មាត្រានៃសេចក្ដីជំនឿ

១

យើងខ្ញុំជឿដល់ព្រះ គឺព្រះវរបិតាដ៏គង់នៅអស់កល្បជានិច្ច និងដល់ព្រះរាជបុត្រាទ្រង់ គឺព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ ។

នេះមានន័យថា ៖

យើងជឿលើអង្គទាំងបីផ្សេងគ្នា ដែលទ្រង់ទាំងបីអង្គធ្វើការរួមគ្នា ។ ព្រះវរបិតាសួគ៌មានព្រះកាយ ហើយព្រះយេស៊ូវក៏ដូច្នោះដែរ ! ព្រះវិញ្ញាណបរិសុទ្ធ គឺជាវិញ្ញាណ ។ តាមរបៀបនេះ ទ្រង់អាចជាសារទូតសម្រាប់ព្រះវរបិតាសួគ៌ ហើយជួយយើងឲ្យទទួលអារម្មណ៍នៃសេចក្ដីស្រឡាញ់របស់ទ្រង់ ។

២

យើងខ្ញុំជឿថា មនុស្សទាំងអស់នឹងត្រូវទទួលទោសចំពោះអំពើបាបរបស់ខ្លួនផ្ទាល់ គឺមិនមែនចំពោះអំពើរំលងរបស់លោកអ័ដាមទេ ។

នេះមានន័យថា ៖

យើងមានសេរីភាពដើម្បីជ្រើសរើស ។ ព្រះនឹងកាត់សេចក្ដីយើងស្របតាមជម្រើសរបស់យើង—មិនមែនតាមជម្រើសរបស់នរណាម្នាក់ឡើយ ។ នៅក្នុងសួនច្បារអេដែន លោកអ័ដាម និងនាងអេវ៉ា បានជ្រើសរើសបរិភោគផ្លែឈើដែលព្រះបានប្រាប់ពួកគេកុំឲ្យបរិភោគ ។ ដោយសារតែការណ៍នេះ ពួកគេត្រូវចាកចេញពីសួនអេដែន ។ ព្រះបានប្រទានដល់ពួកគេនូវព្រះអង្គសង្គ្រោះ ដើម្បីធ្វើដង្វាយធួនសម្រាប់ពួកគេ ។ ដោយសារតែព្រះយេស៊ូវគ្រីស្ទ យើងទាំងអស់គ្នាអាចប្រែចិត្តបាន ។