2010–2019
Aserká e Trono di Dios ku Konfiansa
2014
10:23

Aserká e Trono di Dios ku Konfiansa

Pa Elder Jörg Klebingat

Di e Setentanan

Dor di apliká e Ekspiashon di Jesucristu, boso por kuminsá oumentá boso konfiansa spiritual awe si boso ta dispuesto pa skucha i aktua.

Riba un skala di 1 te 10, kon boso lo kualifiká boso konfiansa spiritual den Dios? Boso tin un testimonio personal ku boso ofrenda komo un Santu di Delaster Dianan ta sufisiente pa heredá bida eterno? Boso por bisa den boso mes ku Tata Selestial ta kontentu ku boso? Kua pensamentu ta bini na mente si boso tabatin un entrevista personal ku boso Salbador un minüt for di awor? Pikánan, duele, i fayonan lo dominá boso imágen propio, òf boso lo simplemente eksperensiá antisipashon alegre? Boso lo wak òf evitá Su mirada? Boso lo tarda na porta òf boso lo kana bai ku konfiansa na Dje?

Tur biaha ku e atversario no por kombensé Santunan imperfekto pero ku ta hasi esfuerso manera boso pa bandoná boso fe den un Dios personal i amoroso, e ta usa un kampaña maligno pa pone mas distansia posibel entre boso ku Dios. E atversario sa ku fe den Kristu—e tipo di fe ku ta produsí miserikòrdia tierno i hasta milagernan poderoso kontinuamente—ku ta bai man den man ku un konfiansa personal ku boso ta hasi esfuerso pa skohe e bon. Pa e motibu ei e lo buska pa tin akseso na boso kurason pa bisa mentira na boso—mentira ku Tata Selestial ta desepshoná den boso, i ku e Ekspiashon ta for di boso alkanse, ku no ta nesesario pa ni purba, ku tur otro hende ta mihó ku boso, ku boso ta indigno, i ku míles di variashon di e mesun tema maligno.

Si boso permití pa e stèmnan aki sigui gaña boso alma, boso no por aserká e trono di Dios ku konfiansa berdadero. Pa kualke kos ku boso hasi, pa kualke kos ku boso hasi orashon p’e, pa kualke speransa pa un milager ku boso por tin, semper lo tin djis sufisiente duda den boso mes pa destruí boso fe—no solamente boso fe den Dios, pero tambe konfiansa den boso mes. No ta plasentero pa biba e evangelio di e manera aki, i tampoko e no ta saludabel. Riba tur kos, e ta kompletamente sin nesesidat! E desishon pa kambia ta kompletamente di boso, i solamente di boso so.

Lo mi kier a kompartí seis sugerensia práktiko, ku si [nan] wòrdu siguí, lo ekspulsá e stèmnan maligno aki i restourá na boso e tipo di siguransa di pas i konfiansa spiritual ku ta na boso pa tin si solamente boso ke. Sin tene kuenta ku e kualifikashon ku boso a duna boso mes riba e skala di 1 te 10, dor di apliká e Ekspiashon di Jesucristu boso por kuminsá oumentá boso konfiansa spiritual awe su boso ta dispuesto pa skucha i aktua. Lo mi papia direkto, sperando pa edifiká i no pa ofendé.

1. Tuma responsabilidat pa boso propio bienestar spiritual. Stòp di kulpa otronan pa boso sirkunstansianan, stòp di hustifiká, i stòp di duna esküs di kon boso no ta hasi boso máksimo esfuerso pa ta obediente. Aseptá ku boso ta “liber segun e karni” i “liber pa skohe libertat i bida eterno” (2 Nefi 2:27). Señor konosé boso sirkunstansianan perfektamente, pero E sa hopi bon tambe si boso ta simplemente skohe pa no biba e evangelio kompletamente. Si esei ta e kaso, sea sufisiente honesto pa atmití esaki, i hasi esfuerso pa ta perfekto den boso mes esfera di sirkunstansianan. Konfiansa spiritual ta oumentá ora boso tuma responsabilidat pa boso propio bienestar spiritual dor di apliká e Ekspiashon di Jesucristu tur dia.

2. Tuma responsabilidat pa boso propio bienestar físiko. Boso alma ta konsistí di boso kurpa i spiritu (wak D&C 88:15). Nutri e spiritu miéntras [bo] ta neglishá e kurpa, ku ta un tèmpel, usualmente ta hiba na disonansia spiritual i rebaho di balor propio. Si boso ta for di forma, si boso ta inkonfortabel den boso mes kurpa i por hasi algu tokante di esaki, hasié anto! Elder Russell  M. Nelson a siña ku nos mester “konsiderá nos kurpa komo un tèmpel di nos mes” i ku nos mester “kontrolá nos dieta i hasi ehersisio pa salú físiko” (“We are Children of God,” Ensign, Nov. 1998, 87; Liahona, Jan. 1999, 103).

Presidente Boyd K. Packer a siña ku “nos spiritu i nos kurpa ta kombiná di tal manera ku nos kurpa ta bira un instrumento di nos mente i e fundeshi di nos karakter” (“The Instrument of Your Mind and the Foundation of Your Character [Church Educational System fireside, Feb. 2, 2003], 2; speeches.byu.edu). P’esei, por fabor usa sano huisio den kiko i spesialmente kuantu boso ta kome i regularmente duna boso kurpa e ehersisio nesesario ku e mester i ta meresé. Si boso ta físikamente hábil, disidí awe pa ta e doño di boso mes kas i kuminsá un programa di ehersisio di tèrmino largu regular, adekuá pa boso habilidatnan, kombiná ku un dieta mas saludabel. Konfiansa spiritual ta oumentá ora boso spiritu, ku yudansa di e Salbador, ta enbèrdat na enkargo di boso hòmber òf muhé natural.

3. Aseptá boluntariamente, obedensia kompletu komo parti di boso bida Rekonosé ku boso no por stima Dios sin stima Su mandamentunan tambe. E Salbador su norma ta klaro i simpel: “Si boso ta stima mi, warda mi mandamentunan” (Huan 14:15). Obedensia selektivo ta trese bendishonnan selektivo, i skohe algu malu riba algu mas malu ta skohementu robes. Boso no por wak un pelíkula malu i spera di sinti birtuoso pasobra boso no a wak unu muchu mas pió. Wardamentu fiel di algun mandamentunan no ta hustifiká negligensha di otronan. Abraham Lincoln korektamente a bisa: “Ora mi ta hasi bon, mi ta sinti mi bon, ora mi ta hasi malu, mi ta sinti mi malu”(den William H. Herndon and Jesse William Weik, Herndon’s Lincoln: E Historia Berdadero di un Gran Bida, 3 vols. [1889], 3:439).

Tambe, hasi e kosnan hustu pa motibunan hustu. E Señor, ken “ta anhelá e kurason i un mente dispuesto” (D&C 64:34) i ku “ta distinguí e pensamentunan i intenshonnan di e kurason” (D&C 33:1), sa di kon boso ta bai iglesia, sea ku boso ta presente den kurpa solamente òf ta adorando berdaderamente. Boso no por kanta riba djadumingu, “O Babilonia, O Babilonia, [mi] ta yama bo ayó” i despues ta buska òf tolerá su kompania atrobe momentunan mas lat (“O Elderes de Israel,” Himno, no. 209). Kòrda ku indiferensia den asuntunan spiritual nunka no tabata felisidat. Hasi Iglesia i e evangelio restourá boso bida kompletu, no djis un parti di boso bida di pafó òf sosial. Skohementu awe ken boso lo sirbi lo ta sirbimentu ku boka so te ora boso di bèrdat biba konsekuentemente (wak Yozue 24:15). Konfiansa spiritual ta oumentá ora boso ta hasi esfuerso berdaderamente pa biba un bida konsagrá apesar di boso imperfekshonnan!

4. Bira realmente hopi bon den arepentimentu profundamente i lihé. Pasobra e Ekspiashon di Jesucristu ta masha práktiko, boso mester aplik’é ampliamente tur ora tur dia, pasobra e no ta kaba nunka. Brasa e Ekspiashon di Jesucristu i arepentimentu manera kosnan ku mester wòrdu yamá bon biní i apliká diariamente di akuerdo ku e òrdunan di e Gran Dòkter. Establesé un aktitut di arepentimentu kontinuo, felis, alegre dor di hasié estilo di bida di boso propio skohensia. Hasiendo esaki, tene kuidou ku e tentashon pa tarda, i no spera ku e mundu lo elogiá boso. Tene boso bista riba e Salbador, prekupá mas pa lokual E ta pensa di boso, i laga e konsekuensianan sigui. Konfiansa spiritual ta oumentá ora boso arepentí boluntariamente i ku alegria di pikánan chikitu i grandi na e momentu ku nan sosedé dor di apliká e Ekspiashon di Jesucristu.

5. Bira realmente, hopi bon den pordonamentu. “Ami, e Señor, lo pordoná ken ku Mi ke pordoná, pero di boso ta wòrdu eksihí pa pordoná tur hende” (D&C 64:10). Pordoná tur hende, tur kos, tur ora, òf por lo ménos hasi esfuerso pa hasi asina, permitiendo asina pordonamentu den boso mes bida. No tene rabia, no sea ofendé fásilmente, pordoná i lubidá lihé, i nunka no pensa ku boso ta dispensá for di e mandamentu aki. Konfiansa Spiritual ta oumentá ora boso sa ku Señor sa ku boso no tin mal sentimentu pa otro alma.

6. Aseptá pruebanan, kontratempunan, i “sorpresanan”komo parti di boso eksperensianan mortal. Rekordá ku boso ta aki pa wòrdu probá i di tèst, “pa mira si [boso] lo hasi tur kosnan ku Señor [boso] Dios lo manda [boso]” (Abraham 3:25)—i lo mi por djis pone aserka, “bou di tur sirkunstansia.” Miónes di boso rumannan tabata òf ta wòrdu di tèst, pues di kon boso lo wòrdu dispensá? Algun pruebanan ta bini pa boso propio desobedensia òf negligensia. Otro pruebanan ta bini pa motibu di negligensia di otronan òf simplemente pasobra esaki ta un mundu kaí. Ora e pruebanan aki bini, e atversario su siguidornan ta kuminsá proklamá ku boso a hasi algu robes, ku esaki ta un kastigu, un señal ku Tata Selestial no ta stima boso. Ignorá esei! Na lugá, purba di forsa un sonrisa, mira na shelu, i bisa, “Mi ta komprondé, Señor. Mi sa kiko esaki ta. Un tempu pa proba mi mi mes, no t’asina?” Despues huntu ku Señor perseverá te na fin. Konfiansa spiritual ta oumentá ora boso aseptá ku “hopi bia pruebanan i tribulashonnan ta wòrdu pèrmití pa drenta den [boso bida] pa motibu di e kosnan bon ku [boso] ta hasiendo” ” (Glenn L. Pace, “Crying with the Saints” [Brigham Young University devotional, Dec. 13, 1987], 2; speeches.byu.edu).

Durante e tempu ku mi tabata presidí riba e Mishon Ukraina Kyiv, mi a puntra un biaha na un di mi hermananan mishonero di mas fiel di kon semper e tabata asina duru ku su mes, di kon e tabata semper bati su mes pa e kosnan di mas chikitu. Su kontesta tabata un ehèmpel klásiko di un persona skuchando e stèm robes manera el a respondé, “P’asina niun hende no por bati mi ariba.”

Rumannan, mi konseho na e hermana mishonero aki ta mi konseho na boso: rekonosé i enfrentá boso debilidatnan, pero no wòrdu inmobilisá pa nan, pasobra algun di nan lo ta boso kompañeronan te ora boso bai laga e bida aki na mundu. No ta importá kon boso estado aktual ta, na e mes un momentu ku boso skohe boluntariamente arepentimentu diario, honesto, alegre, dor di hasi esfuerso pa simplemente hasié i ta e mihó di boso mes, e Salbador Su Ekspiashon, lo habri i sigui boso, unda ku boso bai. Biba di e manera aki, boso enbèrdat por “semper tin pordon di boso pikánan” (Mosiah 4:12) kada ora di kada dia, kada sekònde di kada minüt, i pues ta kompletamente limpi i aseptabel dilanti Dios tur ora.

Ta boso privilegio, si boso ke, pa bini na sa pa boso mes, awe òf pronto, ku boso ta komplasiendo Dios apesar di boso fayonan. Mi ta testifiká di un Salbador amoroso ku ta spera pa nos biba e mandamentunan. Mi ta testifiká di un Salbador amoroso ku ta masha ansioso pa drama Su grasia i miserikòrdia. Mi ta testifiká di un Salbador ku ta gosa ora nos apliká Su Ekspiashon diariamente ku e siguransa kalmu i felis ku nos ta bayendo den e bon direkshon. Mi ta testifiká di un Salbador amoroso ku ta ansioso pa boso konfiansa pa keda firme den e presensia di Dios (D&C 121:45). Den e nòmber di Jesucristu, amèn.