Tohi ʻe Koe
Fakafiemālie mei he Kaumeʻá
ʻI ha ʻaho ʻe taha, ne u ʻaka pasikala ai mei ʻapiako ki ʻapi. ʻI heʻeku ofi atu ki ʻapí, ne u sio atu ki heʻeku faʻeé ʻokú ne pukepuke mai ha kiʻi kulī foʻou. Ne u fuʻu fiefia he sio kiate kinauá, ne u hopo fakavave ai mei heʻeku pasikalá. Fakafokifā pē ne u ongoʻi ha meʻa ne papā leʻolahi! Naʻe vave e mafola ʻa e langá ʻi hoku nima toʻomataʻú. Naʻe ʻikai ke u mei lava ʻo hiki hake ia.
Naʻe ʻave au ʻe heʻeku fineʻeikí ki falemahaki. ʻI heʻema aʻu atú, ne fakaʻata ʻe he toketaá hoku nimá. Naʻá ne talamai ʻoku ʻi ai ha foʻi ngungu ʻi hoku huí. Naʻe ʻikai ke u ʻilo pe ko e hā ia, ko ia naʻá ne fakamatalaʻi mai leva. Naʻe pehē ʻe he toketaá, “Ko e ngungu ʻi he huí ko ha konga ʻo e huí ʻoku ava pea ʻoku huhuʻa leva ʻa loto. Ko e ʻuhinga ia naʻe faingofua ai ke fasí.”
Naʻe pehē ʻe he toketaá mahalo ʻe fie maʻu ke fai haku tafa. Naʻe ongo fakailifia ia. Naʻá ne talamai ke mau toe fakataha hili ha ngaahi uike ke sio pe ʻe fie maʻu ke fai haku tafa pe ʻikai. Ka ʻi he taimi ní, ʻe fie maʻu ke u tui ha āfei ʻi hoku nimá. ʻI heʻema foki ki ʻapí, ne u toutou lotu loto pē. Tamai Hēvani, kātaki ʻo tokoniʻi au ke u loto-toʻa. ʻOku fuʻu fakailifia ʻaupito ʻeni. Kātaki ʻo tokoniʻi au ke u loto-lahi.
Hili ha māhina ʻe taha mei ai, ne u ʻapoinimeni mo e toketaá ke sio pe ʻe fie maʻu ke fai haʻaku tafa. Naʻá ku kei ilifia pē. Ne toki tufa mai pē ʻa e makasini Kaumeʻá ki he māhina ko iá, pea ne u kamata lau ia. Ko e katuni ʻa Meti mo Manitií ne fekauʻaki ia mo e fasi e nima ʻo Metí (ʻOkatopa 2019). Naʻe pau ke fai hano tafa. Hangē pē ko aú!
Hili ʻeku lau iá, ne u ongoʻi ha nonga. Ne u fai ha lotu ʻo fakamālō ki he Tamai Hēvaní ʻi hono tali ʻeku lotú. Ne u ʻilo te u lava pē ʻo loto-toʻa ʻo tatau ai pē pe ko e hā e meʻa ʻe hokó. Ne u fakamālō foki ki he Tamai Hēvaní ʻi Heʻene fanongoa maʻu pē au mo tokoniʻi au, ʻo hangē ha kaungāmeʻa moʻoní.
Tā Fakatātā ʻa Katie Kath