Mei he Kau Palesitenisī ʻUluakí

Ko Mālohi ʻo ha Tāpuaki Lakanga Fakataulaʻeiki

Fai ʻe Palesiteni Russell M. Nelson

Naʻe toʻo mei he “Neither Trust in the Arm of Flesh” (lea ʻi he fakaʻosi ako ʻi he ʻUnivēsiti Pilikihami ʻIongí, 23 ʻEpeleli 2009), speeches.byu.edu.

ʻI he ngaahi taʻu lahi kuohilí, ne u ʻalu ki ha fakataha mo ha kau toketā kehe ʻi ha kiʻi kolo ʻi Mekisikou. ʻI ha pō ʻe taha, ne ʻohovale pē kuo puke lahi ha toketā ʻe taha.

Naʻe tokolahi e kau toketā ne ʻi aí. Ka naʻe ʻikai ke mau maʻu ʻa e meʻangāue ne mau fiemaʻú ke tokoniʻi ʻa e tangata ko ʻeni ne puké. Ko e falemahaki ofi tahá ne maile ʻe 100 (kilomita ʻe 160) hono mamaʻó. Naʻe lolotonga eni e poʻulí, pea naʻe ʻikai ha vakapuna ʻe lava ʻo puna. Ne mau fakakaukau mahalo pē te ne mate. Ko e hā ha meʻa te mau lava ʻo fai?

Naʻe fanafana mai ʻa e toketā ne puké ʻo kole ha tāpuaki lakanga fakataulaʻeiki. Ne u hili hoku ongo nimá ki hono ʻulú. Ne u ongoʻi ʻa e talamai ʻe he Laumālie Māʻoniʻoní ʻe sai pē ʻa e toketā ne puké. Te ne moʻui pea foki malu pē ki hono ʻapí. Ne u foaki kiate ia ʻa e tāpuaki ko ʻení ʻi he huafa ʻo e ʻEikí.

ʻI he pongipongi hono hokó, naʻe sai ange ʻa e toketaá. Hili ha ngaahi ʻaho siʻi, naʻá ne lava ʻo foki ki ʻapi. Ne mau fakamālō ki he ʻEikí ko e tāpuaki fakaofo ko ʻení.

Naʻe faingofua pē ʻa e lēsoni ne mau akó: “Falala ki [he ʻEikí] ʻaki ho lotó kotoa; pea ʻoua naʻá ke faʻaki ki ho poto ʻoʻoú” (Lea Fakatātā 3:5). Ne mau aʻusia ʻeni. Ne mau ʻiloʻi naʻe moʻoni ia.

ʻOku moʻoni foki ʻoku pule ʻa e ʻOtuá. ʻOku ʻikai ke tali ʻa e ngaahi tāpuaki kotoa pē ʻi he founga ʻoku tau loto ki aí. ʻOku fie maʻu ke tau fakatupulaki pē ʻetau tui kiate Iá.

ʻOku Tāpuekina Au ʻe he Lakanga Fakataulaʻeikí

cut-out cards of children getting baptized and taking the sacrament

ʻOku tāpuekina ʻe he mālohi ʻo e lakanga fakataulaʻeiki ʻa e Tamai Hēvaní ʻetau moʻuí ʻi he ngaahi founga kehekehe. ʻOku fakahaaʻi ʻi he ʻū kaati ʻi laló ha niʻihi ʻo e ngaahi tāpuaki te tau lava ʻo maʻu koeʻuhí ko e lakanga fakataulaʻeikí. Kosi ʻo toʻo kinautolu pea tuku fakafoʻohifo ia. Pea taufetongi leva ʻi hono fili ha kaati ʻe taha pea fakamatalaʻi e founga kuó ne tokoniʻi ai koe pe te ne tokoniʻi koe ʻi ha ʻaho!

Te u lava ʻo papitaiso.
Te u lava ʻo maʻu ʻa e meʻafoaki ʻo e Laumālie Māʻoniʻoní.
Toe Feinga Pē!
Te u lava ʻo maʻu ʻa e sākalamēnití.
Te u lava ʻo maʻu ha tāpuaki ke fakanonga au pe tokoniʻi au ke u sai.
Tokotaha Vaʻinga Hokó
Te u lava ʻo maʻu ha lekomeni temipale.
Te u lava ʻo maʻu ha tāpuaki fakapēteliake.
Toe Feinga Pē!
Te u lava ʻo fai ʻa e ngaahi papitaiso ʻi he temipalé.
Te u lava ʻo fai ha ngaahi fuakava toputapu ʻi he temipalé.
Tokotaha Vaʻinga Hokó
ʻE lava ke uiuiʻi au ke ngāue fakafaifekau pea ngāue ʻi he ngaahi uiuiʻi ʻa e Siasí.