Meditá e Kaminda di Bo Pianan

Pa Presidente Thomas S. Monson

Ora nos ta mira na Jesus komo nos Ehèmpel i ora ku nos ta sigui Su pasonan, nos por bai bèk ku seguridat na nos Tata Selestial.

Mi kerido hermanonan i hermananan, mi ta humilde ora ku mi ta para dilanti di boso e mainta aki. Mi ta pidi pa boso fe i orashonnan na mi fabor ora ku mi ta kompartí ku boso mi mensahe.

Nos tur a kuminsá un biahe esensial i maravioso ora ku nos a laga e mundu di spiritu i a drenta den e estado ku desafio frekuente yamá mortalidat. E propósito primario di nos eksistensia riba tera ta pa haña un kurpa di karni wesu, pa gana eksperensia ku por bini únikamente pa medio di separashon di nos mayornan selestial, i pa wak si nos lo warda e mandamentunan. Den e buki di Abraham, kapítulo 3 ,nos ta lesa: “I nos lo proba nan ku esaki, pa wak si nan lo hasi tur e kosnan ku e Señor Dios lo manda nan.”¹

Ora nos a bini na tera, nos a trese ku nos un gran don di Dios—ku ta nos albedrio. Den míles di manera nos ta privilegiá pa skohe pa nos mes. Aki nos ta siña for di e maestro duru di eksperiensha. Nos ta diserní entre bon i malu. Nos ta diferensia entre e amargo i zut. Nos ta siña ku desishonnan ta determiná e destino.

Mi tin sigur ku nos a laga nos Tata ku un deseo masha grandi di bai bek na Dje, pa nos gana e eksaltashon ku El a planifiká pa nos i kua nos mes tabata deseá masha tantu mes. Aunke nos ta wὸrdu lagá pa haña i sigui e kaminda ku lo guia nos bek na nos Tata na Shelu, El no a manda nos aki sin direkshon i guia. Sino, ku El a duna nos e instrumèntnan ku nos tin mester, i E lo yuda nos ora ku nos ta buska Su yudansa pa esforsá pa hasi tur loke ta den nos poder pa perseverá te na final i gana bida eterno.

Pa yuda guia nos, nos tin e palabranan di Dios i Su Yu ku ta wὸrdu hañá den nos skrituranan santu. Nos tin e konseho i siñansanan di profetanan di Dios. I di mas importansia, nos a wὸrdu duná ku e perfekto ehèmpel pa sigui—si e ehèmpel di nos Señor i Salbador JesuCristu—i nos a wὸrdu instruí pa sigui e ehèmpel ei. E Salbador a bisa di Su mes: “Bini, sigui mi.”² “E obranan ku boso a mira mi hasi eseinan boso lo hasi tambe.”³ El a hasi e pregunta, “Ki sorto di hòmbernan boso mester ta? I despues El a kontesta, “di bèrdat mi ta bisa boso, manera Ami ta.”⁴ “El a marka e kaminda i a guia e kaminda.”⁵

Ora ku nos mira na Jesus komo nos Ehèmpel i ora ku nos ta sigui Su pasonan, nos por bai bek ku seguridat na Nos Tata Selestial pa biba ku N’e pa semper. E Profeta Nefi a bisa, “A ménos ku un hende perseverá te na fin, den sigui e ehèmpel di e Yu di e Dios Bibiente, e no por optené salbashon.”⁶

Un muhé, kada bia ku tabata relatá su eksperensia ku e tabatin durante un bishita na e Tera Santu, tabata sklama, “Mi a kana kaminda Jesus a kana!”

El tabata den besindario unda Jesus a biba i siña. Podisé el a para riba e baranka unda El a para un bia of mira e serunan ku El a mira tambe. E eksperienshanan, tabata hopi emoshonante p’e, pero kanando físikamenteunda Jesus a kana ta ménos importante ku kanando manera El a kana. Sigui Su ehèmpel pa medio di sigui Su akshonnan ta hopi mas importante ku purba di kana e trayekto ku El a biaha den mortalidat.

Ora ku Jesus a ekstendé na un hòmber riku e invitashon, “Bini, sigui mi,”⁷ El no tabata ke men meramente pa e hòmber riku siguié’ den e serunan i vayenan di e pais.

Nos no mester kana kantu di e laman di Galilea of entre e serunan di Judea pa kana unda Jesus a kana. Nos tur por kana e kaminda ku El a kana, ora ku Su palabranan ta zona den nos orea, Su Spiritu ta yena nos kurashon, i Su siñansanan ta guia nos bida, nos ta skohe pa siguié’ ora ku nos ta biaha den mortalidat. Su ehèmpel ta duna lus riba kaminda, El a bisa, “Ami ta e kaminda, e bèrdat i e bida.”⁸

Ora ku nos ta eksaminá e kaminda unda Jesus a kana, nos lo wak ku el a hib’é’ pa medio di hopi di mesun desafionan ku nos tambe ta topa den e bida.

Por ehèmpel, Jesus a kana ku e kaminda di desepshon. Aunke El a eksperimentá hopi desepshon, un di e esun mas intenso a wὸrdu mustrá den Su lamento riba Yerusalèm ora ku El a kaba ku Su ministerio públiko. E yunan di Israel a rechasá e seguridat di e alanan protektor ku El a ofresé nan. Ora ku el a wak abou riba e siudat ku pronto lo ta bandoná dor di destrukshon, El a wὸrdu yená ku emoshon di doló profundo. Den angustia, El a lamentá, “O Yerusalèm, Yerusalèm, abo ku ta mata e profetanan i piedra e mensaheronan ku ta wὸrdu mandá na abo; kuantu bia Mi a hunta bo yunan manera galiña ta hunta su yunan bou di su alanan, i boso no a lagami!”⁹

Jesus a kana e kaminda di tentashon. Lucifer, esun malbado, reuniendo su forsa mas grandi, ku su gañamentu, a tenta esun ku a yuna pa 40 dia i 40 anochi. Jesus no a sukumbí, pero, El a risistí kada tentashon. Su palabranan di despedida: “Kita for di mi bista, Satanas.”¹⁰

Jesus a kana e kaminda di doló. Konsiderá Getsémani, unda E tabata “den un agonia…. i su sodó tabata kai riba suela manera gotanan di sanger.”¹¹ I niun por lubidá Su sufrimentu riba e krus kruel.

Kada un di nos lo kana den e kaminda di desepshon, podisé dor di un oportunidat pèrdí, un poder mal usá, desishonnan di un ser stimá, of un desishon ku nos mes a tuma. E kaminda di tentashon tambe lo ta e kaminda pa kada un di nos. Nos ta lesa den sekshon 29 di Doctrina y Convenios: “I mester ta nesesario ku e diabel por tenta e yunan di hòmber, of nan no por a ta nan mes agente.”¹²

Den un mes manera nos ta kana e kaminda di doló. Nos, komo siervonan, no mester spera mas ku loke e Maestro a pasa, ken a laga mortalidat solamente despues di doló i sufrimentu masha grandi.

Miéntras ku nos ta riba e kaminda amargo di doló, nos tambe haña grand felisidat.

Nos, ku Jesus, por kana e kaminda di obedensia. E lo no ta semper fásil, pero laga nos lema ta e herensia ku Samuel a laga pa nos: “At’akí, pa obedesé ta mihó ku sakrifisio, i pa skucha mas ku sebu di karné.”¹³ Laga nos kòrda ku e resultado final di desobediensia ta koutiverio i morto, miéntras ku e rekompensa di obedensia ta libertat i bida eterno.

Nos, manera Jesus, por kana e kaminda di servisio. Un gran ehèmpel di bondat ta e bida di Jesus ora ku El a ministrá entre hende. El a trese forsa na e koyuntura di e koho, bista na e wowonan di e siegu, tendementu na e oreanan di e surdu.

Jesus a kana e kaminda di orashon. El a siña nos kon pa hasi orashon dor di duna nos e bunita orashon ku nos ta konosé komo e Orashon di Señor. I ken por lubidá Su orashon na Getsémani: “no mi boluntat, pero bo boluntat wὸrdu hasí.?”¹⁴

Otro instrukshonnan ku a wὸrdu duná na nos pa e Salbador ta na nos puntanan dede, hañá den e skrituranan santu. Den Su Predikashi Seru, E ta bisa nos pa ta miserikordioso, pa ta humilde, pa ta hustu, pa ta puru di kurason i pa ta hasidónan di pas. E ta instruí nos pa defendé ku kurashi nos kreensha, aunke nos lo wὸrdu redikulisá i persiguí. E ta pidi nos pa laga nos lus bria pa otronan por mira nan i por deseá pa glorifiká nos Tata na Shelu. E ta siña nos pa ta moralmente limpi den tantu nos kurpa, nos pensamentunan,i nos akshonnan. E ta bisa nos ku ta mas importante pa tesorá den shelu ku riba tera.¹⁵

Su parabelnan ta siña ku poder i outoridat. Ku e historia di e bon Samaritano, E ta siña nos pa stima i sirbi nos próhimo.¹⁶ Den Su parabel di e talentonan, E ta siña nos pa mehorá nos mes i esforsá pa perfekshon.¹⁷Ku e parabel di e karné pèrdí, e ta instruí nos pa bai i reskatá esnan ku a laga e kaminda i a pèrdè nan kaminda.¹⁸

Ora ku nos ta esforsá pa pone Cristu komo e sentro di nos bida dor di siña Su palabranan, dor di sigui Su siñansanan, i dor di kana den Su kaminda, El a primintí pa kompartí ku nos bida eterno ku El a muri pa gana. No tin un destino mas haltu ku esaki, ku nos mester skohe i aseptá Su disiplina i bira Su disípulonan pa hasi Su obra durante nos bida. Nada otro, ningun otro desishon ku nos por tuma, por di hasi nos loke E por.

Ora mi ta pensa di esnan ku a sigui berdaderamente e ehèmpel di e Salbador i ku a kana den Su kaminda, ta bini lihé den mi mente e nòmbernan di Gustav i Margarete Wacker—dos di e mihó individuonan Kristian ku mi a konosé. Nan ta nativo Aleman ku a imigrá na e parti ost di Canada,i mi a konosé nan ora mi a sirbi komo un presidente di mishon ayanan. Ruman Wacker tabata traha komo barbero. Aunke nan rekurso tabata limitá, nan a kompartí tur kos nan tabatin. Nan no a wὸrdu bendishoná ku yu, pero nan a nutri tur esnan ku a drenta nan kas. Hòmbernan i muhénan di edukashon i sofistikashon a buska e siervonan humilde i sin edukashon aki di Dios i nan a konsiderá nan mes fortuná si nan por a pasa un ora den nan presensia.

Nan aparensia tabata komun, nan ingles tabata den algun manera difísil pa komprendé, nan kas tabata simpel. Nan no tabata tin outo ni televishon, ni tampoko nan a hasi niun kos kua e mundu usualmente ta paga tin una dje. Tòg e fiel a bati nan porta pa partisipá di e spiritu ku tabata einan. Nan kas tabata shelu na tera, i e spiritu ku nan tabata radia tabata di pas puro i bondat.

Nos tambe por tin e spiritu ei i por kompartié’ ku e mundu ora ku nos ta kana e kaminda di nos Salbador i sigui Su ehèmpel perfekto.

Nos ta lesa den Proverbionan e atmonishon, “Meditá e kaminda di boso pia.”¹⁹ Si nos ta hasié, nos lo tin e fe, asta e deseo, pa kana e kaminda ku Jesus a kana. Nos lo no tin duda ku nos ta riba e kaminda ku nos Tata ke pa nos sigui. E ehèmpel di nos Salbador ta duna un norma pa tur kos ku nos ta hasi, i Su palabranan ta duna un guia sigur. Su kaminda lo hiba nos na kas ku seguridat. Laga esaki ta nos bendishon, mi ta pidi, den e nòmber di JesuCristu, ken mi ta stima, ken mi ta sirbi, i di ken mi ta testifiká, amèn.