Kei Fanongo pē ki he Hiva ʻa e Tamaí
Naʻe manatu ‘ofa lahi ʻa Lia ki heʻene tamaí.
“Pea ʻe holoholo ʻe he ʻOtuá ʻa e loʻimata kotoa pē mei honau matá” (Fakahā 21:4).
Naʻe lī hifo ʻe Lia ʻene kato naunau akó ki lalo ʻi he taimi pē naʻá ne hū atu ai ki hono lokí. Naʻá ne totolo ki hono mohengá, pea ne kukuʻi hono piló ki hono keté. Naʻe ʻikai ke ne tui ki he meʻa ne lea ʻaki ʻe ʻEsilī fekauʻaki mo ʻene tamaí.
Naʻe pekia ‘a e tamai ʻa Liá ʻi he taonakita ʻi he ngaahi māhina siʻi kuo hilí. Naʻá ne manatu ʻofa lahi kiate ia. Naʻá ne manatu ʻofa ki heʻene mitipolo (meatballs) manakoá. Naʻá ne manatu ‘ofa ki heʻene fakafiefiaʻi ʻene Faʻeé. Pea naʻá ne manatu ‘ofa ki heʻene faʻa sio ki heʻene tā kītaá.
Taimi ʻe niʻihi ʻi he loto mamahi ʻa Liá, naʻá ne fanongo ki heʻene hivá. Naʻá ne faitohi foki kiate ia. Naʻá ne faʻo ia ʻi he puha manatu melié ʻi hono loki tukuʻanga valá. Ko e puha tatau pē ia naʻá ne tauhi ai ‘a e matasioʻata ʻo ‘ene Tamaí, hono tatā peisipolo motuʻá, mo e ngaahi meʻa kehe pē naʻá ne saiʻia aí. Ko ʻene founga ia ke manatuʻi ‘aki [ʻene tamaí].
Ka naʻe ʻikai ongoʻi ʻe Lia ʻoku fie fanongo mūsika pe faitohi he taimí ni. Naʻá ne loto mamahi, ka naʻe hangē ʻoku ʻiteʻitá foki. Naʻá ne kukuʻi maʻu ange ‘a e piló, pea kamata ke tangi.
Naʻe tātaaʻi mai ʻe heʻene faʻeé ‘a e matapaá. “ʻOkú ke SAI pē?” Ko e fehuʻi ange ia ʻa ‘ene faʻeé.
Naʻe mihimihi pē ʻa Lia peá ne tangutu ki ʻolunga. Naʻe tangutu hifo ʻene Faʻeé ʻi he mohengá ʻi hono tafaʻakí.
Naʻe pehē ange ʻe Lia, “Naʻe talamai ʻe ʻEsilī ha meʻa ʻoku kovi. Fekauʻaki mo ʻeku Tamaí” Naʻe tafe pē ‘a e loʻimatá mei he fofonga ʻo Liá. “Naʻá ne pehē mai he ʻikai ke ne lava ʻo ʻalu ki hēvani koeʻuhí ko e founga naʻá ne mate aí.”
Naʻe fāʻofua ʻa e Fineʻeikí kia Lia mo pehē ange, “ʻOiauē. ʻOku ‘ikai ke moʻoni ia.” Naʻá ne holoholoʻi e loʻimata ʻo Liá. “ʻI he taimi naʻe pekia ai hoʻo tamaí, naʻá ne fokoutua fakaeʻatamai. ʻOku mahino ki he Tamai Hēvaní ʻa e ongo naʻe maʻu ʻe [hoʻo] Tamaí mo e ʻuhinga naʻá ne mamahi aí.”
Naʻe pehē ange ʻe Lia, “Ko e tangata lelei ia. ʻOku ʻofa ʻa e Tamai Hēvaní ʻiate ia pea ʻokú Ne tokoniʻi ia, ko ia?”
“Ko e tangata lelei ʻaupito ʻa [hoʻo Tamaí], Lia. “Naʻá ne ʻofa lahi ‘aupito ʻiate koe.” Naʻe holoholoʻi ʻe he Fineʻeikí hono loʻimatá. “Pea ʻoku ʻofa ʻa e Tamai Hēvaní ʻiate ia. ʻOku ou ʻilo ʻokú Ne fakahoko ia.”
“Ka ‘okú ke ʻiloʻi fēfē nai ia?” Ko e fehuʻi ange ia ʻa Liá.
Naʻe pehē ange ʻe he Faʻeé, “Koeʻuhí ʻoku ou faʻa lotua ia ʻi he taimi ʻe niʻihi.” “Pea neongo ʻoku ou manatu ‘ofa lahi kiate ia ‘oku mamahi he taimi ‘e ni’ihi, ka ʻoku ou ongoʻi foki ha ngaahi momeniti ʻo e nonga.”
Naʻe kamokamo pē ʻa Lia.
Naʻe pehē ange ʻe he Faʻeé, “ ʻOku ou kole fakamolemole atu ʻi he lea pehē atu ʻa ʻEsilī kiate koé.”. “ʻOku ou ʻilo ko ʻEsilií ko e taha ia ho ngaahi kaungāmeʻa lelei tahá, pea naʻe fakamamahi ʻaupito ia kiate koe.”
“ʻIo.” Naʻe kiʻi fakalongolongo taimi siʻi ‘a Lia. Naʻá ne ʻeke mai leva, “ʻE lava nai ke ta lotu fakataha?”
“ʻKo ia.”
Naʻe tūʻulutui hifo ʻa e Faʻeé mo Lia. Naʻe kamata leva ke lotu ʻa Lia. “Tamai Hēvani, ʻoku ou ʻofa moʻoni ki heʻeku tamaí. ʻOkú ne SAI pē nai? Fakamolemole ‘o tokoni mai ke u ongo’i lelei ange. ʻI he huafa ʻo Sīsū Kalaisí, ʻēmeni.”
Naʻe fāʻofua ʻa Lia ki heʻene Faʻeé. Naʻá ne kiʻi ongoʻi lelei ange. Naʻá ne kei ongoʻi loto mamahi moʻoni pē, ka naʻe ʻikai ke ne toe hohaʻa ki heʻene tamaí. Naʻá ne ʻiloʻi naʻe ʻofa ʻa e Tamai Hēvaní ʻi heʻene tamaí, pea naʻá ne ʻiloʻi ʻokú Ne ʻofa foki ʻiate ia.
“Mālō, Faʻē.” Naʻe mihi ʻe Lia ʻene mānavá. “Te ke lava nai ʻo tokoni mai ke u talanoa kia ʻEsilī?”
Naʻe pehē ange ʻe he Faʻeé, “Ko ha fakakaukau lelei ia. ʻOku ʻikai ke u tui naʻá ne ʻuhinga ke fakalotomamahiʻi koe, ka ʻe lelei ke ne ʻiloʻi ‘a e ʻuhinga naʻe fakamamahi ai ‘a e meʻa naʻá ne lea ʻakí. Te u tā ki heʻene faʻeé ʻo vakai pe te na lava ʻo omi ʻapongipongi ke tau talanoa.”
Naʻe pehē ange ʻe Lia, “SAI. ʻOku ou fakaʻamu ki ha kiʻi taimi fakalongolongo ʻi he taimí ni.”
Naʻe kamo atu ‘a e Faʻeé. “Tala mai ke u ʻiloʻi pe ʻokú ke fie maʻu ha meʻa.”
Naʻe fakamoʻui ʻe Lia ‘a e hiva ʻene tamai. Naʻá ne kuikui pea fakafanongo ki heʻene tā kītaá. Naʻá ne toʻo hake leva ha laʻipepa pea kamata ke ne fai ha tohi ki ai.