Ko e Fili ʻo e Faitoʻo Konatapú
ʻOku totonu nai ke u tala ki ha taha? Ko e fifili ia ʻa ʻAlaviní.
“Faitotonu kuo foa ʻa e ata” (Ngaahi Himi, fika 145).
Naʻe tā ʻa e fafangú ʻo ongona ʻi he malaʻe vaʻingá. Naʻe ʻosi ʻa e taimi mālōloó. Naʻe tuku ʻe ʻAlavini ʻene foʻi pulu pasiketipoló peá ne lue atu ki he loki akó.
Naʻe pehē mai ʻa ʻene faiako ko Mīsisi Holó, “Mou kātaki ʻo tangutu ki lalo pea toʻo hake homou pepa fiká.”
Naʻe moulu atu ʻa ʻAlavini ki hono tangutuʻangá pea ala ki heʻene loto kato akó. Naʻá ne fanongo ki ha tukituki ʻi he matapā ʻo e loki akó. Naʻe fakaava ia ʻe Mīsisi Holo peá ne kamata talanoa mo ha faiako ʻe taha.
Naʻe kamata fefafanahi ʻa Peleiki mo Sēleti ʻi he ʻū tesi pē ka hoko maí.
“Pssst! Sio mai ki he meʻa ne u maʻú!”
“Mani!”
“Te ke fie ʻahiʻahiʻi he tuku e akó?”
Ko e hā e meʻa ʻoku hokó? Ko e fifili ia ʻa ʻAlaviní.
Naʻá ne sio teputepu atu kia Peleiki mo Sēleti. Naʻe hangē naʻe toʻo hake ʻe ha taha ha kiʻi milemila mei hono kató.
ʻOleva angé, ko ha faitoʻo konatapu ia?!
Naʻe tā vave e mafu ʻo ʻAlaviní. Naʻe ʻosi fakatalanoa ʻene ongomātuʻá kiate ia mo hono ngaahi tokouá fekauʻaki mo e faitoʻo konatapú. Naʻá ne ʻiloʻi naʻe fepaki ʻa e faitoʻo konatapú mo e Lea ʻo e Potó pea ʻe lava ke ne uesia ho sinó mo e ʻutó. Naʻá ne ʻiloʻi foki naʻe fakatuʻutāmaki ke fakaʻaongaʻi ha faitoʻo naʻe ʻikai ʻaʻau.
Ko e hā e meʻa ʻoku totonu ke u faí? Ko e fakakaukau ia ʻa ʻAlaviní. Naʻá ne siosio takai holo. ʻE lava ke uesia ha taha ʻe he faitoʻo konatapu ko iá! Naʻe hangē naʻe ʻikai tokanga mai ha taha ia he fānau kehé. Te u tala nai ki ha taha? Pe te u fakangalingali pē naʻe ʻikai ke u sio ki ai?
Naʻe faingataʻa kia ʻAlavini ke ne tokanga lolotonga ʻa e lēsoni fiká. Naʻe ʻikai ke ne lava ʻo tokanga lolotonga ʻa e taimi laukongá. ʻI he taimi kai hoʻataá, naʻá ne ongoʻi hangē ne ʻi ai ha foʻi maka ʻi hono keté.
Naʻe fehuʻi ange ʻe hono kaungāmeʻa ko Misí, “ʻOkú ke sai pē?”
Naʻe fakaʻilonga fehuʻi ange ʻa ʻAlavini.
“Ko e hā e meʻa ʻoku hokó? Talamai,” ko hono kaungāmeʻa ange ia ko Heisoló.
Ko ia naʻe talanoa ange leva ʻe ʻAlavini ʻa e meʻa naʻá ne sio ki aí. “ʻOku ou tui ʻoku totonu ke u tala kia Mīsisi Holo.”
“Kae fēfē kapau te nau ʻiloʻi ko koe?” Ko Misi ange ia. “Mahalo te nau ʻita lahi ʻia koe.”
Naʻe fiemālie pē ki ai ʻa ʻAlavini. Ka naʻe ʻikai pē ke mavahe atu ʻa e ongoʻi taʻefiemālie ne ʻiate iá. Naʻe faifai peá ne fai ha fili. Naʻá ne ʻalu ke tala ki heʻenau faiakó.
Naʻe pehē ange ʻe Heisolo, “Te u ʻalu mo koe.”
Naʻe maʻu ʻe ʻAlavini mo Heisolo ʻa Mīsisi Holo ki hono loki akó.
“Mīsisi Holo?” Ko e fehuʻi ia ʻa ʻAlaviní. “ʻE lava nai ke ma talanoa mo koe pē?”
Naʻe tali ange ʻe Mīsisi Holo, “ʻIo. Ko e hā ha meʻa te u tokoni atu ai?”
Naʻe pehē ange ʻe ʻAlavini, “Um … .” Naʻe malimali angaʻofa pē ʻa Mīsisi Holo. Naʻe ongoʻi loto-toʻa ai [ʻa ʻAlavini]. “Naʻá ku sio ka Peleiki mo Sēleti he ʻahó ni mo e faitoʻo konatapu ʻi he kalasí. Naʻá ku ongoʻi ʻoku fie maʻu ke u tala atu.”
Naʻe pehē ange ʻe Mīsisi Holo, “Naʻá ke fai ʻa e meʻa totonú. Te ke lava maʻu pē ʻo talanoa mai kiate au ʻi haʻo sio ki ha palopalema. Te u sio ki ai.”
Naʻe mapuhoi leʻolahi ʻa ʻAlavini. Kuo mole atu ʻa e ongoʻi mafasiá.
ʻI he hoʻatā ko iá, naʻe haʻu ʻa e tokoni pule akó ki honau lokí ʻo ui ʻa Peleiki mo Sēleti ke na hū ange ki he holó.
Naʻe ʻikai foki mai ʻa e ongo uá ki he kalasí ʻi ha ʻaho ʻe tolu.
ʻI he taimi ne na foki mai aí, naʻe ongoʻi tailiili ʻa ʻAlavini ke toe sio kiate kinaua.
Naʻá ne fakakaukau, Fēfē kapau te na ʻilo ko au ne u tala ki he faiakó? Fēfē kapau ʻokú na ʻita lahi ʻiate au?
Ka naʻá na tangutu pē mo fakakata hangē ko e angamahení.
Naʻe fehuʻi ange ʻe ha taha he kalasí, “Naʻá mo ʻi fē ai pē?”
Naʻe pehē ange ʻe Peleiki, “ʻO … ʻā … naʻe maʻu kimaua mo ha meʻa ne ʻikai sai ʻi he akó. Ko ia ne fekau ai ke ma foki ki ʻapi.”
Naʻe hokohoko atu e talanoa ʻa e tokotaha kotoa, pea faifai pē pea fiemālie ʻa ʻAlavini. Naʻá ne fiefia ʻi heʻene lea fekauʻaki mo e faitoʻo konatapú ke tokoni ki he malu ʻa e niʻihi kehé. Naʻá ne fakaʻamu ke fai ha ngaahi fili ʻoku leleí ke tauhi hono sinó ke malu mo moʻui lelei.
Tā fakatātaaʻi ʻe Mark Robison