsū ʻiate koe.”
Hili ʻa e lotú, naʻe fehuʻi ange ʻe Mami, “Ko e hā e meʻa naʻá ke ako ʻi he Palaimelí he ʻaho ní, ʻAna?”
“Naʻá ku ako ki he ʻuhinga ʻo e fakamoʻoní. Te u vahevahe fakakū ʻeku fakamoʻoní?”
“ʻI ha taimi pē ʻokú ke fie maʻu ai!” Ko Teti ange ia. “Te tau lava ʻo fakahoko haʻatau houa fakamoʻoni pē ʻatautolu ʻi he efiafi fakafāmilí.”
Naʻe saiʻia ʻa ʻAna ʻi he fakakaukau ko iá. “Te tau lava foki ʻo tui hotau vala he ʻaho Sāpaté!”
ʻI he hokosia e taimi ke fai ai e efiafi fakafāmilí, naʻe tui ʻe ʻAna hono kofu ʻoku saiʻia taha aí.
Naʻe pehē ʻe Teti, “Talitali lelei kimoutolu ki heʻetau houa fakamoʻoni fakafāmilí.”
Naʻe tomuʻa fakamoʻoni ʻa e tuongaʻane ʻo ʻAná, ʻa ʻĪfeni. “ʻOku ou ʻilo ʻoku moʻoni ʻa e ongoongoleleí. ʻOku ou ʻilo ko ha palōfita ʻa Siosefa Sāmita. ʻOku ou ʻilo ko Lāsolo M. Nalesoní ko ʻetau palōfita ia he ʻaho ní. ʻOku ou ʻilo ʻoku moʻui ʻa Sīsū Kalaisi.”
Hili iá ne hoko leva ‘a ʻAna. Naʻá ne tuʻu hake. “ʻOku ou ʻofa lahi kia Sīsū. ʻOku ou ʻilo ʻokú Ne ʻofa ʻiate au. ʻOkú Ne tokanga kiate au pea ʻokú Ne ʻai ke u fiefia. ʻI he huafa ʻo Sīsū Kalaisí, ʻēmeni.” Naʻá ne ongoʻi māfana ʻi hono lotó.
Naʻe fāʻofua ange ʻa Mami kiate ia. “Mālō, ʻAna. ʻOku ou lava ʻo ongoʻi e lahi hoʻo ʻofa kia Sīsuú.”
Naʻe malimali pē ʻa ʻAna. “ʻOku ou fiefia ʻi heʻeku vahevahe ʻeku fakamoʻoní.”
Tā fakatātā ‘a Joanne Lew Vriethoff