Ko Hai Te Tau Lava ʻo Tokoni Ki Ai?
ʻOku nofo ʻa e tokotaha naʻá ne faʻú ʻi ʻIutā, USA.
Naʻe hoko ʻa e talanoá ni ʻi ʻAokalani, Nuʻu Sila.
Naʻe vahevahe ʻe he fāmili ʻo Tatianá ʻenau ngoué. Ko e hā ha toe meʻa te nau lava ʻo vahevahe?
“Vivili atu ki muʻa … mo ha ʻofa ki he ʻOtuá mo e kakai fulipē” (2 Nīfai 31:20).
“ʻOkú ke maau ke tā hifo ʻa e siainé?” Ko e fehuʻi ange ia ʻa Tetí. Naʻe sio pē ʻa Tatiana mo hono ongo tehina ko ʻAlisi mo Kaví. Naʻe fakaʻaongaʻi ʻe Teti ha hele ke tā hifo ʻa e kau siainé kakato.
Naʻe ola lelei e fua ʻo e ngoué he taʻú ni! Ka naʻe lahi ha ngaahi meʻa kehe naʻe faingataʻa. Naʻe ʻi ai ha kolonitini ʻi Nuʻu Sila koeʻuhí ko e kolonavailasí. Naʻe ʻikai lava ʻa Tatiana ʻo sio ki hono kaungāmeʻá pe ʻalu ki he akó. Ka naʻá ne fiefia ke feohi ʻi ha taimi lahi mo hono fāmilí.
Naʻe ʻohovale ʻa Kavi ʻi heʻene sio ki he lahi ʻo e fuaʻiʻakaú. Naʻá ne pehē, “He ʻikai ke tau lava ʻo kai kotoa ena!”
Naʻe kamokamo pē ʻa Mami. “ʻOku ou tui pē ʻe fie maʻu ʻe Sisitā Pangikē haʻane meʻa. Kuo teʻeki ke ne lava ʻo fai ha ngāue ʻi heʻene ngoué talu e siʻi mate hono husepānití.”
Naʻe pehē ʻe Tatiana, “ʻOku ou ʻilo ʻoku tuenoa mo Sisitā Fīnau. Te u lava ʻo ʻave haʻane siaine!”
“Ko hai mo ha toe taha?” Ko Teti ange ia. Naʻa nau tangutu kotoa hifo ʻi he musié. Naʻa nau hiki ha lisi ʻo e kakai te nau ala fie maʻu ha kiʻi tokoní.
ʻI he ʻaho hono hokó, ne nau faʻo ha ʻū tangai silivapiiti, kumala, mo e siaine. Naʻe fakaʻuli holo leva ʻa Mami mo Teti ʻi he tukui ʻapí. Naʻá na fakahifo ha tangai ʻi he ʻapi kotoa pē ʻi heʻenau lisí.
Naʻe fakasio atu ʻa Tatiana mei he sioʻata ʻo e kaá ʻo siofi hono fakaava ʻe Sisitā Pangikē ʻa e matapaá. Naʻe fakaʻaongaʻi ʻe Sisitā Pangikē hono tokotokó ke lue māmālie mai ki he tangaí. Naʻá ne fiefia lahi ne lava pē ʻa Tatiana ʻo sio ki heʻene malimalí ʻo aʻu ki heʻenau mavahe mai he halá.
Naʻe ongoʻi māfana mo fiefia ʻa Tatiana. Ka naʻá ne toe ongoʻi loto-mamahi pē foki. ʻOkú ne lava ʻo feohi mo hono fāmilí ʻi he taimi kolonitiní. Ka naʻe nofo toko taha pē ʻa Sisitā Pangikē. Mahalo pē kuo teʻeki ke ne talanoa mo ha taha ʻi ha ngaahi uike!
Naʻe pehē ʻe Tatiana, “ʻOku ou tui ʻoku ʻi ai mo ha meʻa kehe te tau lava ʻo fai maʻa hotau kaungāʻapí. ʻOku hā ka tau ka fakaafeʻi kinautolu ke tau talanoa vitiō ʻi he pō ʻoku tau lau folofola fakafāmili aí?”
Ne pehē ange ʻe Teti, “Ko ha fakakaukau lelei ia.”
ʻI heʻenau aʻu ki ʻapí, ne tā ʻa Tatiana kia Sisitā Pangikē. “Mālō e lelei, Sisitā Pangikē! ʻOku fai ʻemau lau folofola fakafāmili he pooni. ʻOkú ke fie kau mai nai ki ai?”
“Te u fiefia ʻaupito ke kau ai!” Ko e tali mai ia ʻa Sisitā Pangikeé. Hili ʻa e telefoni ko iá, naʻe ʻave ʻe Tatiana ʻa e telefoní kia ʻAlisi. Naʻa nau taufetongi ʻi he tā ki he kakai ʻi he uōtí mo fakaafeʻi kinautolu.
Naʻe tailiili ʻa Tatiana ʻi heʻene talitali he veʻe komipiutá he pō ko iá. ʻE kau mai nai ha taha? Hili iá, naʻe ʻasi tahataha mai e ngaahi fofonga honau kaungāʻapí ʻi he komipiutá. Naʻe faingataʻaʻia hanau niʻihi ʻi hono fakaʻaongaʻi e tekinolosiá, ko ia ne tokoni leva ʻa Mami kiate kinautolu.
Naʻe fakaʻaliʻali hake ʻe ha fefine ʻe taha ha peleti houki pouki (lole ngaohi mei he honé). Naʻá ne pehē mai, “ʻOku ou ʻilo pē he ʻikai lava ʻe hamou taha ʻo kai ʻeni. Ka naʻá ku hanganaki fiefia ki he pooni peá u ngaohi leva ha kiʻi fakaneifua makehe! Mahalo te ke lava pē ʻo fakakaukauloto mai ʻokú ke nāmuʻi ia ʻi he komipiutá!”
Naʻe kakata ʻa e tokotaha kotoa mo talanoa ki he ngaahi meʻa ne hoko honau ʻahó. Naʻe tokolahi e niʻihi ne nau faingataʻaʻia, ka naʻe hoko ʻa e talanoa ki he niʻihi kehé ke fiefia ai e tokotaha kotoa.
ʻI he ʻosi ʻenau talanoá, naʻe vahevahe ʻe Tatiana ha potufolofola, 2 Nīfai 31:20: “Vivili atu ki muʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa, mo ha ʻofa ki he ʻOtuá mo e kakai fulipē.”
Naʻe fai haʻanau lēsoni nounou pea taufetongi ʻi hono lau e folofolá. Hili iá, ne fai leva ʻe Kavi ʻa e lotú.
“Manatuʻi ke foki mai he uike kahaʻú!” Ko Tatiana atu ia. Naʻe taʻataʻalo mai e tokotaha kotoa pea nau tamateʻi ʻa e vitioó.
ʻI he mavahe pē ʻa e tokotaha fakamuimuí, naʻe fakatahatahaʻi mai ʻe Mami mo Teti ʻa e fāmilí ʻo nau fāʻofua kotoa. Naʻe fiefia ʻa Tatiana naʻá ne lava mo hono fāmilí ʻo tokoni ki honau kaungāʻapí. Te nau lava ʻo vilitaki fakataha atu ki muʻa.
Tā fakatātā ʻa Liz Brizzi