Kaungāmeʻa ki he Kaungāmeʻa
Nonga ʻi he Mālohi ʻo e Lakanga Fakataulaʻeikí
Fai ʻe ʻEletā Steven R. Bangerter
ʻO e Kau Fitungofulú
Mei ha ʻinitaviu mo Lusi Sitīvenisoni ʻIueli.
ʻI heʻeku tupu haké, naʻe faingataʻaʻia hoku sinó ʻi he vai ʻo e totó (gamma globulin anemia). Naʻe faingataʻa ki hoku sinó ke ne tauʻi e siemú, ko ia ne u faʻa puke ai.
ʻI ha pō ʻe taha ne u ʻā hake ai ʻoku langa mamahi hoku telingá. Naʻe mamahi ʻaupito ia ne u fakakaukau pē ʻe mafahi hoku foʻi ʻulú! Naʻá ku manatuʻi ʻa e haʻu ʻeku faʻeé mo ʻeku tamaí ki hoku lokí. Naʻe tangutu ʻeku faʻeé ʻi he veʻe mohengá ʻo ne fua au ʻi hono umá. Naʻe hili leva ʻe heʻeku tamaí ʻa hono ongo nimá ʻi hoku ʻulú pea foaki mai ha tāpuaki lakanga fakataulaʻeiki. ʻI he tāpuaki ko iá, naʻá ne pehē mai ai ʻoku ʻafioʻi au ʻe heʻeku Tamai ʻi Hēvaní. Naʻá Ne ʻafioʻi ʻa ʻeku faingataʻaʻiá. Te Ne tāpuakiʻi au ke u mohe ʻi he toenga ʻo e pō ko iá.
Naʻe vave pē ʻeku ongoʻi fiemālié, peá u tō ʻo mohe ʻi he pō ko iá ʻo toki ʻā tuai hake he pongipongi hono hokó. ʻI heʻeku ʻā haké, naʻe ongoʻi fiemālie hoku ongo telingá. Ka naʻe ʻosi ha ngaahi taʻu lahi peá u toki sai ʻaupito mei heʻeku fokoutuá.
ʻI he hili ha ngaahi taʻu lahi mei ai, naʻe hokohoko atu ʻeku tamaí ke foaki mai ha ngaahi tāpuaki lakanga fakataulaʻeiki ke u maʻu ha ivi. Naʻá ne akoʻi mai ko e ngaahi tāpuaki ko iá ko ha ngaahi faingamālie ia maʻá e Tamai Hēvaní ke Ne folofola mai kiate au. Naʻe hoko ʻeku puké ko ha founga ia ke tokoni mai ai ʻa e Tamai Hēvaní ke tupulaki ʻeku tuí.
ʻOku ʻatā ʻa e ngaahi tāpuaki ʻo e lakanga fakataulaʻeikí kiate koe mo e fānau kotoa ʻa e Tamai Hēvaní. ʻOku kehekehe pē ʻa hotau ngaahi faingataʻaʻiá. ʻOku tau nofo ʻi ha ngaahi feituʻu kehekehe pea maʻu mo ha ngaahi fāmili kehekehe. Mahalo ʻoku ʻi ai hamou niʻihi ʻoku ʻikai ha tamai ke ne lava ʻo ʻoatu ha ngaahi tāpuaki lakanga fakataulaʻeiki. Te ke lava ʻo kole ki hoʻo kau tangata ngāue fakaetauhí pe ko e kau taki ʻo e Siasí.
Ko e meʻa ʻe taha ʻoku tau tatau kotoa aí. Ko e ʻofa ʻetau Tamai Hēvaní maʻatautolú. ʻOku tau tuʻunga tatau kotoa ʻi he ʻao ʻo e ʻOtuá. ʻOku finangalo ʻa e Tamai Hēvaní ke tāpuakiʻi kotoa kitautolu ʻo fakafou ʻi Hono mālohi ʻo e lakanga fakataulaʻeikí.
ʻOku ou fakaʻamu ke ke ʻilo ʻoku ʻafioʻi mo ʻofeina koe ʻe he Tamai Hēvaní. ʻOkú Ne ʻafioʻi ho hīngoá. ʻOku mafao mai Hono toʻukupu ʻofá kiate koe.
Tā fakatātaaʻi ʻe Ben Simonsen