Tokangaʻi Au!

Fakamālohisino

Ko e hā e ngaahi ʻekitivitī ʻokú ke saiʻia taha ke ke longomoʻui aí?

Ngaahi Tokoní

• Feinga ke vaʻinga ʻi tuʻa he ʻaho kotoa pē ʻi ha kiʻi vahaʻataimi.

• ʻAi ke fakalata ia! ʻAi ha hulohula, kau ki ha sipoti, pe luelue pē ʻi tuʻa.

• Kapau ʻokú ke tangutu ʻi ha taimi lōloa, kiʻi mālōlō ʻo faofao mo luelue takai holo.

“Te nau lele kae ʻikai ongosia, pea ʻalu ʻo ʻikai pongia” (Tokāteline mo e Ngaahi Fuakava 89:20).

Maʻu ha Mohe Feʻunga

Ko e hā ha meʻa te ke lava ʻo fai ke ke mohe lelei ai ʻi he poʻulí?

Ngaahi Tokoní

• ʻAlu ʻo mohe pea ʻā hake he taimi tatau he ʻaho kotoa pē.

• Feinga ke ke mohe ʻi ha houa ʻe hiva ki he hongofulu mā taha ʻi he pō kotoa.

• Tamateʻi hoʻo ʻū meʻangāue fakaʻilekitulōniká ʻi ha houa ʻe taha kimuʻa peá ke mohé ke tokoni atu ke ke mālōlō lelei ange.

“ʻAlu ʻo mohe ʻi he teʻeki ai ke fuoloa ʻa e poʻulí, koeʻuhí ke ʻoua naʻa mou helaʻia” (Tokāteline mo e Ngaahi Fuakava 88:124).

Kai ʻo e Meʻakai Moʻui Leleí

Ko e hā e meʻakai moʻui lelei ʻokú ke saiʻia taha aí?

Ngaahi Tokoní

• Feinga ke kai palanisi e ngaahi meʻakai lelei kehekehe. (Vakai, Tokāteline mo e Ngaahi Fuakava 89:10–17 ki ha ngaahi sīpinga.)

• Kai siʻisiʻi ʻa e meʻakai melié, pea feinga ke ʻoua te ke kai maʻu pē ia.

• Inu e vaí ke lahi he ʻaho takitaha.

“ʻA e ngaahi meʻa kotoa pē ʻoku tupu mei he kelekelé … kuo ngaohi ia … ke fakamālohi ʻaki ʻa e sinó” (Tokāteline mo e Ngaahi Fuakava 59:18–19).

Mālōlō

Ko e hā e meʻa ʻokú ke saiʻia ke fai ke mālōlō aí?

Ngaahi Tokoní

• Kapau ʻokú ke ongoʻi loto-hohaʻa, loto-mamahi, pe loto-ʻita, talanoa ki ha tokotaha lahi ʻoku falalaʻangá.

• Tuku ha taimi he ʻaho kotoa pē ke tangutu maʻu mo fakalongolongo ai.

• Lotu ki he Tamai Hēvaní he ʻaho kotoa pē. Tala kiate Ia ʻa e meʻa ʻokú ke houngaʻia aí mo e meʻa ʻokú ke fie maʻu tokoni aí.

“Mou longo pē pea ʻilo ko au ko e ʻOtuá” Saame 46:10).

LIʻAKI ʻA E KOVÍ

ʻOku ʻi ai ha ngaahi meʻa ʻe niʻihi ʻoku lelei maʻatautolu, ka ʻoku ʻi ai ha ngaahi meʻa ʻe niʻihi ʻoku fakatuʻutāmaki. Te nau lava ʻo maumauʻi hotau sinó pe fakatupu maʻunimā pea ʻe faingataʻa ʻaupito leva ke taʻofi hono fakaʻaongaʻi iá. Ko ha ngaahi meʻa ʻeni ʻe niʻihi ʻoku totonu ke ke fakaʻehiʻehi mei ai:

• Tapaká

• Kofí

• Tapaka fakaʻuhilá/veipí

• Tií

• Inu kava mālohí

• Ngaahi faitoʻo konatapu fakatuʻutāmakí

Tā Fakatātā ʻa Josh Talbot

◆ Vakai, Haʻu, ʻo Muimui ʻIate Au ki he Tokāteline mo e Ngaahi Fuakava 89–92.