Avia, hanaraka Ahy

Ny Fotopampianarana sy Fanekempihavanana: Topimaso

Nosoratan’i Annelise Gardiner

Gazetibokin’ny Fiangonana

I Joseph sy i Sydney nosoratan’i Annie Henrie Nader

Fampahalalana fohy

• Ny fizarana lava indrindra: fizarana faha 124 (misy andininy 145)

• Ireo fizarana fohy indrindra: ny fizarana 13, 116, ary 120 (samy andininy 1 avy)

• Misy fizarana 138 ary ireo filazana ôfisialy 2.

• Ny feo mibahan-toerana indrindra ao amin’ny Fotopampianarana sy Fanekempihavanana dia ny an’i Jesoa Kristy.

• Izany dia tsy nadika avy tamina rakitsoratra fahiny, tsy toy ireo soratra marina hafa.

• Ny ankamaroan’ny fanambarana ao amin’ny boky dia noraisin’ny Mpaminany Joseph Smith; ny hafa dia noraisin’i Brigham Young (fizarana 136) sy i Joseph F. Smith (fizarana 138), ary koa i Wilford Woodruff (Filazana ôfisialy 1) sy i Spencer W. Kimball (Filazana ôfisialy 2).

Inona ilay izy?

Ny Fotopampianarana sy Fanekempihavanana dia fitambarana fanambarana maoderina avy amin’ Andriamanitra izay noraisina tamin’ny alalan’ny Mpaminany Joseph Smith ny ankabeazany. Maro amin’ireo fanambarana ireo no nomena ho valin’ireo fanontaniana napetrak’i Joseph sy ireo mpikamban’ny Fiangonana hafa tany aloha tamin’ Andriamanitra.

Inona no antony nanaovana ny Fotopampianarana sy Fanekempihavanana?

Nandritra ireo andro voalohany nisian’ny Fiangonana, dia vitsy ireo tahadika nosoratan-tanana an’ireo fanambarana ireo. Tamin’ny taona 1831 dia nanapa-kevitra ireo mpitarika tao amin’ny Fiangonana fa hatonta printy sy avoaka ho boky ireo fanambarana ao amin’ny Bokin’ireo Didy. Nandritra ny fihaonambe iray tamin’ny volana nôvambra 1831 raha teo am-piresahana momba ilay Bokin’ireo Didy, dia nandray ilay fanambarana izay ao amin’ny fizarana 1 ankehitriny i Joseph, dia ny teny fampidirana ho an’ny Fotopampianarana sy Fanekempihavanana.

Ireo taona nanan-tantara:

• 1823 Ny fanambarana voarakitra voalohany: fizarana 2.

• 1833 Navoaka ny Bokin’ireo Didy. Tahadika vitsivitsy monja no niangana taorian’ny fanafihana ny trano fanaovana printy. Zatovovavy roa, i Mary Elizabeth sy i Caroline Amelia Rollins, no nanavotra pejy izay betsaka azon’izy ireo natao ary niafina tao anaty tanin-katsaka tsy ho hitan’ny andian’olona mpihetraketra .

• 1835 Voalohany tamin’ny edisiôna natonta printy betsaka indrindra. Nisy fanambarana fanampiny izy io ary novana ho Fotopampianarana sy Fanekempihavanana ny anarany.

• 1844 Natonta printy fotoana fohy taorian’ny famonoana ho maritiora an’i Joseph Smith, nisy fanambarana fanampiny io edisiôna io, miaraka amin’ny fizarana 135.

• 1847 Nandray torolalana momba ny fitarihana ny Olomasina miakandrefana i Brigham Young: fizarana 136.

• 1876 Ity edisiôna ity dia nanampy fizarana vaovao miisa 26 ary ity no edisiôna voalohany nizarazara ireo fizarana ho andininy.

• 1890 Namoaka ny fanehoan-kevitra an-tsoratra izay nitarika tany amin’ny fiafaran’ny fampakarana vady maro tao amin’ny Fiangonana i Wilford Woodruff (jereo ny Filazana Ôfisialy 1).

• 1918 Nizara ny fahitana hitany momba ny tontolon’ny fanahy i Joseph F. Smith: fizarana 138

• 1921 Nanomboka tamin’ity edisiôna ity dia tsy nisy intsony ny Lectures on Faith (Lahateny momba ny finoana).

• 1978 I Spencer W. Kimball dia nandray ny fanambarana momba ny fisoronana izay lasa ny Filazana Ôfisialy 2.

• 1981 Ity edisiôna ity no nampisy sasin-teny ho an’ny fizarana, nanampy soratra masina mifandray, miaraka amin’ny fanambarana vitsivitsy fanampiny.

• 2013 Ity edisiôna ity no nanisy fanavaozana ireo fampahalalana ara-tantara ao amin’ireo sasin-teny.

Ny fizarana sasany dia fantatra tamin’ny anarana hafa talohan’ny nanambarana azy ireny tao amin’ny Fotopampianarana sy Fanekempihavanana:

• Fizarana 1—ny Teny fampidirana

• Fizarana 20—Andinin-dalàna sy Fanekempihavanana

• Fizarana 88—ny Ravin’oliva

• Fizarana 133—ny Tovana

• Fizarana 134—ny Fanambarana mikasika ireo fitondram-panjakana sy ireo lalàna

Ny fotopampianarana

Ireo fanambarana natambatra ho boky voalohany dia nantsoina hoe ny Bokin’ireo Didy. Ireo fanambarana taoriana dia nantsoina hoe Fotopampianarana sy Fanekempihavanana satria nanampy fampianarana momba ny “fotopampianaran’ny Fiangonana,” izay fantatra amin’ny hoe teny fohy hoe “fotopampianarana” izany (izay antsoina hoe Lectures on Faith ankehitriny). Nanomboka tamin’ny edisiôna taona 1921, ny Lectures on Faith dia tsy nampidirina intsony saingy nijanona ilay anarana hoe Fotopampianarana sy Fanekempihavanana.¹

Ny fanekempihavanana

Ny ambin’ny boky dia mirakitra ireo fanambarana noraisin’i Joseph Smith. Io ampahany io dia fantatra amin’ny hoe “ireo fanekempihavanana sy ireo didin’ny Tompo” na “fanekempihavanana” raha afohezina. Ny mpikambana voalohany teo amin’ny tantaran’ny Fiangonana dia nampiasa ny teny hoe “fanekempihavanana” na “didy” entina anondroana ireo fanambarana voarain’ny Mpaminany mba tsy hifangaroan’izy ireny amin’ireo asa soratra hafa an’i Joseph Smith, ohatra amin’izany ireo toriteniny sy ny dikantenin’ny Baiboly izay nataony.²

Nahoana no manan-danja ny Fotopampianarana sy Fanekempihavanana amin’izao andro izao?

Ny Fotopampianarana sy Fanekempihavanana dia mirakitra ireo fanambarana avy amin’i Jesoa Kristy ho an’ny vahoakany. Mampianatra antsika izy io fa Andriamanitra dia mahalala antsika tsirairay avy amin’ny anarantsika, fa Izy dia maheno ireo vavaka ataontsika sy mamaly ireo fanontaniantsika, ary Andriamanitra dia mbola miteny amintsika ankehitriny. Izy io ihany koa dia mampianatra antsika fitsipika manan-danja momba ny drafitry ny famonjena, ary manome antsika hevi-baovao fanampiny ny amin’ny Sorompanavotana nataon’i Jesoa Kristy. Manome fampiononana izany amin’ny alalan’ny fanehoana ny fomba itiavan’ Andriamanitra antsika sy mbola iantsoany antsika ho any Aminy na dia manao fahadisoana aza isika.

Fanamarihana

1. Jereo ny Sujets de l’histoire de l’Eglise, “Cours de théologie (-Lectures on Faith-),” ChurchofJesusChrist.org.

2. Jereo ny Sujets de l’histoire de l’Eglise, “Doctrines et Alliances” sy ny “Révélation de Joseph Smith,” ChurchofJesusChrist.org.