« ការសន្យានៃពិធីបុណ្យជ្រមុជទឹក » ទស្សនាវដ្តី ប្រិយមិត្ត ខែ ឧសភា ឆ្នាំ ២០២៤ ទំព័រ ៨–៩ ។
ការសន្យានៃពិធីបុណ្យជ្រមុជទឹក
« ហេតុអ្វីកូនចង់ទទួលបុណ្យជ្រមុជទឹក ? » លោកប៉ាសួរ ។
ដំណើររឿងនេះបានកើតឡើងនៅក្នុង ស.រ.អា. ។
« ប៉ា តើកូនអាចទទួលបុណ្យជ្រមុជទឹកពេលកូនអាយុប្រាំបីឆ្នាំបានទេ ? » ខេតុន បានសួរ ។
ប៉ា បានងើមមុខឡើង ងាកចេញពីល្បែងដែលពួកគាត់កំពុងលេង ។ « វាជាជម្រើសដ៏ធំ ។ តើវាមិនល្អទេឬអី បើកូនរង់ចាំរហូតដល់អាយុ ១៨ ឆ្នាំ នោះ ? »
ខេតុន បានគិតអំពីរឿងនេះ ។ « ប៉ុន្តែកូនជិតដល់អាយុប្រាំបីឆ្នាំហើយឥឡូវនេះ ។ ហើយអាយុ ១៨ ឆ្នាំនៅយូរណាស់ ! »
ប៉ាបាននៅស្ងៀមមួយសន្ទុះ ។ គាត់បានយកបំណែកល្បែងរបស់គាត់ចេញ ។ « ហេតុអ្វីកូនចង់ទទួលបុណ្យជ្រមុជទឹក ? »
ខេតុន បាននិយាយថា « កូនស្រឡាញ់ព្រះយេស៊ូវ ។ ហើយកូនចង់ធ្វើតាមទ្រង់ » ។
ប៉ាបានមានប្រសាសន៍ថា « នោះជាមូលហេតុដ៏អស្ចារ្យដើម្បីទទួលពិធីបុណ្យជ្រមុជទឹក » គាត់ញញឹម ។ « ប៉ាគាំទ្រកូន ប្រសិនបើនោះជាអ្វីដែលកូនជ្រើសរើស ។ មិនថាកូនមានអាយុប្រាំបីឆ្នាំ ឬ ១៨ ឆ្នាំនោះទេ » ។
ខេតុន បានយកដៃគាត់ឱបប៉ា ។ « អរគុណប៉ា ! »
ប៉ាមិនមែនជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយទេ ។ ប៉ុន្តែពេលខ្លះគាត់ទៅព្រះវិហារជាមួយខេតុន និងម៉ាក់ ។ ហើយនៅពេលខេតុនឡើងនិយាយ ឬច្រៀងជាមួយកុមារផ្សេងទៀតនៅក្នុងការប្រជុំសាក្រាម៉ង់ ប៉ាតែងតែមកជាមួយ ។
បន្ទាប់ពីពួកគាត់លេងល្បែងនេះហើយ ខេតុន បានទៅរកម៉ាក់នៅផ្ទះបាយ ។
គាត់បាននិយាយថា « ប៉ាបានមានប្រសាសន៍ថា កូនអាចទទួលបុណ្យជ្រមុជទឹកបាន នៅពេលកូនអាយុប្រាំបីឆ្នាំ » ។
ម៉ាក់ញញឹម ។ « វាពិតជារំភើបណាស់ ! តើកូនបានគិតថាចង់ឲ្យនរណាធ្វើពិធីបុណ្យជ្រមុជទឹកឲ្យកូនទេ ? »
ខេតុន បានដាក់ចាននៅលើតុ ។ « តើម៉ាក់គិតថា លោកតាអាចធ្វើបានទេ ? លោកតា និងលោកយាយកំពុងបម្រើបេសកកម្មនៅទីក្រុងផ្សេង ។
ម៉ាក់បានមានប្រសាសន៍ថា « យើងអាចសួរគាត់បាន » ។
បន្ទាប់ពីអាហារពេលល្ងាច ខេតុន បានទូរសព្ទហៅជាវីដេអូទៅលោកតា និងលោកយាយនៅលើទូរសព្ទរបស់ម៉ាក់ ។ បន្ទាប់ពីរោទិ៍បានពីរបីដង មុខដែលមានស្នាមញញឹមរបស់គាត់បានបង្ហាញពេញនៅលើអេក្រង់ ។
« ជម្រាប់សួរលោកយាយ ! ជម្រាបសួរលោកតា ! » ខេតុន បាននិយាយ ។ « ទាយទៅមើល ? ចៅនឹងទទួលបុណ្យជ្រមុជទឹកនៅថ្ងៃខួបកំណើតរបស់ចៅនៅឆ្នាំនេះហើយ » ។
« ឱ អស់ស្ចារ្យណាស់! » លោកយាយបានមានប្រសាសន៍ ។
« តើលោកតាអាចធ្វើបុណ្យជ្រមុជទឹកឲ្យចៅ បានទេ ? » ខេតុន បានសួរ ។
លោកតាកាន់តែញញឹមខ្លាំងឡើង ។ « តាពិតជាចង់ធ្វើណាស់ » ។
នៅពេលថ្ងៃទទួលបុណ្យជ្រមុជទឹករបស់គាត់មកដល់ ខេតុន បានរៀបចំខ្លួនរួចរាល់ ។ ម៉ាក់ និងប៉ា បានជិះឡានដឹកគាត់ទៅកាន់រោងជំនុំតូចមួយដែលលោកតា និងលោកយាយរបស់គាត់កំពុងបម្រើបេសកកម្មរបស់ពួកគាត់ ។
ខេតុន និងលោកតាស្លៀកពាក់ពណ៌ស ។ ពួកគាត់បានអង្គុយជាមួយគ្នានៅពេលមនុស្សគ្រប់គ្នាកំពុងច្រៀង ។ បន្ទាប់មក ម៉ាក់បានឡើងអធិស្ឋាន ។
បន្ទាប់មក ប៉ាឡើងនិយាយ ។ គាត់បានមានប្រសាសន៍ថា « នៅពេលកូនជ្រមុជទឹក កូនសន្យាថានឹងធ្វើតាមព្រះយេស៊ូវគ្រីស្ទ និងគោរពតាមបទបញ្ញត្តិទាំងឡាយរបស់ទ្រង់ ។ ទ្រង់បានបង្រៀនយើងឲ្យស្រឡាញ់គ្នាទៅវិញទៅមក ។ សេចក្តីស្រឡាញ់គឺជារបៀបរស់នៅដ៏ល្អបំផុត » ។
ខេតុន បានមើលទៅរូបភាពនៃព្រះយេស៊ូវ ដែលប៉ាកំពុងកាន់ ។
« នៅពេលយើងស្រឡាញ់អ្នកដទៃ វាធ្វើឲ្យពួកគេទទួលអារម្មណ៍ថាមានគេខ្វល់ខ្វាយដល់ខ្លួន ។ វាក៏ជួយឲ្យយើងសប្បាយចិត្ត និងមានសេចក្តីសុខសាន្តផងដែរ » ។ ប៉ា មើលចំខេតុន ។ « ប៉ាមានមោទនភាពចំពោះកូនណាស់នៅថ្ងៃនេះ ដែលសន្យាធ្វើតាមព្រះយេស៊ូវគ្រីស្ទ ។ ប៉ាសង្ឃឹមថា ពិធីបុណ្យជ្រមុជទឹករបស់កូនរំឭកកូនឲ្យស្រឡាញ់ព្រះ និងអ្នកដទៃ » ។
ខេតុនបានឱបប៉ាយ៉ាងណែន ។ បន្ទាប់មក ខេតុនបានទៅតាមលោកតាចូលទៅក្នុងអាងជ្រមុជទឹកតូចមួយ ។ ខេតុន បានដាក់ដៃម្ខាងនៅលើស្មារបស់លោកតា និងដៃម្ខាងទៀតនៅលើដៃរបស់លោកតា ។ លោកតា បានពោលពាក្យអធិស្ឋានសម្រាប់ធ្វើពិធីបុណ្យជ្រមុជទឹក ។ បន្ទាប់មកគាត់ជួយបន្ទាបខ្លួនរបស់ខេតុន ចូលទៅក្នុងទឹក ។
នៅពេលខេតុន ងើបចេញពីទឹក គាត់ញញឹម ។ គាត់បានធ្វើវាសម្រេចហើយ ! គាត់បានធ្វើតាមព្រះយេស៊ូវគ្រីស្ទ ។ មិនយូរប៉ុន្មាន គាត់ក៏នឹងបានបញ្ជាក់ និងទទួលអំណោយទាននៃព្រះវិញ្ញាណបរិសុទ្ធផងដែរ ។ បន្ទាប់មកគាត់នឹងក្លាយជាសមាជិក នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ខេតុន បានរីករាយក្នុងការរក្សាសេចក្តីសន្យារបស់គាត់ដើម្បីចងចាំព្រះយេស៊ូវ និងគោរពតាមបទបញ្ញត្តិរបស់ទ្រង់ ។
រចនារូបភាពដោយ អាលីហ្សា ថាលិនថ៍