E Lei di Ayuno: Un Responsabilidat Personal pa Kuida di e Pober i pa Esun den Nesesidat
Pa Obispu Dean M. Davies
Di Dos Konsehero den e Obispado Presidente
Komo siguidonan di e Salbador, nos tin un responsabilidat personal pa kuida pa e pober i [pa] esun den nesesidat.
Mi rumannan stimá, mi stima e saserdosio, i mi ta stima di ta huntu ku bosonan. Mi ta asina profundamente gradesí ku nos por sirbi huntu den e gran kousa aki.
Nos ta biba den tempunan remarkabel. Avansenan maravioso den medisina, siensia, i teknologia a mehorá e kalidat di bida pa hopi. Pero tambe tin prueba di un gran sufrimentu humano i miseria. Banda di esaki tin guera i rumornan di guera, un oumento di desasternan natural—inkluyendo inundashon, kandela, teremoto, malesa—ku ta impaktá e bidanan di miónes rònt mundu.
E lidernan di Iglesia ta konsiente di i tin bista riba e bienestar di e yunan di Dios tur kaminda. Ora i kaminda ta posibel, Iglesia su rekursonan di emergensha tei pa duna kontesta na esnan den nesesidat. Por ehèmpel, Novèmber ku a pasa ei, Tifon Haiyan a dal e isla nashon di Filipina.
Un super Tifon di kategoria 5, Haiyan a laga den su ruta un destrukshon ekstensivo i sufrimentu. Suidatnan kompletu a keda destruí; hopi a pèrdè nan bida; miónes di kasnan a keda severamente dañá òf destruí; i servisionan básiko manera awa, sistema di berpùt, i elektrisidat a stòp di funshoná.
Rekursonan di Iglesia a wòrdu poné disponibel den e promé oranan di e desaster. Miembronan di Iglesia ku ta biba na Filipina a kore na reskate di nan rumannan dor di proveé kuminda, awa i kuminda, i paketenan di higiena na miembronan i tambe na no miembro.
Kapianan di Iglesia a bira logá di refugio pa míles di esnan sin kas. Bou di e liderato di e Presidensha di Aria i lidernan lokal di saserdosio, hopi di esnan ku a pèrdè tur kos ku nan tabata tin, balorashon a wòrdu hasi pa wak e kondishon i seguridat di tur miembro. Plannan inspirá a kuminsá forma pa yuda restourá miembronan den un kondishon di bida aseptabel i pa nan por sòru pa nan mes.
Rekursonan modesto a keda poné disponibel pa yuda e miembronan di Iglesia pa konstruí nan refugio i kasnan di palu. Esaki no tabata djis algu por nada. Miembronan a risibí training i hasi e trabou nesesario pa nan mes i despues pa otronan.
Un bendishon komo resultado [di esaki] tabata ku segun miembronan ta desaroyá nan abilidatnan di karpinteria, pa drecha pipa, i otro abilidatnan di konstrukshon, nan tabata apto pa sigurá oportunidat pa trabou ku tin sentido ora siudatnan i komunidatnan serkano a kuminsá ku rekonstrukshon.
Kuidando e pober i esun den nesesidat ta un doktrina fundamental di evangelio i un elemento esensial den e plan eterno di salbashon.
Promé ku Su ministerio mortal, Yehova a deklará pa medio di Su profeta: ”Pasó e pober nunka lo stòp di eksistí den boso pais: p’esei mi ta manda bosonan, bisando, Bosonan lo habri boso man hanchu pa bos ruman, pa e pober, i pa esun den nesesidat, den boso pais.”1
Den nos tempu, kuido pa e pober i esun den nesesidat ta un di e kuater responsabilidat dibinamente asigná na e Iglesia ku ta yuda personanan i famianan pa kalifiká pa eksaltashon.2
Kuido pa e pober i esun den nesesidat ta kontemplá tantu salbashon temporal komo spiritual. E ta inkluí e servisio di miembronan individual di Iglesia ora nan ta kuida personalmente pa e pober i esun den nesesidat, i tambe bienestar formal di Iglesia, ku ta wòrdu atministrá pa outoridat di saserdosio.
Sentral den e plan pa kuido di e pober i esun den nesesidat ta e lei di ayuno. ”E Señor a establesé e lei di ayuno i ofrenda pa bendishoná Su pueblo i pa proveé pa nan pa sirbi esnan den nesesidat.”3
Komo siguidonan di e Salbador, nos tin un responsabilidat personal pa kuida e pober i esun den nesesidat. Miembronan fiel di Iglesia tur kaminda ta asistí dor di yuna un biaha pa luna—apsteniendo di kuminda i awa pa bintikuater ora—i duna na Iglesia un ofrenda finansiero di ayuno ku ta igual na por lo ménos e balor di e kuminda ku nan lo a kome.
E palabranan di Isaias lo mester wòrdu konsiderá bou di orashon i siñá den kada kas:
”No ta mas mihó e ayuno ku mi a skohe? Pa kibra e lasonan di maldat, pa kita e peso di opreshon, i laga e oprimí bai liber, i ku pa kibra tur yugo?
”Esaki no ta pa kompartí bo pan ku esun ku tin hamber, i pa boso trese e pober ku ta kana erante, den boso kas; ora boso mira esun sin paña, pa boso bistié; i pa boso no skonde pa esun ta bo propio karni?”4
Isaias despues a pasa den e lista di bendishonnan maravioso prometé pa e Señor na esnan ku obedesé e lei di ayuno. El a bisa:
”E ora ei bo lus lo nase meskos ku ora solo sali mainta, i bo salú pronto lo manifestá: i bo rektitut lo bai dilanti di bo; i e gloria di e Señor lo ta un protekshon tras di bo lomba.
”E ora ei lo bo invoká, i Yehova lo kontestá; lo bo sklamá, i E lo bisa, Ata mi aki. …
”I si bo ekstendé bo alma pa esun ku hamber i satisfasé e alma afligí, den e sukú lo nase lus, i bo skuridat lo ta manera mèrdia:
”I e Señor lo guia bo kontinuamente, i satisfasé bo alma den sekura.”5
Tokante di e skritura aki, Presidente Harold B. Lee tabatin di bisa lo siguiente: ”E tremendo bendishonnan ku ta bin [di ayuno] a wòrdu anunsiá den kada dispensashon, i aki e Señor ta bisando nos dor di e gran profeta aki dikon tin ayuno, i e bendishonnan ku ta bin di ayuno. … Si bo analisá … e di 58 kapítulo di e buki di Isaias lo bo enkontrá eksponé dikon e Señor ke pa nos paga e ofrenda di ayuno, dikon E ke pa nos yuna. Ta si nos kalifiká e ora ei nos por yama i e Señor por kontestá. Nos por yora i e Señor lo bisa, ’Ata mi aki.’”
Presidente Lee ta añadí: “Nos lo ke ta un biaha den e kondishon kaminda nos por yama i E lo no kontesta? Nos lo yora den nos angustia i E lo no ta huntu ku nos? Mi ta kere ku ta tempu pa nos pensa riba e fundamentunan aki, pasó esakinan ta e dianan benidero, kaminda nos lo bai tin mester mas i mas e bendishonnan di e Señor, ora e huisionan lo wòrdu dramá sin meskla riba hinter e mundu.”6
Nos profeta stimá, Presidente Thomas S. Monson, a kompartí su testimonio di e prinsipionan aki—un testimonio ku a nase di eksperensha personal. El a bisa: ”Niun miembro di e Iglesia ku a yuda proveé pa esnan den nesesidat nunka lo lubidá òf lamentá e eksperensha. Industria, ekonomisashon, ta outosufisiente i kompartí ku otronan no ta nobo pa nos.”7
Rumannan, miembronan di E Iglesia di JesuCristu di e Santunan di e Delaster Dianan ta hende ku ta sera kombenio, i ku ta warda mandamentunan. Mi no por pensa di ningun lei, ningun mandamentu, ku si nos warda fielmente, ta mas fásil pa warda i ku ta proveé mas bendishon ku e lei di ofrenda. Ora nos yuna i duna un ofrenda di ayuno honesto, nos ta kontribuí ku Señor su depósito loke nos lo a gasta komo gastu di e kumindanan. E no ta rekerí sakrifisio monetario den ekseso di loke nos lo a gasta normalmente. Na e mes momento, nos ta wòrdu primintí bendishonnan ekstraordinario, manera anteriormente indiká.
E lei di ayuno ta apliká pa tur miembronan di Iglesia. Asta muchanan chikitu por wòrdu siña pa yuna, kuminsando ku un kuminda i despues dos, si nan ta kapas pa komprondé i físikamente por warda e lei di ayuno. Esposo o i esposa, miembronan soltero, hóbennan, i mucha chikitu mester kuminsá e ayuno ku un orashon, dunando gratitut pa e bendishonnan den nan bida miéntras nan ta buska e bendishonnan di e Señor i fortalesa durante di e periodo di ayuno. Kumplimentu kompletu di e lei di e ayuno ta pasa ora e ofrenda di ayuno ta wòrdu hasí na e representante di Señor, e obispu.
Obispunan, boso ta dirigí e bienestar di boso bario. Boso tin e mandato divino pa buska i kuida e pobernan. Ku e apoyo di presidente di Sosiedat di Sokoro i e lidernan di e quorum di Melkisedek, boso meta ta pa yuda miembronan pa nan yuda nan mes i bira outosufisiente. Boso ministerio na e nesesidatnan temporal i spiritual di e miembronan dor di usa e fondonan di ofrenda komo sosten temporal i komo suplemento pa e rekursonan di famia. Ora boso ehersé e yabinan di saserdosio bou orashon i distinshon yudando e pober i esun den nesesidat, lo boso bin komprondé ku e uso korekto di ofrenda di ayuno pa intenshoná ta pa sostené bida, no estilo di bida.
Presidentenan di e quorum di e Saserdosio Aaróniko, boso tin e yabinan i e poder pa atministrá e ordenansanan eksterior [temporal]. Boso ta obra ku e obispu i ta instruí e miembronan di e Quorum riba nan debernan den e saserdosio i despues den buska e miembronan di Iglesia pa duna nan e oportunidat pa kontribuí ku e ayuno. Ora poseedornan di Saserdosio Aaróniko magnifiká nan saserdosio i ekstendé e oportunidat na tur e miembronan di Iglesia, frekuentemente ta fasilitá e bendishonnan prometé di ayuno na esnan ku lo tin mas mester di dje. Lo bo ta testigu ku e spiritu di kuido pa e pobernan i esnan den nesesidat, tin e poder pa suavisá kurasonnan, ku di otro manera lo ta duru, i bendishoná e bidanan di esnan ku no ta asistí na Iglesia frekuentemente.
Presidente Monson a bisa,”E obispunan ku ta organisá nan quorumnan di Saserdosio Aaróniko pa partisipá den e rekolekshon di ofrendanan di ayuno lo haña mayor éksito den e responsabilidat sagrado aki.”8
Obispunan, kòrda ku sirkunstanshanan ta varia hopi di un aria pa e otro i di un pais pa e otro pais. Kontakto di porta pa porta dor di e miembronan di e quorum di Saserdosio Aaróniko kisas no ta práktiko den e region kaminda bo ta biba. Sinembargo, nos ta invitá boso pa konsiderá bou di orashon e konseho di e profeta i buska inspirashon pa maneranan apropiá den kua e poseedornan di Saserdosio Aaróniko den boso barionan por magnifiká nan saserdosio dor di partisipá den rekolekshon di ofrendanan di ayuno.
Den kapítulo 27di 3 Nefi, e Señor resusitá a puntra, ”Ki tipo di hòmbernan boso mester ta?” El a kontestá, ”Meskos ku ami.”9 Ora nos tuma riba nos e nòmber di Cristu i lucha pa siguiÉ, nos lo risibí Su imágen riba nos kara i bira mas manera E. Kuida e pobernan i esnan den nesesidat ta inherente den e ministerio di e Salbador. E ta den tur kos ku E hasi. E ta ekstendé [su mannan] na nos tur i ta lanta nos. Su yugo ta fásil, i Su karga no ta pisá. Mi ta invitá kada unu di nos pa bira mas manera e Salbador dor di e kuido pa e pobernan i pa esnan den nesesidat, dor di fielmente warda e lei di ayuno, i dor di kontribuí ku un ofrenda generoso. Mi ta testifiká humildemente ku kuido fielmente di e pober i esnan den nesesidat ta un reflekshon di e madures spiritual i lo bendishoná tantu esun ku ta duna komo esun ku ta risibí. Den e sagrado nòmber di JesuCristu, amèn.