Haʻu, ʻo Muimui ʻIate Au

Taimi Fiefia ʻi he Folofolá

ʻOku ʻalu fakatatau ʻa e ngaahi fakakaukau ko ʻení mo e Haʻu, ʻo Muimui ʻIate Au—ma‘á e Fakafoʻituituí mo e Ngaahi Fāmilí ʻi he uike kotoa pē.

ʻŪ Teʻelango Faʻifaʻitakiʻangá

Hivaʻi ʻa e “Ko ha Foʻi Fetuʻu Au” (Tohi Hiva ʻa e Fānaú, 84).
Naʻe pehē ʻe Sīsū ʻoku totonu ke tau hoko ko ha “maama” ki he niʻihi kehé (Tokāteline mo e Ngaahi Fuakava 86:11). ʻOku ʻuhinga ia ʻoku totonu ke tau hoko ko e faʻifaʻitakiʻanga lelei ki he tokotaha kotoa pē.
Tā ha foʻi teʻelango ʻi ha laʻipepa pea valivali ʻa e ulo ʻi ʻolungá. Kosi ia ʻo fakapipiki ki ho soté pe kahoa ia ʻi ho kiá ʻaki ha maea, ʻo hangē ha kahoá. Talanoa mo ho fāmilí ki he meʻa te ke lava ʻo fai ke ke hoko ai ko ha faʻifaʻitakiʻanga lelei.

Hivaʻi ʻa e “Hoko ʻa ʻApi ko e Hēvani” (Ngaahi Himí, fika 188).
ʻOku fie maʻu ʻe he Tamai Hēvaní ke tau “fokotuʻu … ha fale ʻo e ʻOtuá” (Tokāteline mo e Ngaahi Fuakava 88:119). ʻOkú Ne fakaʻamu ke tau tauhi hotau ngaahi ʻapí ke hoko ko ha ngaahi feituʻu māʻoniʻoni hangē ko e temipalé, ʻa ia ʻe lava ke tau ongoʻi ai ʻa e Laumālie Māʻoniʻoní.
Lau ʻa e “Ko e Fakaafe Mahuʻingá” ʻi he peesi 4. Pea langa leva ha fale ʻaki ha ʻū poloka, vaʻakau, pe ko ha ngaahi meʻa kehe te ke maʻu. Ko e taimi kotoa pē ʻokú ke tānaki atu ai ha konga ki he falé, lea ʻaki ha meʻa te ke lava ʻo fai ke ngaohi ho ʻapí ke hoko ko ha feituʻu ʻe ongoʻi ai ʻe he Laumālie Māʻoniʻoní ʻoku talitali lelei Ia.

Hivaʻi ʻa e “Ko Hoku Temipale Mei he ʻEikí” (Tohi Hiva ʻa e Fānaú, 73).
ʻOku finangalo ʻa e Tamai Hēvaní ke tau tokangaʻi lelei hotau sinó. Naʻá Ne ʻomai ʻa e Lea ʻo e Potó ke tokoniʻi kitautolu ke tau moʻui lelei mo fiefia (vakai, Tokāteline mo e Ngaahi Fuakava 89:18–20).
Lau ʻa e talanoa mei he folofolá ʻi he peesi 42 ke ako e founga ne tau maʻu ai ʻa e Lea ʻo e Potó. Pea fakahoko fakataha leva ʻa e ʻekitivitī ʻi he peesi 24.

Hivaʻi ʻa e “Fānau Au ʻa e ʻOtuá” (Tohi Hiva ʻa e Fānaú, 2–3).
Ne tau nofo fakataha mo e Tamai Hēvaní kimuʻa pea tau haʻu ki he māmaní (vakai, Tokāteline mo e Ngaahi Fuakava 93:23). Ko ʻEne fānau kotoa ʻa kitautolu.
Kumi ha fanga foʻi maka molemole pea tohiʻi ai ʻa e “Ko e fānau koe ʻa e ʻOtuá” ʻaki ha vali pe peni. Hili iá pea ʻave ʻa e foʻi maka takitaha ki ha kaungāmeʻa, mēmipa ʻo e fāmilí pe ko ha taha ʻokú ke fakakaukau te ne ala fie maʻu ha fakamanatu.