E Motibu di Nos Speransa

Pa Presidente Boyd K. Packer

Presidente di e Quorum di e Diesdos Apòstelnan

Un testimonio di e speransa pa redenshon ta algu ku no por wòrdu midí òf kontá. Jesucristu ta e fuente di e speransa ei.

Algun aña pasá, Hermana Packer i ami a bai Universidat Oxford. Nos tabata buska e registronan di mi di shete bisa tawela. E direktor di Christ’s College na Oxford, Dr. Poppelwell, tabata asina amabel pa pidi e archivista di e universidat pa trese e registronan. Einan den e aña 1583 nos a haña nòmber di nos antepasado, John Packer.

E aña siguiente nos a regresá na Oxford pa presentá un bunita set kuaderná di e bukinan kanóniko pa e biblioteka di Christ’s College. Tabata parse un poko straño pa Dr. Poppelwell. Kisas el a pensa ku nos no ta berdadero Kristiannan. Pues el a yama e kapelan pa risibí e bukinan.

Promé di a entregá e skrituranan na e kapelan, mi a habri e Topical Guide i a mustr’é un tema: 18 página, ku lèter masha chikitu, un solo espasio, numerando referensianan na e tema di “Jesucristu.” E ta un dje kompilashonnan mas kompletu di referensianan di skritura riba e tema di e Salbador ku hamas a wòrdu reuní den historia di mundu—un testimonio di e Tèstamènt Bieu i di e Tèstamènt Nobo, e Buki di Mormon, Doctrina y Convenios i e Perla de Gran Precio.

“Di kualke manera ku bo sigui e referensianan aki,”Mi a bisé, “banda pa banda, ariba i abou, buki pa buki, tema despues di otro—boso lo haña ku nan ta un testimonio konsistente, harmonioso di e divinidat di e mishon di Señor Jesucristu—Su nasementu, Su bida, Su siñansanan, Su krusifikashon, Su Resurekshon, i Su Ekspiashon.”

Despues ku mi a kompartí algun enseñansa di e Salbador ku e kapelan, e atmósfera a kambia, i el a duna nos un ekskurshon di e edifisio, inkluso un ekskavashon resien revelando pinturanan riba muraya kual ta data for di tempunan Romano.

Entre e referensianan nombrá den e Topical Guide tin esun aki for di e Buki di Mormon: Otro Tèstamènt di Jesucristu: “ Nos ta prediká di Cristu, nos ta profetisá di Cristu, i nos ta skibi di akuerdo ku nos profesianan, pa nos yunan por sa na kua fuente nan por mira pa un remishon di nan pikánan” (2 Nefi 25:26).

Den Su mes palabranan, e Salbador a deklará: “Ami ta e kaminda, e bèrdat, i e bida: ningun hende no por yega serka e Tata, si no ta pa medio di Ami” (Juan 14:6).

I for di e Buki di Mormon, El a deklará, “ Ata aki, ami ta esun ku a wòrdu prepará for di fundashon di e mundu pa redimí mi pueblo. Ata aki, mi ta Jesucristu. … Den mi henter e género humano lo tin bida, y esei eternamente, si, hasta nan ku lo kere den mi nòmber; i nan lo bira mi yunan hòmber i yunan muhé” (Eter 3:14).

Tin hopi, hopi otro referensianan den henter e bukinan kanóniko ku ta proklamá e ròl divino di Jesucristu komo e Redentor di tur ku a yega di nase i lo nase den mortalidat.

Pa medio di e Ekspiashon di Jesucristu nos tur ta redimí for di e Kaida di hende, kua a sosedé ora Adam i Eva a partisipá di e fruta prohibí den e Hardin di Eden, komo tin pará den 1 Korintionan: “Meskos ku tur hende mester muri pa motibu di nan relashon ku Adam, asina tur hende lo lanta for di morto pa motibu di nan union ku Cristu (1 Korintionan 15:22).

E Buki di Mormon ta siña, “Pasobra ta nesesario pa un ekspiashon wòrdu hasí …, òf sino henter humanidat mester peresé inevitablemente; si, tur ta kabes duru; si, tur ta kai i ta pèrdí, i lo tin ku peresé si no ta pa e ekspiashon … un sakrifisio infinito i eterno” (Alma 34:9–10).

Kisas nos no ta biba bidanan perfekto, i tin sanshonnan pa nos fayonan, pero promé ku nos a bini na mundu, nos a bai di akuerdo pa ta suheto na Su leinan i pa aseptá e kastigu pa violashon di su leinan.

“Pasobra tur hende a peka, i ta karesé di Dios Su gloria;

“Siendo hustifiká gratuitamente pa Su grasia mediante Cristu Jesus” (Romanonan 3:23–24).

E Salbador a realisá e Ekspiashon, kua ta proveé un kaminda pa nos pa bira limpi. Jesucristu ta e Cristu resusitá. Nos ta adorá i rekonosé E pa e doló ku El a sufri pa nos kolektivamente i pa su doló ku El a soportá pa kada un di nos individualmente, den e Hòfi di Getsémani i riba e krus. El a soportá tur ku gran humildat i ku un komprendementu eterno di Su funshon i propósito divino.

Esunnan ku ke arepentí i bandoná piká lo haña ku Su brasa miserikordioso ta habrí ainda. Esunnan ku skucha i pone atenshon na Su palabranan i e palabranan di Su siervonan eskohí lo haña pas i komprendementu hasta mei mei di gran doló i tristesa. E resultado di Su sakrifisio ta pa libra nos for di e efektonan di piká, pa tur su fayonan por wòrdu kitá i pa sinti speransa.

Si E no a kumpli ku e Ekspiashon, lo no tabatin redenshon. Lo tabata un mundu difísil pa biba aden si nunka nos lo no por a wòrdu pordoná pa nos fayonan, i si nunka nos por a purifiká nos mes i sigui dilanti.

E miserikòrdia i grasia di Jesucristu no ta limitá pa esunnan ku kometé piká sea konsientemente òf pa omishon, pero nan ta enserá e promesa di pas duradero na tur ku ke aseptá i siguié i Su enseñansanan. Su miserikòrdia ta e sanadó poderoso, inkluso e inosente heridá.

Resientemente mi a risibí un karta di un muhé ku a informá di a soportá sufrimentu grandi den su bida. Un fayo teribel, kua e no a identifiká, pero a aludí, a wòrdu kometé kontra dje. El a atmití ku el a lucha ku sentimentunan di gran amargura. Den su rabia, el a grita mentalmente, “Un hende ta bai paga pa e fayo teribel aki.” Den e momentu ekstremo di tristesa i puntramentu aki, el a skibi ku a bini na su kurason un kontesta di inmediato: “Un hende a paga kaba.”

Si nos no ta konsiente di kiko e Salbador Su sakrifisio por hasi pa nos, nos por bai dor di bida kargando lamentashon ku nos a hasi algu ku no tabata bon òf a ofendé un persona. E kulpa ku ta bini huntu ku fayonan por wòrdu kitá. Si nos buska pa komprondé Su Ekspiashon, nos lo yega na un reverensia profundo pa Señor Jesucristu, Su ministerio terenal, i Su mishon divino komo nos Salbador.

E Iglesia di Jesucristu di e Santunan di e Delaster Dianan a wòrdu restourá pa hiba den e mundu e konosementu di e bida i enseñansanan di e Salbador. E gran konferensha aki ta wòrdu transmití den 94 lenga via satélite na 102 pais pero e ta disponibel tambe riba Internet pa tur nashon kaminda Iglesia ta presente. Nos tin riba 3,000 staka. Nos ehérsito di mishoneronan di tempu kompletu ta eksedé 88,000, i miembresia total di Iglesia a pasa 15 mion. E numbernan aki ta sirbi komo evidensia ku “piedra ku ta kòrtá sin man for di e seru” ta sigui lora bai dilanti, i eventualmente lo yena “henter mundu” (D&C 65:2).

Pero no ta importá kon grandi e organisashon di Iglesia ta bira òf kuantu mion di miembro ta uni nos filanan, no ta importá kuantu kontinente i paisnan nos mishoneronan por drenta òf kuantu diferente lenga nos ta papia, e éksito berdadero di e evangelio di Jesucristu lo wòrdu midí pa e forsa spiritual di su miembronan individual. Nos mester di e forsa di konvikshon ku ta wòrdu hañá den e kurason di kada disípulo leal di Cristu.

Un testimonio di e speransa di redenshon ta algu ku no por wòrdu midí òf kontá. Jesucristu ta e fuente di e speransa ei.

Nos ta buska pa fortalesé e testimonionan di e hóben i e bieu, esun kasá i soltero. Nos mester siña e evangelio di Jesucristu na hòmbernan, muhénan, i muchanan, esunnan di tur rasa i nashonalidat, e riku i e pober. Nos tin mester di miembronan resien kombertí, i esunnan entre nos ku ta desendientenan di pioneronan. Nos mester buska esunnan ku a dualu i yuda nan pa regresá bèk na e rebaño. Nos tin mester di sabiduria di tur hende i komprenshon i forsa spiritual. Kada miembro di e Iglesia aki komo individuo ta un elemento krítiko di e kurpa di Iglesia.

“Ounke e kurpa tin hopi parti, tòg e ta un kurpa. Asina ta ku Cristu tambe.

“Pasobra pa medio di un Spiritu nos tur ta boutisá den un kurpa. …

“Pasobra e kurpa no ta un parti so, pero hopi” (1 Korintionan 12:12–14).

Kada miembro ta sirbi komo testimonio di e bida i enseñansanan di Jesucristu. Nos ta na guera ku e ehérsito di e atversario, i nos tin mester di kada un di nos si nos ta bai tin éksito den e obra ku e Salbador tin pa nos hasi.

Boso por pensa, “Kiko mi por hasi? Mi ta un persona so.”

Sigur ku Jos Smith a sintié su so tin biaha. El a lanta na grandesa, pero el a kuminsá komo un mucha hòmber di 14 aña ku tabatin un pregunta: “Kua iglesia mi tin ku djòin?” (wak Jose Smith–History 1:10). Jose su fe i testimonio di e Salbador a krese meskos ku esun di nos mester krese, “liña riba liña,presepto riba presepto, aki un poko i aya un poko” (2 Nefi 28:30; wak tambe D&C 128:21). Jose a hinka rudia, i a hasi orashon, i esta kosnan maravioso a bini komo resultado di e orashon i e Promé Vishon ei.

Komo un di e Diesdos Apòstelnan, mi ta duna mi testimonio di e Señor Jesucristu. E ta biba. E ta nos Redentor i nos Salbador. “Pa medio di e Ekspiashon di Cristu, henter humanidat por wòrdu salbá” (Artíkulonan di Fe 1:3). E ta presidí riba e Iglesia aki. E no ta un stranhero pa Su sirbidónan. Segun nos ta move den e futuro ku konfiansa ketu, Su Spiritu lo ta ku nos. No tin fin na Su poder pa bendishoná i dirigí e bidanan di esunnan ku ta buska bèrdat i rektitut. Mi ta duna testimonio di Dje den e nòmber di Jesucristu, amèn.