Ngaahi Nima Fietokoni ‘i he funga ʻo e Māmaní

Fe‘iloaki mo Pota mei Pōlani

Mei ha ʻinitaviu mo ʻEimi Seini Liviti.

Fe‘iloaki mo e fānau Palaimeli ʻoku nau tokoniʻi e ni‘ihi kehé, hangē ko ia naʻe fai ‘e Sīsuú.

Fekauʻaki kotoa mo Pota

Taʻu: 10

Mei: USA kae nofo ʻi Pōlani

Ngaahi Lea Fakafonuá: faka-Pilitānia mo ako lea faka-Falanisē

Fāmilí: Teti, Mami, ngaahi tokoua ko ʻĪfeni, Meisoni, mo Kona, mo e kulī ko Sinisā.

Ngaahi taumuʻá mo e fakaʻānaua: Hoko ko ha toketā ki he fanga monumanú mo tokangaʻi e fanga monumanú.

Nima Fietokoni ʻa Potá

ʻOku fakasio maʻu pē ʻe Pota ha ngaahi meʻa iiki te ne lava ʻo fai ke tokoni ai ki he niʻihi kehé. ʻOkú ne tokoni ʻi ʻapi ki heʻene mātuʻá ke feimeʻatokoni maʻá e fāmilí. ʻOkú ne fakapapauʻi ʻi he ʻapiakó ʻoku kau ʻa e tokotaha kotoa ki he ngaahi vaʻingá, tautefito ki he fānau ʻoku faʻa liʻekina kinautolú. ʻOkú ne tokoni ki hono tokangaʻi e naunau he taimi mālōloó, neongo kapau ne ʻikai ke ne kau he vaʻingá. ʻOkú ne fai foki mo ha ngaahi meʻa ke tokoni ki he fanga monumanú. ʻOkú ne kau ki ha kalapu ʻi he akó ʻoku nau ngaohi ha ʻū meʻavaʻinga maʻá e fanga kulī ʻi he fale tauhiʻanga kulií.

Naʻe toe tokoni foki ʻa Pota ʻaki ʻene kau ki he ngāue ko e BillionGraves. Naʻá ne ʻalu mo hono fāmilí ki ha faʻitoka ke faitaaʻi e ʻū maka fakamanatú. Naʻe tokoni ʻa hono tokoua ko Koná ki he faitaá. Pea naʻa nau fakahū leva ʻa e ʻū taá ki he uepisaiti ʻa e ngāue ko ʻení. ʻE tokoni ʻa e ʻū tā ko ʻení ki he kakai ʻi he funga ʻo e māmaní ʻoku nau fekumi ki ha fakamatala ki honau ngaahi kui mei Pōlaní.

Ngaahi Meʻa ʻOku Saiʻia Ai ʻa Potá

Feituʻú: Veisinia, USA, mo Heasīpaaka ʻi Penisilivēnia, USA

Talanoa fekauʻaki mo Sīsuú: ʻI Heʻene fakatokamālie ʻa e tahí

Hiva Palaimelí: “Ketisemani” (Māʻasi 2018 Friend pe Liahona)

Meʻakaí: Menitū (meʻakai faka-Kōlea)

Lanú: Vāleti

Ngaahi Lēsoni ʻi he Akó: Laukonga mo e fika

Ko e tokoni ʻa Pota ki hono faitaaʻi ha faʻitoka ki ha ngāue hisitōlia fakafāmili fakaemāmani lahi.