« អំណាចនៃព្រះវិហារបរិសុទ្ធ » ប្រិយមិត្ត ខែ ឧសភា ឆ្នាំ ២០២៤ ទំព័រ ២–៣ ។
សារលិខិតសន្និសីទមកពីព្យាការី
អំណាចនៃព្រះវិហារបរិសុទ្ធ
កែសម្រួលមកពី « រីករាយនៅក្នុងអំណោយទាននៃកូនសោបព្វជិតភាព » Liahona ខែ ឧសភា ឆ្នាំ ២០២៤ ទំព័រ ១១៩–១២១ ។
នៅខែ មិនា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានទិញព្រះវិហារបរិសុទ្ធខឺតឡង់ ។ ព្រះវិហារបរិសុទ្ធនេះគឺជាផ្នែកដ៏សំខាន់នៃការស្តារឡើងវិញនៃដំណឹងល្អរបស់ព្រះយេស៊ូវគ្រីស្ទ ។
នៅថ្ងៃទី ៣ ខែ មេសា ឆ្នាំ ១៨៣៦ ព្រះយេស៊ូវគ្រីស្ទបានបង្ហាញព្រះអង្គទ្រង់ដល់ យ៉ូសែប ស៊្មីធ និង អូលីវើរ ខៅឌើរី នៅក្នុងព្រះវិហារបរិសុទ្ធខឺតឡង់ ។ ព្រះអង្គសង្គ្រោះបានទទួលយកព្រះវិហារបរិសុទ្ធជាព្រះដំណាក់របស់ទ្រង់ ។ បន្ទាប់មក ទ្រង់បានសន្យាថា « យើងនឹង សម្ដែងកាយ យើងដល់រាស្រ្ដរបស់យើងនៅក្នុងដំណាក់នេះដោយសេចក្តីមេត្តាករុណា » ( គោលលទ្ធិ និងសេចក្តីសញ្ញា ១១០:៧ ) ។ ការសន្យានេះអនុវត្តចំពោះគ្រប់ព្រះវិហារបរិសុទ្ធនៅសព្វថ្ងៃនេះ ។
នៅក្នុងព្រះវិហារបរិសុទ្ធ ប្អូនៗអាចទទួលចម្លើយចំពោះការអធិស្ឋាន ។ ប្អូនៗក៏អាចទទួលបានសេចក្ដីជំនឿ កម្លាំង ការលួងលោម ចំណេះដឹង និងអំណាចផងដែរ ។ ពេលវេលានៅក្នុងព្រះវិហារបរិសុទ្ធនឹងជួយប្អូនៗឲ្យគិតដល់សេឡេស្ទាល ហើយមើលឃើញថាខ្លួនប្អូនៗជានរណាពិតប្រាកដ ហើយតើប្អូនៗអាចក្លាយជាបុគ្គលបែបណា ។ វានឹងជួយប្អូនៗឲ្យយល់អំពីរបៀបដែលប្អូនៗរួមចំណែកនៅក្នុងផែនការដ៏អស្ចារ្យរបស់ព្រះ ។ ខ្ញុំសូមសន្យានឹងប្អូនៗដូច្នោះ ។
ព្រះវិហារបរិសុទ្ធខឺតឡង់
សកម្មភាពកាត់ក្រដាស
កាត់ជុំវិញគែមព្រះវិហារបរិសុទ្ធខឺតឡង់ ។ បន្ទាប់មក បត់លើបន្ទាត់ចុចៗ ហើយបិតផ្នែកខាងៗ និងដំបូលឲ្យជាប់គ្នា ។
តើព្រះវិហារបរិសុទ្ធខឺតឡង់ គឺជាអ្វី ?
ព្រះវិហារបរិសុទ្ធខឺតឡង់ ត្រូវបានកសាងឡើងនៅក្នុងរដ្ឋអូហៃអូ សហរដ្ឋអាមេរិក នៅឆ្នាំ ១៨៣៦ ។ វាគឺជាព្រះវិហារបរិសុទ្ធដំបូងគេបង្អស់នៃសាសនាចក្រដែលបានស្ដារឡើងវិញ ។
ក្រោយមក សមាជិកសាសនាចក្របានចាកចោលព្រះវិហារបរិសុទ្ធនេះដើម្បីផ្លាស់ទីទៅភាគខាងលិច ។ ព្រះវិហារមួយផ្សេងទៀតបានកាន់កាប់អគារនេះអស់ជាច្រើនឆ្នាំ ។ ថ្មីៗនេះ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបានទិញព្រះវិហារបរិសុទ្ធនេះ ។
រចនារូបភាពដោយ ដេវីឌ ហ្គ្រីន