Keda den e Boto i Tene Duru!
Pa Elder M. Russell Ballard
Di e Quorum di e Diesdos Apòstelnan
Si nos mantené nos enfoke riba Señor, nos ta wὸrdu primintí un bendishon sin komparashon.
Resientemente, un amigu di mi a hiba su yu hòmber na un trep den e Riu Colorado atraves di e Cataract Canyon, den e parti Zùit ost di Utah. E canyon ta famoso pa su ruta di 23 km di awa blanku di hopi velosidat ku por partikularmente peligroso.
Den preparashon pa nan aventura, nan a revisá ku kuidou e website di e National Park Service, kua ta kontené informashon importante tokante e preparashon personal i peligernan komun i skondí .
Na kuminsamentu di e biahe, un di e guianan ku eksperensia a revisá instrukshonnan importante di seguridat, enfatisando tres reglanan ku lo sigurá e seguridat di e grupo den e biahe di koriente aselerá. “Regla number un: keda den e boto! Regla number dos: semper usa vèst di salbabida! Regla number tres” Semper tene duru ku dos man! Despues el a bisa atrobe, ku ainda mas énfasis, “Riba tur kos, kòrda regla number un: Keda den e boto!”
E aventura aki ta rekordá mi di nos biahe mortal. Kasi nos tur ta eksperensiá tempunan den nos bida unda e awanan trankil di bida ta wὸrdu apresiá. Den otro tempunan, nos ta topa ku awa blanku di hopi velosidat ku ta un metáfora komparabel na esnan hañá den e pida di 23 kilometer atraves di e Cataract Canyon—desafionan ku por inkluí situashonnan físiko i mental, e morto di un ser stimá, soñonan i speransanan destrosá, i—pa algun asta e krísis di fe ora nos ta topa ku problemanan, preguntanan i dudanan di bida.
E Señor den Su bondat ta duna yudansa, inkluyendo un boto, materialnan esensial manera vèstnan salba bida, i guianan di riu ku eksperensia ken ta duna guia i instrukshonnan di seguridat pa yuda nos biaha den e riu di bida na nos destino final.
Laga nos pensa tokante e regla number un: “keda den e boto!”
Presidente Brigham Young tabata usa “e Boto Bieu Sion” komo un metáfora pa E Iglesia di JesuCristu di e Santunan di Delaster Dianan.
El a bisa den un okashon: “Nos ta meimei den e oséano. Un tormenta ta bini, i, komo marineronan ta bisa, e ta traha hopi duru. “Mi no ta bai keda aki,’ un ta bisa; ‘mi no ta kere ku esaki ta e “Boto di Sion.” ‘Pero nos ta meimei den e oséano.’ Mi no tin kunes, mi no ta bai keda akinan.’ E vèst ta kita, i e ta bula den laman.’ E ta bai hoga? Si. I asina tambe ku esnan ku ta bai for di e Iglesia aki. Esaki ta e “Boto Bieu Sion, ‘laga nos keda den dje.”1
Na otro okashon, Presidente Young a bisa ku e tabata preokupá tokante e hende ku ta pèrdè nan kaminda ora ku nan tabata wòrdu bendishoná—ora ku bida tabata bon:”Ta den wer trankil, ora e boto bieu di Sion ta nabegá ku bientu gentil, [i] ora tur kos ta trankil riba deck, ku algun di e rumannan ke bai den e botonan chikí pa … landa, i algun ta hoga, otro nan ta drif bai, i otronan ta bin bek na e boto. Laga nos keda den e boto bieu i e lo hiba nos [den seguridat] na e puerto; boso no mester ta preokupá.”2
I finalmente, Presidente Young a kòrdá e Santunan: “Nos ta den e boto bieu di Sion. … [Dios] ta na e timon i e lo keda einan. … Tur ta bon, kanta Aleluya, pasobra Señor ta aki. E ta manda, guia, i dirigí. Si e hende tin konfiansa inkondishonal den nan Dios, no bandoná nunka nan konvenionan ni nan Dios, E lo guia nos korektamente.”3
Ku e desafionan ku nos tur tin awe, kon nos por keda den e Boto Bieu di Sion?
Esaki ta e manera! Nos mester eksperensiá un kombershon kontinuo dor di oumentá nos fe den JesuCristu i nos fidelidat na Su evangelio durante nos bida—no djis un bia, pero regularmente. Alma a puntra, “I awor at’akí, mi ta bisa boso, mi hermanonan [i hermananan], si boso a eksperensiá un kambio di kurason, i si boso a sinti pa kanta e kantika di amor ku ta redimí, lo mi puntra, boso por sinti asina awor aki?”4
E guianan di riu ku eksperensia por wὸrdu kompará ku Iglesia su apòstelnan i profetanan i lidernan lokal di saserdosio inspirá i lidernan ousiliar. Nan ta yuda nos yega na nos destino final ku seguridat.
Resientemente, mi a papia na e seminario di presidentenan di mishon nobo i a konsehá e lidernan aki:
“Mantené e wowonan di e mishon na e lidernan di Iglesia … Nos lo no ke i … no por hiba[boso] den mal kaminda.
“I ora ku boso ta siña boso mishoneronan pa enfoká nan wowo riba nos, siña nan pa nunka sigui esnan ku ta pensa ku nan sa mas tokante atministrá e asuntunan di e Iglesia mas ku … Tata Selestial i e Señor JesuCristu ta hasi”pa medio di e lidernan di saserdosio ken tin e yabinan pa presidí.
“Mi a deskubrí den mi ministerio ku esnan ku a pèrdè [i] ta konfundí ta tipikamente esnan ken kasi semper … ta lubidá ku ora ku e Promé Presidensia i e Quorum di Diesdos Apòstelnan ta papia ku un stèm uní; e ta e stèm di Señor pa e tempu ei. Señor ta rekordá nos, ‘Sea pa mi mes stèm òf pa e stèm di mi siervonan, ta meskos’ [D&C 1:38].”5
Den otro palabranan, nan bandoná e Boto Bieu di Sion—nan a kita for di e kaminda; nan a apostatá. Trágikamente, nan ta eksperensiá konsekuensianan sin intenshon di eventualmente di korto i largo plaso, i no solamente pa nan mes pero tambe pa nan famianan.
Nos lidernan lokal di Iglesia, meskos ku e guiadó eksperto di riu, a wὸrdu siñá pa eksperienshanan di bida; a wὸrdu kapasitá i siñá pa apòstelnan i profetanan i otro ofisialnan di Iglesia; i mas importante, nan a wὸrdu siñá pa Señor Mes.
Na un otro okashon e aña aki, mi a papia na e hóbennan adulto di e Iglesia na e transmishon devoshonal di mei di e Sistema di Edukashon di Iglesia. Mi a bisa:
“Mi a tende ku algun hende ta pensa ku e lidernan di Iglesia ta biba den nan mes mundu. Loke nan ta lubidá ta ku nos ta hòmbernan i muhénan ku eksperiensha, nos a biba nos bidanan na asina tantu lugá i a traha ku hopi hende di diferente backgrounds. Nos asignashon aktual literalmente tahiba nos rὸnt mundu, kaminda nos ta reuní ku lidernan polítiko, religioso, di negoshi, i humanitario di mundu. Aunke nos a bishitá [lidernan] den e White House na Washington, D.C. i lidernan di nashonnan [i religioso] rὸnt mundu, nos a bishita tambe e [famianan i hendenan] di mas humilde na mundu …
‘Ora ku boso ta konsiderá ku meditashon nos bidanan i ministerio, boso kasi sigur lo ta di akuerdo ku nos ta mira i eksperensiá e mundu den maneranan ku poko otro so ta hasi. Boso lo ripara ku nos ta biba ménos tempu den nos mes mundu kompará ku mayoria hende. …
“… Tin un kos tokante e sabiduria individual i kombiná di [lidernan di Iglesia] ku mester duna algun konsuelo. Nos a eksperensiá tur kos, inkluyendo e konsekuensianan di leinan públiko i polítiko, desepshonnan, tragedianan, i mortonan den nos mes famianan. Nos no ta indiferente ku boso bidanan.”6
Huntu ku e regla number un manera mi a aplik’é’, kòrda reglanan dos i tres: semper usa un vèst di salba bida, i tene duru ku tur dos man. E palabranan di Señor, manera nan ta hañá den e skrituranan i e siñansanan di e apòstelnan i profetanan. Nan ta duna nos konseho i direkshon ku, ora nan ta wὸrdu siguí, lo traha komo un vèst di salba bida spiritual i lo yuda nos sa kon pa tene duru ku tur dos man.
Nos mester bira manera e yunan di Mosia ku a “krese fuerte den e konosementu di e bèrdat.” Nos por bira hòmbernan i muhénan ku “konosementu puru.” Esaki por wὸrdu lográ únikamente dor di nos “estudio diligente di skrituranan, pa [nos] konosé e palabra di Dios.”7
Den buskamentu di e skrituranan i e palabranan di apòstelnan i profetanan di pasado i aktual, nos mester enfoká riba estudio, biba, i stima e doktrina di Cristu.
Ademas di desaroyá e habito di lesamentu personal di skrituranan, nos mester ta manera e yunan di Mosia i dediká nos mes “na hopi orashon ayuno.”8
Ta parse ku algun di e kosnan aki kua no por wὸrdu midí fásilmente ta di importansia masha grandi. Keda enfoká riba e kosnan simpel aki i evitá di bira distrai.
Segun ku mi a konosé hende ku no a keda den e boto i no tabata tene duru ku tur dos man durante e tempunan di pruebanan i problemanan òf ku no a keda den e boto durante tempunan di kalma relativo, mi a wak ku hopi di nan a pèrdè nan enfoke riba e berdatnan sentral di e evangelio—e motibunan ku nan a uni e Iglesia na promé lugá; e motibunan ku nan a keda kompletamente komprometí i aktivo pa biba e normanan di evangelio i bendishoná otronan dὸr di servisio konsagrá dediká, i e maneranan den kua e Iglesia tabata den nan bidanan ‘un lugá di alimentashon spiritual i desaroyo.”9
Joseph Smith a siña e bèrdat sentral: “E prinsipionan fundamental di nos religion [ta] e testimonio di apòstelnan i profetanan tokante JesuCristu, … “ku el a muri, a wὸrdu derá, i a lanta atrobe den e di tres dia, i a subi na shelu; i tur e otro kosnan aki ta solamente adishon i esaki, kua ta pertenesé na nos religion.”10
Si nos keda ku nos enfoke riba Señor, nos ta wὸrdu primintí un bendishon sin komparashon: “Asina ku, boso mester pusha dilanti ku un firmesa den Cristu, mustrando un puresa perfekto di speransa, i un amor pa Dios i pa tur hende. Di manera ku, si boso pusha dilanti, alimentando boso ku e palabra di Cristu, i perseverá te na fin, ata, asina e Tata ta bisa: Boso lo tin bida eterno.”11
Tin bia Santunan di Delaster Dianan fiel i investigador sinsero ta kuminsá enfoká riba e “partinan adishonal” enbes di riba e prinsipionan fundamental. Esei ta, Satanas ta tenta wòrdu distraé for di e mensahe kla i simpel di e evangelio restourá. Esnan asina distraé frekuentemente ta bandoná partisipashon di e sakramentu pasobra nan a bira enfoká, i asta preokupá, ku e práktikanan o siñansanan ménos importante.
Otronan por enfoká riba preguntanan i ta duda nan eksperensia. Klaro, teniendo preguntanan i eksperensiando dudanan no ta inkonsistente ku disipulado dediká. Resientemente, e Konseho di e Promé Presidensia i e Quorum di e Diesdos Apòstelnan a deklará: Nos ta komprendé ku debes en cuando miembronan lo tin preguntanan tokante e doktrina di Iglesia, historia, of praktiká. Miembronan semper ta liber pa hasi e preguntanan ei i ku sinseridat buska un komprenshon mas grandi.”12
Kòrda, Joseph Smith mes tabatin preguntanan ku a kuminsá e Restourashon. E tabata un buskadó i manera Abraham, a haña kontesta na e preguntanan mas importante di bida.
Preguntanan importante ta enfoká riba loke ta importá mas—Plan di Tata Selestial i Ekspiashon di e Salbador. Nos búskeda mester guia nos pa bira mas bondadoso, amoroso, pordonadó, pasiente, i disípulonan dediká. Nos mester ta dispuesto, manera Pablo a siña, pa “hiba e karganan di otro, i pa kumpli ku e lei di Cristu.”13
Pa hiba e karga di otronan ta inkluí yuda, apoyá, i komprendé tur hende, inkluyendo esun ku ta sinti malu, enfermo, e pober den spiritu i kurpa, e buskadó i esun aflihí, i tambe otro miembronan disípulo—inkluyendo lidernan di Iglesia ken a wὸrdu yamá di Señor pa sirbi pa un temporada.
Hermanonan i hermananan, keda den e boto, usa boso vèst di salba bida, i tene duru ku tur dos man. Evitá distraishonnan! I si kualke di boso a kai for di boto, nos lo bai buskabo, haña bo, ministrá na bo i trese bo bek ku seguridat riba e Boto Bieu di Sion, unda Dios nos Tata i e Señor JesuCristu ta na timon i lo guia nos korektamente, di kua mi ta testifiká humildemente den e nòmber di JesuCristu, amèn.