Ko e Kau Paionia ʻi he Fonua Kotoa Pē
ʻOlokā Sinetafele
Fuofua Metuloni Temipale mei Sekisolovākiá
Naʻe ʻiloʻi ʻe ʻOlokā te ne ʻalu ki he temipalé ʻi ha ʻaho.
Naʻe siofi fakamamaʻu ʻe ʻOlokā ʻa e laʻitā ʻo e temipalé ne tautau ʻi he holisí. Naʻá ne māpuhoi. Kapau pē naʻá ne lava mo hono fāmilí ʻo ʻalu ki he temipalé! Ka naʻe ʻikai ha temipale ofi mai, pea naʻe fuʻu faingataʻa ke mavahe mei hono fonuá.
Naʻe papitaiso ʻa ʻOlokā ʻi ha ngaahi taʻu kimuʻa. Ka naʻe fakamālohiʻi ʻa e kau faifekaú ke nau mavahe mei he fonuá. Naʻe ʻikai fakangofua ʻa e kāingalotu ʻo e Siasí ke nau toe ʻalu ki he lotú. Naʻe ʻikai foki ke nau lava ʻo talanoa ki he niʻihi kehé fekauʻaki mo ʻenau tuí.
Naʻe kei moʻui ʻaki pē ʻe ʻOlokā ʻa e ongoongoleleí. Kae pehē foki ki hono husepāniti ko Silí. Naʻá na lotu mo lau ʻa e folofolá. Naʻá na fakahoko ʻa e efiafi fakafāmilí mo akoʻi ʻena fānaú. ʻI he ʻaho Sāpaté, naʻá na fakahoko ʻa e houalotu sākalamēnití ʻi hona kiʻi ʻapi nofoʻangá. Naʻá na tautau ha ʻū tā lahi ʻo e temipalé [he holisí].
Pea ko e taimi pē ne ongoʻi taʻelata ai ʻa ʻOlokā mo hono fāmilí, naʻa nau manatuʻi ʻoku lauafe e kāingalotu ʻo e Siasí ʻi he funga ʻo e māmaní.
Naʻe hoko ha meʻa fakafiefia ʻi ha ʻaho ʻe taha. Naʻe haʻu ʻa Palesiteni Lāsolo M. Nalesoni, ko e Palesiteni Lahi ʻo e Lautohi Faka-Sāpaté, ʻo ʻaʻahi ki hona fonuá. Naʻe malimali ʻa ʻOlokā ʻi heʻene lulululu mo Palesiteni Nalesoní. Pea naʻá ne fakahoko ange ha palōmesi makehe. “Sisitā, te ke haʻu nai ki he temipalé ha ʻaho.”
Naʻe ongoʻi māfana ʻa ʻOlokā. Naʻá ne fanafana ange, “Mālō.”
Ne hili ha ngaahi māhina mei ai. Mo ha ngaahi taʻu. Naʻe siofi ʻe ʻOlokā ʻa e ʻū tā temipale ne tautau he holisí mo ne fakaʻānaua ki ai. Naʻe hā hangē ne taʻemalava ʻa e ʻalu ki he temipalé!
Hili ha taʻu ʻe fā mei ai, naʻe fakaafeʻi ʻa ʻOlokā mo Sili ke na ʻalu ki he konifelenisi lahi ʻi Sōleki Siti, ʻIutā, USA. Naʻe hohaʻa ʻa ʻOlokā naʻa ʻikai lava ke na ʻalu. Naʻe kei faingataʻa pē ʻa e ngaahi tūkunga honau fonuá. ʻE fie maʻu ha ngāue lahi fakapepa kae lava ʻo folau. Ka naʻe iku ʻo lelei pē ʻa e meʻa kotoa. Naʻe ongoʻi tailiili ʻa ʻOlokā ʻi he puna ʻenau vakapuná ki he ʻIunaiteti Siteití. Ko ha mana ia!
Naʻe ʻalu ʻa ʻOlokā mo Sili ki he konifelenisí ʻo fanongo ki he palōfitá. Naʻá na lava ʻo mamata ki he Temipale Sikueá pea ʻalu ki he senitā talitaliʻanga kakaí. Ka ko e konga lelei tahá ʻa e hū ki he temipalé!
ʻI he tui ʻe ʻOlokā ʻa e vala hinehiná, naʻá ne ongoʻi naʻá ne ʻi hēvani ʻi heʻene fai ha ngaahi palōmesi makehe mo e ʻOtuá. Naʻá ne lava foki ʻo sila kia Sili. Kuo hoko ʻo moʻoni ʻa e palōmesi ne fai ʻe Palesiteni Nalesoní!
Naʻe foki ʻa ʻOlokā mo Sili ki ʻapi. Hili ha ngaahi taimi, naʻe ʻalu pē ke lelei ange e tuʻunga honau fonuá. Ne faifai peá na lava ʻo ʻalu ki he lotú, pea lava ʻa e kau faifekaú ʻo toe fai ʻa e akoʻí.
ʻI ha ʻaho ʻe taha, ne tatangi e telefoní. Ko Palesiteni Tōmasi S. Monisoni. Naʻá ne tā mai kia ʻOlokā ke ne hoko ko e metuloni ʻo e Temipale Feleipoki Siamané. ʻE hoko ʻa Sili ko e palesiteni temipalé.
Naʻe malimali ʻa ʻOlokā ʻi heʻene tuʻu mo hono kofu tōtōlofa hinehiná ʻi loto he Temipale Feleipōkí. Naʻe hangē naʻe kei mamaʻo ʻa e temipalé kimuʻá. Ka ko ʻeni ʻokú ne lava ke mataʻikoloa ʻaki ia ʻi he ʻaho kotoa pē! Ko ha misi fakaʻofoʻofa ia kuo hoko ʻo moʻoni.
Ko e feituʻu ne nofo ai ʻa ʻOlokaá naʻe hoko ia kimui ko ha konga ʻo e Lepāpulika Sekí.
ʻOku laungeau e ngaahi kāsolo ʻi he Lepāpulika Sekí.
Ko e metuloni temipalé ko ha taki fefine ia ʻi he temipalé.
Naʻe maʻu ʻe ʻOlokā ha ʻū tā ʻe 20 tupu ʻo e ngaahi temipalé ʻi hono ʻapi nofoʻangá.
Naʻá ne maʻu mo Sili ha foha mo ha ʻofefine.
Naʻá ne tauhi ha ʻalapama tā ʻo e kau faifekau ne nau akoʻi iá.
ʻŪ tā fakatātā ʻa Shawna J. C. Tenney